Guðmundur vann í fyrstu umferð í Prag

FIDE-meistarinn Guðmundur Kjartansson (2365) vann tékkneska skákmanninn Martin Bilek (2011) í fyrstu umferð Prag Open sem fram fór í dag.  Í 2. umferð, sem fram fer á morgun, teflir Guðmundur við Svíann Mladen Gajic (2182).

Alls taka 116 manns þátt í mótinu og þar af 5 stórmeistarar og 16 alþjóðlegir meistarar.  Guðmundur er sextándi stigahæsti keppandinn.

• Heimasíða mótsins
• Chess-Results

Matthías sigraði á fimmtudagsmóti

Matthías Pétursson stóð uppi sem sigurvegari á fyrsta fimmtudagsmóti ársins.  TR-ingurinn ungi fór hreinlega hamförum og lagði meðal annarra Torfa Leósson og Eirík Björnsson.  Þegar upp var staðið hafði Matthías hlotið átta vinninga af tíu.  Næstir komu síðan Páll Andrason og Torfi Leósson með 7,5 vinning þar sem Páll varð hærri á stigum en hann heldur áfram góðu gengi á mótunum.

Úrslit:

• 1. Matthías Pétursson 8 v af 10
• 2.-3. Páll Andrason, Torfi Leósson 7,5 v
• 4.-5. Eiríkur Björnsson, Helgi Brynjarsson 7 v
• 6.-7. Bjarni Jens Kristinsson, Kristján Örn Elíasson 6 v
• 8. Friðrik Þjálfi Stefánsson 5,5 v
• 9. Elsa María Kristínardóttir 5 v
• 10. Sigurjón Haraldsson 3,5 v
• 11. Finnur Kr. Finnsson 3 v

Suðurlandsmótið í skák fer fram helgina 30. janúar - 1. febrúar

 

Nú styttist í Suðurlandsmótið.  Mótið fer fram á Selfossi.  Tefldar verða 7 umferðir, 4 atskákir og 3 kappskákir.  Eftir því sem næst verður komist hefur ekki verið teflt um þennan titil síðan árið 1985 þegar Páll Leó Jónsson vann mótið.  Mótið er öllum opið sem hafa lögheimili í Suðurlandskjördæmi. 

 

Nú eru 17 keppendur skráðir til leiks, en þeim á væntanlega eftir að fjölga verulega þegar nær dregur móti.  Þeir sem hyggjast notfæra sér gistinguna er bent á að hafa samband við gististaðinn og láta vita að gisting tengist skákmótinu.  Skráning á mótið er á heimasíðunni eða hjá Magnúsi Matt í síma 691 2254. Allar nánari upplýsingar um mótið er hægt að nálgast á : http://sudurskak.blog.is/blog/sudurskak/  .

Áramótanámskeið Skákskóla Íslands á Akureyri

Afráðið hefur verið að hefðbundið áramóta-námskeið Skákskóla Íslands fari fram á Akureyri dagana 16. - 18. janúar nk. Miðast námskeiðshaldið við þarfir drengja og stúlkna á Norðurlandi. Það er haldið í samstarfi við Skákfélag Akureyrar í húsakynnum félagsins.

Barna- og unglinganámskeiðið verður með hefðbundnum hætti. Það hefst laugardaginn 17. janúar kl. 11 stundvíslega og stendur til kl. 16 með matarhléi kl. 12 og kaffihléi um kl. 15. Sunnudaginn 18. janúar hefst námskeiðið kl. 10 og stendur með stuttum hléum til kl. 16.

Aðalkennari verður Helgi Ólafsson stórmeistari og skólastjóri Skákskóla Íslands.

Þar sem listi yfir væntanlega þátttakendur liggur ekki fyrir sendum við þér ramma yfir dagskrá námskeiðsins. Gert er ráð fyrir skiptingu eftir aldri en gera má ráð fyrir að styrkleiki þátttakenda ráðist af einhverju leyti af aldri þeirra.

Föstudagur 16. janúar

Kl. 20 - 22. Æfing fyrir bestu ungu skákmenn Akureyringa

Laugardagur 17. janúar:

Kl. 11-12. Kennsla.

