Boðsmót í skák í Kringlunni á morgun í tilefni Ólympíuskákmótsins

Ólympíuskákmótið fer fram í Khanty Mansiysk í Síberíu í Rússlandi, dagana 21. september - 3. október nk.  Ísland sendir venju samkvæmt lið bæði í opinn flokk sem og kvennaflokk.   

Íslensk skákhreyfing ætlar í tilefni þess að standa fyrir Boðsmóti í skák við Blómatorgið Kringlunni föstudaginn 17. september á milli 17 og 19.  Þar taka þátt allir liðsmenn beggja liða auk þess sem
gamlar Ólympíukempur eins og Jóhann Hjartarson og Jón L. Árnason verða meðal keppenda.  Friðrik Ólafsson, sem á ekki heimangengt þar sem hann er staddur í Portoroz í Slóveníu, þar sem hann náði eftirminnilegum árangri árið 1958, sendir íslensku liðunum sínar bestur kveðjur.   

Meðal annarra boðsgesta má nefna meðlimi Norðurlandameistara framhaldsskóla, MR, og Norðurlandameisturum barnaskólasveita, Rimaskóla sem og meðlimi silfursveita Salaskóla á NM grunnskólasveita.

Landslið Íslands fyrir Ólympíumótið í skák skipa:

Opinn flokkur:

• Hannes Hlífar Stefánsson, stórmeistari í skák
• Héðinn Steingrímsson, stórmeistari í skák
• Bragi Þorfinnsson, alþjóðlegur meistari í skák
• Björn Þorfinnsson, alþjóðlegur meistari í skák
• Hjörvar Steinn Grétarsson

Liðsstjóri er Helgi Ólafsson, stórmeistari í skák og skólastjóri Skákskóla Íslands.

Kvennaflokkur:

• Lenka Ptácníková, stórmeistari kvenna í skák
• Hallgerður Helga Þorsteinsdóttir
• Sigurlaug R. Friðþjófsdóttir
• Tinna Kristín Finnbogadóttir
• Jóhanna Björg Jóhannsdóttir

Liðsstjóri er Davíð Ólafsson, FIDE-meistari og kennari við Skákskóla Íslands.

Fararstjóri er Gunnar Björnsson, forseti Skáksambands Íslands sem jafnframt verður fulltrúi á fundi FIDE, alþjóðlega skáksambandsins.

Skákáhugamenn eru hvattir til að fjölmenna í Kringluna og styðja á bakvið íslensku skáklandsliðin.

Meistaramót SSON hófst í gær - Magnús formaður

Meistaramót SSON hófst í gærkveldi með fyrstu umferð.   Alls taka níu skákmenn þátt í mótinu sem framhaldið verður næstu miðvikudagskvöld en tefldar verða hverju sinni tvær skákir (61 mín á mann).

Í gær var einnig haldinn aðalfundur félagsins.  Magnús Matthíasson er formaður félagsins.

Stjórn SSON:

Formaður:  Magnús Matthíasson
Ritari:  Magnús Garðarsson
Gjaldkeri:  Ingimundur Sigurmundsson
Meðhjálpari:  Úlfhéðinn Sigurmundsson
Meðhjálpari:  Erlingur Jensson

Úrslit 1. umferðar:

Name	Rtg	Res.	Name	Rtg
Erlingur Atli Pálmarsson	1425	0  -  1	Ingvar Örn Birgisson	1820
Ingimundur Sigurmundsson	1775	1  -  0	Grantas Grigorianas	1740
Magnús Matthíasson	1670	½  -  ½	Magnús Gunnarsson	1990
Magnús Garðarsson	1465	0  -  1	Erlingur Jensson	1690
Úlfhéðinn Sigurmundsson	1785		Bye	0

Heimasíða SSON

 

Fimmtudagsmót T.R. hefjast í kvöld eftir sumarfrí

Fimmtudagsmót T.R. hefjast á ný í kvöld kl. 19.30.  Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12, og opnar húsið kl. 19.10.  Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

 

Æfingar skákdeildar Fjölnis hefjast á laugardaginn

Vikulegar skákæfingar Skákdeildar Fjölnis fyrir börn og unglinga hefjast næsta laugardag 18. september og verða þær framvegis alla laugardaga í vetur frá kl. 11:00 - 12:40. Æfingarnar eru í Rimaskóla og er gengið inn um íþróttahús skólans. Meðal þátttakenda á fyrstu æfingunni verða Norðurlandameistarnir úr Rimaskóla sem allir hafa æft með Fjölni síðastliðin ár.

