Skák.is

Færsluflokkur: Spil og leikir

16.6.2017 | 12:33

Teflið við Íslandsmeistarann á 17. júní

Í tilefni af Þjóðhátíðardeginum stendur Skákakademía Reykjavíkur fyrir skákviðburði í Hljómskálagarðinum. Þar gefst gestum og gangandi tækifæri á að tefla við Íslandsmeistarann sjálfan Guðmundur Kjartansson. Á staðnum verða einnig nokkur töfl svo hægt verða að setjast niður og taka nokkrar skákir ef menn leggja ekki í Guðmund.

Taflið fer fram frá 14:30 - 16:30 í Hljómskálagarðinum.

Spil og leikir | Slóð | Facebook | Athugasemdir (0)

16.6.2017 | 12:14

Íslandsmót kvenna hefst 16. ágúst

Íslandsmót kvenna hefst mánudaginn 16. ágúst í húsnæði Skáksambands Íslands, Faxafeni 12, Reykjavík. Teflt verður í einum flokki, þ.e. mótið opið öllum konum/stúlkum.

Fyrirkomulag: Verður endanlega ákveðið þegar fjöldi keppenda liggur fyrir.

Þátttökugjöld: Engin.

Umferðarfjöldi: 5-7 umferðir eftir fjölda keppenda.

Tímamörk: 90 mín. + 30 sek. á leik auk 15 mínútna eftir 40 leiki.

Dagskrá:

1. umferð, miðvikudaginn, 16. ágúst kl. 19:30
2. umferð, föstudaginn, 18. ágúst, kl. 19:30
3. umferð, mánudaginn, 21. ágúst kl. 19:30
4. umferð, miðvikudaginn, 23. ágúst kl. 19:30
5. umferð, föstudaginn, 25. ágúst, kl. 19:30
6. umferð, mánudaginn, 28. ágúst, kl. 19:30
7. umferð, miðvikudaginn, 30 ágúst, kl. 19:30

Verðlaun:

75.000.-
45.000.-
30.000.-

Skráning fer fram hér á Skák.is (guli kassinn efst).

Upplýsingar um þegar skráða keppendur má finna hér.

Spil og leikir | Breytt s.d. kl. 12:31 | Slóð | Facebook | Athugasemdir (0)

16.6.2017 | 08:40

Aronian efstur fyrir lokaumferðina - loks vann Carlsen

Levon Aronian (2793) hefur hálfs vinnings forskot fyrir níundu og síðustu umferð Altibox Norway Chess mótsins sem fram fer í dag. Aronian gerði í gær jafntefli við Vishy Anand (2786). Aronian hefur 5,5 vinninga, Hikaru Nakamura (2785) er annar með 5 vinning og Anish Giri (2771) þriðji með 4,5 vinninga.

Magnus Carlsen (2832) vann langþráðan sigur í gær þegar hann lagði Sergey Karjakin (2781) að velli og var mjög létt að skák lokinni. MVL (2796) vann einnig sína fyrstu skák með sigri á Vladimir Kramnik (2808). Eftir gærdaginn hefur Carlsen 13 stiga forskot á Wesley So á lifandi stigalistanum og heldur væntanlega toppsætinu sem hann hefur haldið frá í júlí 2011.

Níunda og síðasta umferð fer fram í dag. Carlsen teflir við Anand, Aronian mætir Wesley So (2812), Nakamura sest á móti landa sínum Caruana (2808) og andstæðingur Giri verður Kramnik (2808).

Ítarlega umfjöllun um gærdaginn má finna á Chess.com.

Heimasíða mótsins
Beinar útsendingar (hefjast kl. 14)

Spil og leikir | Slóð | Facebook | Athugasemdir (0)

16.6.2017 | 08:11

Mikið fjör í Sumarskóla Taflfélags Reykjavíkur

Sumarskóli Taflfélags Reykjavíkur hófst á ný síðastliðinn mánudag og hefur skáksalurinn iðað af lífi alla vikuna. Sumarskólinn er nú starfræktur annað árið í röð og sem fyrr er það alþjóðlegi meistarinn Bragi Þorfinnsson sem slær taktinn. Þátttaka hefur aukist verulega frá því sem var í fyrra og er það mikið gleðiefni að sjá hve mikinn áhuga börnin hafa á því að sitja við taflborð á sumrin, meira að segja þegar sólin skín.

Bragi miðar kennsluna að ólíkum þörfum barnanna og því fá þau öll viðfangsefni við sitt hæfi. Síðustu daga hefur sést til barnanna dunda sér við að búa til stórbrotnar samhverfur á taflborðinu, þau hafa teflt í hópum ýmis afbrigði af skák líkt og “Heili og Hönd” og “Tvískák”, þau sitja stuttar kennslustundir þar sem Bragi varpar kennsluefni á vegginn og þau sem eru lengra komin í skáklistinni hafa glímt við allskyns flókin verkefni.