Kl. 12- 13. Hádegisverður fyrir alla þátttakendur.

Kl. 13 - 15. Kennsla.

Kl. 15 - 15.30. Kaffitími.

Kl. 15.30 - 16.30. Skákmót beggja flokka.

Kl. 17. - 19. Æfing fyrir bestu ungu skákmenn Akureyringa

Sunnudagur 18. janúar.

Kl. 10-12. Kennsla.

Kl. 12 - 13. Hádegisverður fyrir alla þátttakendur

Kl. 13 - 15. Kennsla

Kl. 15-15. 30. Kaffitími.

Kl. 15.3-16.30. Skákmót og verðlaunaafhending.

Kl 20 - 23. Klukkufjöltefli við bestu skákmenn Norðlendinga. 

Fimmtudagsmót TR hefjast á ný eftir jólafrí

Hin hefðbundnu fimmtudagsmót Taflfélags Reykjavíkur halda áfram í kvöld.  Tefldar verða 9 umferðir með 7 mínútna umhugsunartíma og hefst mótið kl. 19.30 en húsið opnar kl. 19.10.  Fríar veitingar í boði og sigurvegarinn fær að launum glæsilegan verðlaunapening.  Teflt er í skákhöll Taflfélags Reykjavíkur að Faxafeni 12 og þátttökugjald er kr 500 en frítt fyrir 15 ára og yngri.

Um er að ræða fyrsta mót mánaðarins og því verða sérstök aukaverðlaun í boði fyrir sigurvegarann.

Skeljungsmótið - Skákþing Reykjavíkur hefst á sunnudag

Skeljungsmótið 2009 - Skákþing Reykjavíkur hefst sunnudaginn 11. janúar kl. 14. Tefldar verða 9 umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19 og á sunnudögum kl. 14.  Teflt er í húsnæði Taflfélags Reykjavíkur að Faxafeni 12.

Upplýsingar um skráða keppendur má nálgast hér. Nú eru 30 skákmenn skáðir til leiks og þar á meðal Sigurbjörn Björnsson og Sævar Bjarnason. 

Verðlaun:

• 1. sæti kr. 50.000
• 2. sæti kr. 30.000
• 3. sæti kr. 20.000
• Besti árangur undir 2000 skákstigum kr. 15.000 (íslensk stig gilda)
• Besti árangur undir 1800 skákstigum kr. 15.000 (íslensk stig gilda)

Sigurvegarinn hlýtur auk þess nafnbótina Skákmeistari Reykjavíkur 2009 og farandbikar til varðveislu í eitt ár.

Þátttökugjöld:

• kr. 3.500 fyrir 16 ára og eldri
• kr. 2.000 fyrir 15 ára og yngri

Dagskrá mótsins:

• 1. umferð sunnudag   11. janúar  kl. 14
• 2. umferð miðvikudag 14. janúar  kl. 19
• 3. umferð föstudag     16. janúar  kl. 19
• 4. umferð sunnudag   18. janúar  kl. 14
• 5. umferð miðvikudag 21. janúar  kl. 19
• 6. umferð föstudag      23. janúar  kl. 19
• 7. umferð sunnudag    25. janúar  kl. 14
• 8. umferð miðvikudag 28. janúar  kl. 19
• 9. umferð föstudag      30. janúar  kl. 19

Skákþingið er reiknað til alþjóðlegra skákstiga.

Skráning fer fram á [e-mail] og í síma 895-5860 (Ólafur).

Hraðskákmót Reykjavíkur verður haldið sunnudaginn 1. febrúar og hefst það kl. 14.00. Tefldar verða 2x7 umferðir eftir Monradkerfi.

Íslandsmót barna fer fram á laugardag

Íslandsmót barna í skák 2009 verður haldið laugardaginn 10. janúar nk.  Öll börn 10 ára og yngri (fædd 1998 og síðar) geta verið með á mótinu.  Tefldar verða 8 umferðir, umhugsunartími 15. mín. á skák fyrir hvern keppenda. 

