Skákþing Norðlendinga

Skákþing Norðlendinga verður haldið í Íþróttahöllinni á Akureyri helgina 12.-14. júní nk. Tefldar verða 4 umferðir með atskákfyrirkomulagi á föstudagskvöldi. Tvær kappskákir á laugardegi og ein á sunnudegi. Að loknu skákmótinu verður haldið Hraðskákmót Norðlendinga.

Dagskrá:

Tefldar verða sjö umferðir eftir Monrad-kerfi.

Mótið hefst kl. 20.00 á föstudagskvöld með 25 mínútna skákum í 1. - 4. umferð.

Tímamörk í 5. -7. umferð eru 90 mínútur + 30 sekúndur viðbótartíma á hvern leik.

 Laugardagur 13. júní.  5. umferð kl. 11.00.    6. umferð. kl. 17.00.

 Sunnudagur  14. júní.  7. umferð kl. 10.00 

Hraðskákmót Norðlendinga hefst kl. 15.00 á sunnudag, að því loknu er verðlaunaafhending og mótsslit.

Keppnisgjald kr. 2000.-         Veitt verða þrenn verðlaun fyrir þrjú efstu sætin, verðlaunagripir + farandbikar.

Skráning eigi síðar en á fimmtudag 11. júní  í netfangið [e-mail]    Uppfærður keppendalisti verður nánast daglega á heimasíðu félagsins skakfelag.muna.is  

Skákþing Norðlendinga hefur verið haldið árlega frá árinu 1935, og er mótið því í 75 skipti.  Eftirtaldir hafa unnið titilinn oftast. Gylfi Þórhallsson og Rúnar Sigurpálsson sjö sinnum, Jón Þorsteinsson, Jónas Halldórsson og Júlíus Bogason fimm sinnum.  Núverandi skákmeistari er Stefán Bergsson.

Ulker Gasanova hefur orðið oftast skákmeistari kvenna, fimm sinnum, Sveinfríður Halldórsdóttir og Þorbjörg Lilja Þórsdóttir 4. sinnum.  Arnfríður Friðriksdóttir og Anna Kristín Þórhallsdóttir þrisvar sinnum. Núverandi skákmeistari kvenna er Ulker Gasanova.

Rúnar Sigurpálsson hefur  langoftast orðið hraðskákmeistari Norðlendinga eða alls tólf sinnum. Áskell Örn Kárason hefur síðustu tvö ár unnið titilinn.

Guðmundur tapaði í fjórðu umferð

FIDE-meistarinn Guðmundur Kjartansson (2388) tapaði fyrir ungverska meistaranum Pal Petran (2361) í fjórðu umferð AM-flokks First Saturday-mótsins.  Guðmundur hefur 3 vinninga.  

Í AM-flokknum, sem Guðmundur teflir í, taka 6 skákmenn þátt og tefld er tvöföld umferð.   Meðalstig eru 2281 skákstig og til að ná áfanga þarf 7,5 vinning í 10 skákum.

Heimasíða mótsins

Sigurlaug Regína nýr formaður Taflfélags Reykjavíkur

Sigurlaug Regína Friðþjófsdóttir var í gær kjörin formaður Taflfélags Reykjavíkur á aðalfundi félagsins.  Óttar Felix Hauksson var kjörinn varaformaður.

Aðrir meðstjórnendur voru kjörnir: Júlíus L. Friðjónsson, Ólafur S. Ásgrímsson, Magnús Kristinsson, Eiríkur K. Björnsson og Elín Guðjónsdóttir.

Í varastjórn sitja, í réttri röð: Björn Jónsson, Kristján Örn Elíasson, Þórir Benediktsson og Torfi Leósson.

Sigurlaug er önnur konan sem gegnir formennsku T.R. og leysir nú af hólmi formann síðustu fjögurra ára, Óttar Felix Hauksson.  Hún fetar þar með í fótspor föður síns, Friðþjófs Max Karlssonar, sem gegndi formennskunni á árunum 1981-1985.

Sigurlaug hefur verið viðloðandi íslenskt skáklíf alla sína tíð og hóf sinn feril á laugardagsæfingum T.R. árið 1975.  Hún hefur alla ávallt verið meðlimur í Taflfélagi Reykjavíkur og hefur sótt skákmót innanlands jafnt sem utan.  Hún varð Íslands- og Norðurlandameistari kvenna árið 1981 og hefur verið í landsliðshópi kvenna um árabil þar sem hún hefur meðal annars tekið þátt í fimm Ólympíumótum frá árinu 1980.