Áhugasöm börn í Grafarvogi og annars staðar frá eru hvött til að nýta sér þessar skákæfingar Fjölnis sem eru ókeypis. Nauðsynlegt er að foreldrar yngstu barna fylgi þeim á æfingarnar frá kl. 11:00 - 12:00. Reynt er að hafa æfingarnar fjölbreyttar og skemmtilegar, kennsla og skákmót til skiptis. Skákdeild Fjölnis er í samstarfi við Skákakademíu Reykjavíkur sem leggur deildinni til leiðbeinendur fyrir smærri hópa. Skákdeild Fjölnis heldur líkt og fyrri ár vegleg skákmót í vetur svo sem Torgmót Fjölnis, páskaeggjaskákmót og sumarskákmót Fjölnis í kringum sumardaginn fyrsta. Umsjón með skákæfingum Fjölnis í vetur hefur Helgi Árnason formaður skákdeildarinnar.

 

TR og Hellir mætast í úrslitum Hraðskákkeppni taflfélaga í kvöld

Taflfélag Reykjavíkur og Taflfélagið Hellir mætast í úrslitum Hraðskákkeppni taflfélaga í kvöld.  Viðureingin fer fram í TR og hefst kl. 19:30 og eru áhorfendur hvattir til að fjölmenna og sjá marga af sterkustu hraðskákmönnum landsins sitja að tafli.  Félögin eru þau langsigursælustu í 15 ára sögu keppninnar og hvort félag hefur sigrað í keppninni sex sinnum. Sigurveginn í kvöld verður því sigursælasta liðið í sögu keppninnar.   

TR lagði Taflfélag Vestmannaeyja, Skákfélag Íslands og Hauka á leið sinni í úrslit en Hellir lagði Taflfélag Akraness, Máta og Íslandsmeistara Bolvíkinga með minnsta mun í æsispennandi viðureign.

Sigurvegarar frá upphafi:

• 1995: Taflfélag Reykjavíkur
• 1996: Taflfélagið Hellir
• 1997: Taflfélag Reykjavíkur
• 1998: Taflfélagið Hellir
• 1999: Skákfélag Hafnarfjarðar
• 2000: Taflfélagið Hellir
• 2001: Taflfélagið Hellir
• 2002: Taflfélagið Hellir
• 2003: Skákfélagið Hrókurinn
• 2004: Taflfélag Reykjavíkur
• 2005: Taflfélagið Hellir
• 2006: Taflfélag Reykjavíkur
• 2007: Taflfélag Reykjavíkur
• 2008: Taflfélag Reykjavíkur
• 2009: Taflfélag Bolungarvíkur

Gunnar sigraði á Hraðkvöldi Hellis

Gunnar Björnsson sigraði á hraðkvöldi Hellis sem fram fór 13. september sl. Gunnar fékk 6 vinninga í sjö skákum og tapaði ekki skák en gerð tvö jafntefli við næstu menn. Í öðru sæti varð Örn Leó Jóhannsson með 5,5 vinning og þriðji Vigfús Ó. Vigfússon með 4,5 vinning.  Í lokin dró svo Gunnar í happdrættinu og  hlaut Brynjar pizzuna en Atli og Estanislao gengu út  klyfjaðir grænmeti.

Lokastaðan á hraðkvöldinu:

• 1.    Gunnar Björnsson                6v/7
• 2.    Örn Leó Jóhannsson            5,5v
• 3.    Vigfús Ó. Vigfússon              4,5v
• 4.    Jón Úlfljótsson                      4v
• 5.    Elsa María Kristínardóttir      4v
• 6.    Gunnar Nikulásson               4v
• 7.    Atli Antonsson                      4v
• 8.    Rafn Jónsson                        3,5v
• 9.    Kristinn Andri Kristinsson      3,5v
• 10.  Dawid Kolka                          3v
• 11.  Brynjar Steingrímsson           2,5v
• 12.  Gauti Páll Jónsson                 2,5v
• 13.  Estanislao Plantada Siurans 1v
• 14.  Björgvin Kristbergsson          1v

Norðurlandameistarar MR

Það barst loks mynd af Norðurlandameisturum Menntaskólans í Reykjavík sem urðu Norðurlandameistarar annað árið í röð í Puru í Finnlandi um síðustu helgi. 