Næstu námskeið hefjast næstkomandi mánudag og má nálgast upplýsingar um þau hér: Sumarskóli TR

Nánar á heimasíðu TR.

Spil og leikir | Slóð | Facebook | Athugasemdir (0)

15.6.2017 | 09:08

Aronian á sigurbraut - Carlsen tapaði fyrir Kramnik

Levon Aronian (2793) er í banastuði á Altibox Norway Chess-mótinu. Í sjöundu umferð, sem fram fór í gær, vann hann Sergei Karjakin (2781) í vel tefldri skák. Armenninn viðkunnanlegi er efstur á mótinu með 5 vinninga. Hikaru Nakamura (2785) er annar með 4,5 vinninga.

Vladimir Kramnik (2808) vann Magnus Carlsen (2832) í gær og er í 3.-4. sæti með 4 vinninga ásamt Anish Giri (2771) sem lagði MVL (2796) að velli. Carlsen tefldi ósannfærandi og er neðstur með 2,5 vinninga ásamt MVL. Heimsmeistarinn hefur ekki unnið skák og verði það niðurstaðan verður það í fyrsta skipti í 10 ár sem það gerist en það gerðist síðast í Dortmund 2007.

Heimsmeistarinn var ekki glaður í gær og mætti ekki í fjölmiðlaviðtöl.

Árið 2017 hefur ekki reynst heimsmeistaranum og bendir landi hans, Tarjei Svensen á eftirfarandi staðreynd.

Carlsen's performance after 27 games (+5 =19 -3) in 2017 is now 2776. That's his lowest performance since 2007 (2726). #NorwayChess
— Tarjei J. Svensen (@TarjeiJS) June 14, 2017

Carlsen hefur nú aðeins 4,4 skákstigaforskot á Kramnik á lifandi stigalistanum og skyndilega er það möguleiki að hann missi toppsætið sem hefur verið hans síðan í júlí 2011.

Áttunda og næstsíðasta umferð fer fram í dag. Carlsen teflir við Karjakin, Aronian mætir Anand (2786) og andstæðingur Nakamura er landi hans Wesley So (2812).

Ítarlega umfjöllun um gærdaginn má finna á Chess.com.

Heimasíða mótsins
Beinar útsendingar (hefjast kl. 14)

Spil og leikir | Slóð | Facebook | Athugasemdir (0)

14.6.2017 | 12:00

Hannes með 3 vinninga eftir 4 umferðir í Teplice

Stórmeistarinn Hannes Hlífar Stefánsson (2548) hefur 3 vinninga að loknum fjórum umferðum á alþjóðlega mótinu í Teplice í Tékklandi. Hannes vann tvo heimamenn (2197-2323) í 3. og 4. umferð en tapaði fyrir öðrum heimamanninni (2236) í annarri umferð.

Í fimmtu umferð, sem fram fer í dag, teflir hann við fimmta Tékkann í jafnmörgum umferðum. Andstæðingur dagsins er FIDE-meistarinn Jan Rubes (2323). Umferðin hefst kl. 14 og verður Hannes í beinni.

166 skákmenn frá 26 löndum taka þátt í mótinu. Þar af eru 14 stórmeistarar. Hannes er nr. 11 í stigaröð keppenda.

Spil og leikir | Breytt s.d. kl. 08:46 | Slóð | Facebook | Athugasemdir (0)

14.6.2017 | 08:20

Hilmir Freyr sigraði á hraðkvöldi

Hilmir Freyr Heimisson og Örn Leó Jóhannsson voru efsti og jafnir í lok hraðkvölds Hugins með 7v af átta mögulegum. Þeir gerðu jafntefli í innbyrðis viðureign í fjórðu umferð. Þá var Örn Leó búinn að gera jafntefli við Óskar Víking Davíðsson í annarri umferð svo Hilmir Freyr var búinn að vera í forystu frá upphafi. Hann hélt henni alveg fram í síðustu umferð þegar hann mætti Atla Jóhanni Leóssyni. Þeirri skák lauk með jafntefli eftir langa baráttu með jafntefli en Atli Jóhann átti kannski um tíma möguleika á einhverju meiru. Þar með voru Hilmir Freyr og Örn Leó jafnir. Þeir tefldi við nánast sömu andstæðinga nema Hilmir Freyr tefldi við Stefán Orra Davíðsson en Örn Leó við Gunnar Nikulásson. Þeir Stefán Orri og Gunnar fengu báðir 4,5v og Hilmir Freyr og Örn Leó þar með jafnir að stigum þangað til kom í þriðja stigaútreikning. Þar skipti sköpum að Örn Leó gerði jafntefli við Óskar Víking sem fékk fleiri vinninga en Ali Jóhann. Þar með náði Hilmir Freyr fyrsta sætinu í þriðja útreikningi.en Örn Leó þurfi að sætta sig við annað sætið. Þriðji varð svo Vigfús Ó. Vigfússon með 5,5v.