Sigurlaug hefur verið ötull baráttumaður barna- og unglingastarfs T.R. undanfarin ár og stefnir á að viðhalda þeim uppgangi sem þar hefur verið ásamt því að efla það mótahald sem félagið stendur fyrir ár hvert.

Meðstjórnendur Sigurlaugar óska henni til hamingju með formannskjörið og vonast eftir góðu samstarfi á nýju og spennandi starfsári.

Guðmundur byrjar frábærlega í Búdapest

FIDE-meistarinn Guðmundur Kjartansson (2388) sigraði austurríska skákmanninn Michael Binder (2184) í þriðju umferð AM-flokks First Saturday-mótsins, sem fram fór í gær.  Guðmundur hefur byrjað afskaplega vel og hefur fullt hús.  

Í AM-flokknum, sem Guðmundur teflir í , taka 6 skákmenn þátt og tefld er tvöföld umferð.   Meðalstig eru 2281 skákstig og til að ná áfanga þarf 7,5 vinning í 10 skákum.

Heimasíða mótsins.

Þröstur Þórhallsson úr TR

Stórmeistarinn Þröstur Þórhallsson (2442) hefur sagt skilið við Taflfélag Reykjavíkur.  Ekki liggur hvað Þröstur hyggst fyrir.

 

Short sigraði á Sigeman-mótinu

Enski stórmeistarinn Nigel Short (2674) vann stórsigur á Sigeman-mótinu, sem fram fór 3.-7. júní í Malmö í Svíþjóð.  Short, sem var í miklu stuði, fékk 4½ vinning í 5 skákum, leyfði aðeins eitt jafntefli gegn hinum sænska Tiger Hillarp Persson (2618).   Árangur hans samsvaraði 2974 skákstigum!  

Í 2. sæti varð ungi og efnilegi sænski alþjóðlegi meistari Nils Grandelius (2491) sem fékk 3 vinninga.  Árangur Grandelius, sem teflir með Eyjamönnum á Íslandsmóti skákfélaga nú í haust, er einstaklinga góður enda var hann um 120 lægri á stigum en næststigalæsti keppandinn.

Lokastaðan:

• 1. Short (2674) 4½ v. af 5
• 2. Grandelius (2491) 3 v.
• 3.-4. Nyback (2655) og Sokolov (2669) 2½ v.
• 5. Hillarp Persson (2618) 1½ v.
• 6. Berg (2610) 1 v.

Heimasíða mótsins

Guðmundur sigraði í 2. umferð í Búdapest

FIDE-meistarinn Guðmundur Kjartansson (2388) sigraði ungverska alþjóðlega meistarann Bela Lengyel (2268) í fyrstu umferð AM-flokks First Saturdays-mótsins, sem fram fór í gær í Búdapest í Ungverjalandi.

Í AM-flokknum, sem Guðmundur teflir í , taka 6 skákmenn þátt og tefld er tvöföld umferð.   Meðalstig eru 2281 skákstig og til að ná áfanga þarf 7,5 vinning í 10 skákum.

Heimasíða mótsins.

Aðalfundur TR í kvöld

Aðalfundur Taflfélags Reykjavíkur verður haldinn í kvöld mánudaginn 8. júní kl. 20 í húsnæði félagsins að Faxafeni 12.

Dagskrá fundarins er venjuleg aðalfundarstör

Hraðkvöld hjá Helli í kvöld

Taflfélagið Hellir heldur hraðkvöld mánudaginn 8. júní og hefst mótið kl. 20:00. Tefldar verða 7 umferðir með sjö mínútna umhugsunartíma.  

Sigurvegarinn fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þar sem um er að ræða síðasta hraðkvöld á vormisseri fá auk þess þeir þrír efstu sem ekki eiga bók Braga Halldórssonar um heimsbikarmót Stöðvar 2 þá bók. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Carlsen sigraði á Leon-mótinu

Norski undradrengurinn Magnus Carlsen (2770) sigraði Úkraínann Ivanchuk (2746) í úrslitaeinvígi þeirra á milli sem fram fór í dag í Leon á Spáni.  Jafnt var 2-2 eftir fjórar atskákir og enn var jafnt eftir 2 hraðskákir til viðbótar.  Carlsen hafði svo betur í bráðabanaskák og samtals 4-3.

 

Heimasíða mótsins