Skákþing Vestmannaeyja hefst 11. janúar

Skákþing Vestmannaeyja hefst sunnudaginn 11. janúar kl. 19:30. Tefldar verða 9 umferðir eftir svissnesku kerfi. Tímamörk verða 90 mínútur á  alla skákina auk 30 sek. á leik.  Teflt verður á fimmtudögum auk valdra sunnudaga. Teflt verður í húsnæði Taflfélags Vestmannaeyja að Heiðarvegi 9. Mótið verður reiknað til íslenskra stiga og FIDE stiga.

Sigurvegari mótsins hlýtur nafnbótina Skákmeistari Vestmannaeyja og varðveislu farandbikars í eitt ár.  Verðlaunagripir eru auk þess til eignar fyrir 3 efstu sætin.

Skráning er hjá Sverri í síma: 858-8866 eða á netfangið: [e-mail] fram á laugardag kl. 19

Upplýsingar um skráða keppendur má nálgast hér.

Áfangaskák hjá Guðmundi í beinni!

Guðmundur Kjartansson teflir áfangaskák við enska stórmeistarann Mark Hebden (2515) í níundu umferð Hastings-mótsins sem hefst kl. 14:15.  Vinni Guðmundur skákina nær hann lokaáfanga að alþjóðlegum meistaratitli.

Skákina má nálgast hér:  http://www.hastingschess.org.uk/gameview/live/h09r09/default2.htm

Atkvöld hjá Helli í kvöld

Taflfélagið Hellir heldur atkvöld mánudaginn  5. janúar 2009 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með tuttugu mínútna umhugsun.  Tilvalin upphitun fyrir þá sem vilja hita sig upp fyrir Skákþing Reykjavíkur!

Sigurvegarinn fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þar sem um er að ræða fyrsta atkvöld ársins fá auk þess þeir þrír efstu sem ekki eiga bók Braga Halldórssonar um Heimsbikarmót Stöðvar 2 þá bók.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Jón Viktor skákmaður ársins 2008 að mati ritstjóra Skák.is

Ritstjóri Skák.is hefur venju samkvæmt gert hið árlega áramótauppgjör á bloggsíðu sinni.  Að mati hans er Jón Viktor Gunnarsson skákmaður ársins 2008, Hallgerður Helga Þorsteinsdóttir skákkona ársins, Hjörvar Steinn Grétarsson efnilegasti skákmaður ársins og Taflfélag Bolungarvíkur skákfélag ársins.

Uppgjörið, sem er skrifað í léttum dúr, má finna í heild sinni á bloggsíðu ritstjóra.  

Guðmundur gerði jafntefli við Simon Williams (uppfært)

FIDE-meistarinn Guðmundur Kjartansson (2365) gerði jafntefli við enska stórmeistarann Simon Williams (2494) í mjög fjörugri skák í áttundu og næstsíðustu umferð Hastings-mótsins, sem fram fór í dag.  Guðmundur hefur 5½ vinning og er í 6.-12. sæti.

Í lokaumferðinni, sem fram fer á morgun, teflir Guðmundur við enska stórmeistarann Mark Hebden (2515).  Vinni Guðmundur skákina nær hann lokaáfanga að alþjóðlegum meistaratitli!

Rússneski stórmeistarinn Igor Kurnosov (2606) er efstur með 7 vinninga og úkraínski stórmeistarinn Valerij Neverov (2571) annar með 6½ vinning.  Í 3.-5. sæti eru ensku stórmeistararnir David Howell (2593) og Stuart Conquest (2526) og sænski stórmeistarinn Emanuel Berg (2623).

Hægt verður að fylgjast með skákum mótsins beinni og hefst umferðin á morgun kl. 14:15.

Rúmlega 100 skákmenn taka þátt í aðalmótinu og þar af 13 stórmeistarar.   Guðmundur er u.þ.b. nr. 60 í stigaröðinni.  

• Heimasíða mótsins
• Skákirnar í beinni

Tvöfaldur íslenskur sigur í Reggio Emila!

Björn Þorfinnsson (2408) og Jón Viktor Gunnarsson (2463) urðu efstir og jafnir í b-flokki Reggio Emila-mótsins,sem lauk í dag.  Jón Viktor vann ítalska FIDE-meistarann Alberto Pomaro (2254) en Björn tapaði fyrir  ítalska FIDE-meistarann Marco Corvi (2343).  Báðir hlutu þeir 6½ vinning og hækka báðir um rúmlega 10 stig á mótinu.

Kínverjinn Ni Hua (2710)varð langefstur í aðalmótinu en hann hlaut 7½ vinning í 9 skákum.  Annar varð Ungverjinn Zoltan Almasi (2663) með 6 vinninga og í 3.-5. sæti urðu Rúmeninn Mihail Marin (2556), Þjóðverjinn Jan Gustafsson (2634) og Rússinn Konstantin Landa (2613).  