Mótið verður haldið í  Faxafeni 12 og hefst kl. 13.00.  Skráning:  [e-mail] - sími 568 9141 kl. 10-13 virka daga. Þátttökugjöld eru kr. 500.-

Veglegur bikar er fyrir sigurvegara mótsins og verðlaun veitt fyrir þrjú efstu sætin.  Sérstök verðlaun verða veitt þrem efstu stúlkunum í mótinu (ef a.m.k. 10 stúlkur taka þátt) og hlýtur sú efsta titilinn "Íslandsmeistari telpna 2009."  Einnig verður sigurvegurum í  hverjum aldursflokki fædd 1999 og síðar veitt sérstök verðlaun. 

Mótið er einnig úrtökumót vegna Norðurlandamóts í skólaskák - einstaklingskeppni 2009 sem fram fer í Færeyjum dagana 12. - 15. febrúar nk. og gefur tvö sæti á því móti.

Hjörvar Steinn sigraði á atkvöldi Hellis

Hjörvar Steinn Grétarsson vann öruggan sigur á Atkvöldi Hellis sem fram fór í kvöld í Hellisheimilinu.  Hjörvar hlaut 5½ vinning, leyfði aðeins jafntefli í lokaumferðinni við Þorvarð Fannar Ólafsson.  Lengi vel var Ingi Tandri Traustason eini maður sem hélt í Hjörvar en Tandri töfraði hvern vinninginn fram að öðrum á síðustu sekúndunum og lagði m.a. Þorvarð og Kristján Eðvarðsson að velli í atskákunum.   Tandri varð í 2.-5. sæti með 4 vinninga ásamt Þorvarði, Gunnar Björnssyni og Erni Stefánssyni.

Lokastaðan:

1. Hjörvar Steinn Grétarsson 5½ v. af 6
2.-5. Ingi Tandri Traustason, Þorvarður Fannar Ólafsson, Gunnar Björnsson og Örn Stefánsson 4 v.
6.-7. Kristján Eðvarðsson og Rúnar Berg 3½ v.
8.-11. Magnús Matthíasson, Birkir Karl Sigurðsson, Páll Andrason og Vigfús Ó. Vigfússon 3 v.
12. Eiríkur Björnsson 2½ v.
13.-14. Björgvin Kristbergsson og Brynjar Steingrímsson 2 v.
15. Pétur Jóhannesson 1 v.

Guðmundur tapaði fyrir Hebden

FIDE-meistarinn Guðmundur Kjartansson (2365) tapaði fyrir enska stórmeistaranum Mark Hebden (2515) í níundu og síðustu umferð Hastings-mótsins, sem fram fór í dag.  Guðmundur hlaut 5½ vinning og endaði í 14.-28. sæti.

Frammistaða Guðmundar samsvaraði 2369 skákstigum og hækkar hann um 15 stig. 

Guðmundur heldur nú til Prag þar sem hann tekur þátt í Prag Open, sem hefst 9. febrúar .   

Rúmlega 100 skákmenn tóku þátt í aðalmótinu og þar af 13 stórmeistarar.   Guðmundur var u.þ.b. nr. 60 í stigaröðinni.  

• Heimasíða mótsins

Páll fékk 4 vinninga í Stokkhólmi

Páll Sigurðsson (1867) fékk 4 vinninga af 9 mögulegum í b-flokki Rilton Cup,  sem lauk í Stokkhólmi í dag.  Svanberg Már Pálsson (1750) fékk 3½ vinning.  Árangur Páls samsvaraði 1880 skákstigum og árangur Svanberg samsvaraði 1790 stigum svo þeir gætu hækkað lítilsháttar báðir á stigum. 

Sóley Lind Pálsdóttir, sem tefldi í c-flokki, hlaut 1½ vinning af 7 mögulegum.

Í aðalmótinu sigruðu pólski stórmeistarinn Radoslaw Wojtaszek (2599) og þýski alþjóðlegi meistarinn Sebastion Bogner (2448) en þeir hlutu 7 vinninga.  Í 3.-6. sæti urðu stórmeistararnir, Yuiry Kuzubov (2622), Úkraínu, David Berczes (2514), Ungverjalandi, Evgeny Gleizerov (2545), Rússlandi og loks fulltrúi heimamanna, sænska skákdrottningin, Pia Cramling (2550).

Heimasíða mótsins