Sigurður Páll í KR

Sigurður Páll Steindórsson (2222) hefur gengið til liðs við Skákdeild KR úr Taflfélagi Reykjavíkur.  

Hinir fornu Lewis taflmenn taldir geta verið íslenskir

Eftir heimsókn Guðmundar G. Þórarinssonar og viðræður hans við fræðimenn Breska þjóðminjasafnsins á föstudag útiloka þeir ekki að þessir merku gripir og fornminjar geti verið af íslenskum uppruna. 

Í gær var haldin málstefna um Lewis taflmennina  í Skoska þjóðminjasafninu í Edinborg þar sem nú stendur yfir sýning helguð þeim.  Þar kynnti Guðmundur kenningu sína við góðar undirtektir.  Þar var miklu lofsorði lokið á íslenskar gullaldarbókmenntir hjá öðrum fyrirlesurum og sagt að skoða mætti þessa fornu taflmenn í ljósi Íslendingasagnanna,  hvort tveggja væri ómetanlegt fyrir Norður-Evrópska menningu.

Þeir fræðimenn svo sem Dr. David Caldwell og Dr. Alex Woolf sem höfðu gefið lítið fyrir kenningu Guðmundar fyrirfram gáfu þar mjög eftir og viðurkenndu að hann hefði mikið til síns máls og þökkuðu framlag hans til umræðunnar um uppruna þessara merku muna. 

Óhætt er að segja að eftir þessa fundi og kynningu sé nú almennt viðkennt meðal þeirra sem gerst þekkja að eins líklegt sé að Lewis list- og taflgripirnir séu íslenskir að uppruna en ekki gerðir í Þrándheimi eins og hingað til hefur verið haldið fram.  Má því vænta þess að kynning þeirra muni taka mið af því hér eftir.

Mikil umfjöllun hefur verið um þessa athyglisverðu og nýstárlegu kenningu Guðmundar í alþjóðlegum fjölmiðlum síðustu daga, svo sem í The New York Times, The Scotsman og Daily Telagraph hér í Bretlandi, fyrir málstefnuna og nú er yfirgripsmikill frétt á ChessBase.com um þetta efni.

Í The Scotsman staðfestir talsmaður the British Museum það sem fram kemur hér að ofan um að hugsanlegt sé að taflmennirnir séu íslenskir, enda þótt annað hafi hingað til verið talið líklegra.

Þá  eru Lewis listmunirnir sagðir vera merkustu taflmenn sögunnar og eru meira að segja nú taldir meðal 5 mikilvægustu fornleifa í eigu British Musemum/Breska Þjóðminjasafnsins og kennir þar þó margra grasa.

Athygli vekur að á forsíðu leiðarvísis British Museum um taflmennina trónir mynd af "berserknum", staðgengli hróksins, sem sýnir hvað þessum fornu munum er gert þar hátt undir höfði.  Samkvæmt kenningu Guðmundar telur hannað þeir hafi verið skornir út úr rostungstönnum af Margréti hinni högu í Skálholti 1180-1200 í smiðju Páls Jónssonar biskups.

Sjá nánar á www.leit.is/lewis

Tengill á greinarnar í The Scotsman og the Telegraph ofl.

Myndaalbúm (ESE)

Hraðkvöld hjá Helli í kvöld

Taflfélagið Hellir heldur hraðkvöld mánudaginn 13. september og hefst mótið kl. 20:00. Tefldar verða 7 umferðir með sjö mínútna umhugsunartíma.  Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Í tilefni af því að nú er uppskerutími í grænmetisgörðum landsmanna og uppskeran í garði formanns Hellis er með afbrigðum góð verða dregin út tvenn aukaverðlaun úr garðinum.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).