• Heimasíða mótsins
• 
  

Skeljungsmótið 2009 - Skákþing Reykjavíkur

Skeljungsmótið 2009 - Skákþing Reykjavíkur hefst sunnudaginn 11. janúar kl. 14. Tefldar verða 9 umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19 og á sunnudögum kl. 14.  Teflt er í húsnæði Taflfélags Reykjavíkur að Faxafeni 12.

Upplýsingar um skráða keppendur má nálgast hér. Nú eru 15 skákmenn skáðir til leiks og þar á meðal Sigurbjörn Björnsson og Sævar Bjarnason. 

Verðlaun:

• 1. sæti kr. 50.000
• 2. sæti kr. 30.000
• 3. sæti kr. 20.000
• Besti árangur undir 2000 skákstigum kr. 15.000 (íslensk stig gilda)
• Besti árangur undir 1800 skákstigum kr. 15.000 (íslensk stig gilda)

Sigurvegarinn hlýtur auk þess nafnbótina Skákmeistari Reykjavíkur 2009 og farandbikar til varðveislu í eitt ár.

Þátttökugjöld:

• kr. 3.500 fyrir 16 ára og eldri
• kr. 2.000 fyrir 15 ára og yngri

Dagskrá mótsins:

• 1. umferð sunnudag   11. janúar  kl. 14
• 2. umferð miðvikudag 14. janúar  kl. 19
• 3. umferð föstudag     16. janúar  kl. 19
• 4. umferð sunnudag   18. janúar  kl. 14
• 5. umferð miðvikudag 21. janúar  kl. 19
• 6. umferð föstudag      23. janúar  kl. 19
• 7. umferð sunnudag    25. janúar  kl. 14
• 8. umferð miðvikudag 28. janúar  kl. 19
• 9. umferð föstudag      30. janúar  kl. 19

Skákþingið er reiknað til alþjóðlegra skákstiga.

Skráning fer fram á [e-mail] og í síma 895-5860 (Ólafur).

Hraðskákmót Reykjavíkur verður haldið sunnudaginn 1. febrúar og hefst það kl. 14.00. Tefldar verða 2x7 umferðir eftir Monradkerfi.

Íslenskur sigur á Reggio Emilia-mótinu!

Jón Viktor Gunnarsson (2463) sigraði ítalska FIDE-meistarann Massimiliano (2320) í áttundu og næstsíðustu umferð b-flokks Reggio Emila-mótsins, sem fram fór í dag.  Björn Þorfinnsson (2408) gerði hins vegar stutt jafntefli við ítalska FIDE-meistarann Luca Barillaro (2202).  Björn er langefstur en hann hefur 6½ vinning.  Eini maðurinn sem getur náð honum að vinningum er Jón Viktor sem er annar með 5½ vinning svo það er ljóst að það verður íslenskur sigur í b-flokknum!

Kínverjinn Ni Hua (2710) er efstur í aðalmótinu með 6½ vinning og hefur tryggt sér sigur því hann hefur 1½ vinnings forskot á Ungverjann Zoltan Almasi (2663) og Rúmenann Mihail Marin (2556) sem koma næstir.  

Í níundu og síðustu umferð, sem fram fer í fyrramálið, teflir Björn við ítalska FIDE-meistarann Marco Corvi (2343) en Jón ítalska FIDE-meistarann Alberto Pomaro (2254).  Sá þarf að vinna Jón til að ná áfanga að alþjóðlegum meistaratitli svo búast má við harðri baráttu!

Skákirnar eru sýndar beint á netinu og skákir morgundagsins hefjast kl. 9:30.

• Heimasíða mótsins
• Skákirnar í beinni

Guðmundur vann enskan stórmeistara!

FIDE-meistarinn Guðmundur Kjartansson (2365) sigraði enska stórmeistarann Stewart G Haslinger (2526) í sjöundu umferð Hastings-mótsins, en þetta er fjórða vinningsskák hans í röð!   Guðmundur hefur nú 5 vinninga og er kominn í 4.-12. sæti!

Í áttundu og næstsíðustu umferð, sem fram fer á morgun, teflir Guðmundur við enska stórmeistarann Simon Williams (2494).   Hægt verður að fylgjast með skákinn í beinni og hefst viðureignin kl. 14:15.

Rússneski stórmeistarinn Igor Kurnosov (2606) er efstur með 6½ vinning og stórmeistarnir Emanuel Berg (2623), Svíþjóð, og Valerij Neverov (2571) eru í 2.-3. sæti með 5½ vinning.

Rúmlega 100 skákmenn taka þátt í aðalmótinu og þar af 13 stórmeistarar.   Guðmundur er u.þ.b. nr. 60 í stigaröðinni.  

• Heimasíða mótsins
• Skákirnar í beinni

Atkvöld hjá Helli

Taflfélagið Hellir heldur atkvöld mánudaginn  5. janúar 2009 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með tuttugu mínútna umhugsun.  Tilvalin upphitun fyrir þá sem vilja hita sig upp fyrir Skákþing Reykjavíkur!

Sigurvegarinn fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þar sem um er að ræða fyrsta atkvöld ársins fá auk þess þeir þrír efstu sem ekki eiga bók Braga Halldórssonar um Heimsbikarmót Stöðvar 2 þá bók.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).