Hilmir Freyr dró Gunnar Nikulásson í happdrættinu. Gunnar valdi úttekt frá Saffran en Hilmir Freyr valdi pizzumiða frá Dominos. Það verður gert hlé á þessum skákköldum í sumar en þau byrja að nýju í haust.

Lokastaðan á hraðkvöldinu:

Hilmir Freyr Heimisson, 7v/8
Örn Leó Jóhannsson, 7v
Vigfús Ó. Vigfússon, 5,5v
Eiríkur Björnsson,5v
Stefán Orri Davíðsson, 4,5v
Gunnar Nikulásson, 4,5v
Óskar Víkingur Davíðsson, 4v
Halldór Pálsson, 3v
Sigurður Freyr Jónatansson, 3v
Atli Jóhann Leósson, 2,5v
Björgvin Kristbergsson, 0,5v
Pétur Jóhannesson, 0,5v

Úrslitin í Chess-Results.

Spil og leikir | Slóð | Facebook | Athugasemdir (0)

13.6.2017 | 20:00

Baccalá bar mótið 2017

Hið glæsilega Baccalá bar mót var fyrst haldið fyrir ári síðan og verður nú endurtekið. Fyrirkomulag hið sama og áður, en verðlaun hafa hækkað og eru nú sérlega vegleg.

Hér kemur auglýsing fyrir mótið:

Veitingastaðurinn Baccalá Bar og Ektafiskur á Hauganesi standa fyrir hraðskákmóti föstudaginn 11. ágúst nk.

Mótið fer fram á veitingastaðnum og hefst kl. 15.00 stundvíslega
Tefldar verða 11 umferðir með 7 mínútna umhugsunartíma. Mótið verður reiknað til alþjóðlegra hraðskákstiga.

Öllum er heimil þátttaka, en hámarksfjöldi keppenda er 30.

Verðlaunafé er samtals 150.000 kr. og skiptist sem hér segir:

                    1. verðlaun kr. 50.000
                    2. verðlaun kr. 30.000
                    3. verðlaun kr. 20.000
                    4. verðlaun kr. 10.000
5.-12. verðlaun kr. 5.000

Gert verður stutt hlé á mótinu svo keppendur geti gætt sér Fiskidagssúpu í boði mótshaldara.

Skráning á skak.is. Þeir 25 sem skrá sig fyrst fá rétt til þátttöku; aðrir fara á biðlista. Mótshaldarar taka frá fimm boðsæti, en hámarksfjöldi þátttakenda er 30 eins og áður sagði.

Þeir Ingimar Jónsson (ingimarj@ismennt.is) og Áskell Örn Kárason (askell@simnet.is), svara fyrirspurnum um mótið.

****

Vakin er athygli á að föstudagskvöldið 11. ágúst er súpukvöld á Dalvík í upphafi Fiskidagsins mikla og því tilvalið að skerpa matarlystina með nokkrum bröndóttum á skákborðinu. Hauganes er í u.þ.b. 10 mínútna akstursfjarlægð frá Dalvík.

Á Hauganesi er tjaldsvæði með snyrtingum og rafmagni.

Spil og leikir | Breytt s.d. kl. 16:37 | Slóð | Facebook | Athugasemdir (0)

13.6.2017 | 16:24

Skákir Meistaramóts Skákskóla Íslands

Skákir Meistaramóts Skákskóla Íslands frá því í maílok eru nú aðgengilegar. Það var Lenka Ptácníková sem sló þær inn.

Veljið skák (59 alls):

Veljið skák (18 alls):

Spil og leikir | Breytt 14.6.2017 kl. 08:25 | Slóð | Facebook | Athugasemdir (0)

13.6.2017 | 08:39

Aronian vann Kramnik - efstur ásamt Nakamura

Levon Aronian (2793) er sjóðheitur á Altibox Norway Chess-mótinu í Stafangri. Í gær vann hann Vladimir Kramnik (2808) eftir að hafa lokað drottningu hins síðarnefnda inni. Hefur nú unnið tvo heimsmeistara á áþekkan hátt. Aronian er nú efstur ásamt Nakamura (2785). Þeir hafa vinningsforskot á næstu menn. Carlsen (2832) gerði jafntefli við Maxime Vachier-Lagrave (2796) og hefur enn ekki unnið skák á mótinu. Heimsmeistarinn er neðstur ásamt þremur öðrum.

Staðan: