Gremjulegt tap fyrir Bandaríkjunum

Ekki fór alveg jafn vel gegn bandaríska liðinu í dag eins og ég hafði gert mér vonir um.

Daði vann reyndar góða skák í Drekaafbrigðinu í Sikileyjarvörn, rétt eins og í 4. umferð fyrr um daginn!  Þetta verður eflaust til að gleðja ritstjóra skak.is.

Ingvar tefldi á 1. borði í þessari umferð og virtist vera að vinna glæsilegan sigur þegar allt snerist skyndilega í höndunum á honum og Bandaríkjamaðurinn hafði sigur.  Sennilega missti Ingvar af sigri þarna einhvers staðar.

Á 3. borði tefldi Helgi þunga skák.  Hann var lengi peði undir, en andstæðingur hans náði ekki að komast neitt áfram og jafntefli varð niðurstaðan.

Matti lenti hinsvegar í vandræðum snemma í sinni skák og andstæðingur hans tefldi þar að auki vel.  Tapið reyndist ekki vera umflúið.

Úrslitin urðu því gremjulegt 1,5-2,5 tap.

Íslenska liðið er með 10 vinninga úr 20 skákum.

Ef til vill var það slæmur fyrirboði að við skyldum hitta bandaríska þjálfarann kl.07.00 um morguninn á líkamsræktarstöð hótelsins, en við höfum hafið alla morgna á snöggri líkamsrækt.

Torfi Leósson

Sigur í 4. umferð

Eftir útreiðina gegn Indverjum í gær voru menn ekkert yfir sig bjartsýnir fyrir viðureignina í morgun sem var gegn Malasíu.  Sveit Malasíu hafði m.a. náð 1,5 vinningi gegn Ungverjum, sem eru hæst skrifaðir á pappírunum.

 

En þetta fór þó frekar vel.  Daði átti góða skák í dag og vann örugglega á 3. borði.  Helgi vann sömuleiðis á 4. borði, en andstæðingur hans lék hratt, en ekki alltaf vel.

 Á 1. og 2. borði var róðurinn þyngri, en þar höfðu Malasíumenn einmitt náð 1,5 gegn Ungverjum.  Það fór líka svo gegn okkur.  Ingvar gerði jafntefli á 2. borði í skák þar sem báðir skiptust á að vera með aðeins betra.

Sverrir lenti hinsvegar í löngum og erfiðum svíðingi, sem lauk með sigri Malasíudrengsins.

 

Sem sagt: Ísland - Malasía 2,5-1,5.

 

Torfi Leósson

Stórsigur og stórtap í Singapore

Annar keppnisdagur á Ólympíumótinu hér í Singapore hófst með góðum sigri íslensku sveitarinnar á Zambíu í annarri umferð.

 

Leikar fóru 3-1 fyrir Ísland.

Sverrir og Ingvar unnu ótrúlega létt á 1. og 2. borði.  Matti vann sannfærandi á 4. borði en Helgi tapaði eftir að andstæðingur hans hafði séð lengra fram í tímann í taktískri stöðu.  Miðað við taflmennskuna grunar mig að Zambíumenn hafi stillt sínum besta manni upp á 3. borði, en það hef ég séð áður, t.d. hjá Hvít-Rússum á Evrópumóti skólasveita í fyrra.

Það þarf þó ekki að vera að neitt illt búi að baki.  Maður veit t.d. ekki hvernig aðstæður eru í Zambíu; kannski héldu þau úrtökumót fyrir sveitina þar sem tefldar voru 15 mínútna skákir.

 

Við vorum því í hæfilega góðu skapi þegar við mættum Indverjum í 3. umferð síðar um daginn.

Indverjarnir tefla stíft upp á sigur í þessu móti (en þeir hafa aldrei unnið það áður), en til þess að það gangi upp þarf yfirleitt hæfilegan skammt af heppni.

Segja má að þeir hafi tekið út úr þeim banka gegn okkur, því það féll fæst með okkur í dag.

Á 1. borði var andstæðingur Sverris byrjaður að leika kóngnum fram og til baka og átti lítinn tíma eftir.  Sverrir hefði sjálfsagt getað fengið jafntefli hefði hann viljað, en ákvað að reyna að gera eitthvað uppbyggilegt frekar.  Það virkaði hinsvegar ekki betur en svo en að hann lenti í allsvakalegri indverskri flugeldasýningu.  Merkilegt hvað Indverjinn var öruggur í taktíkinni, en hann lék flesta síðustu leikina sína eftir nokkurra sekúndna umhugsunartíma. 

Á 2. borði tapaði Ingvar eftir ónákvæma byrjunartaflmennsku, en hinsvegar hárnákvæma taflmennsku andstæðingsins og ekki mikið meira um það að segja.

Á 3. borði átti Daði hinsvegar hugsanlega vinning í endatafli - a.m.k. jafntefli.  Ég sá ekki nákvæmlega hvað gerðist, en eitthvað fór þetta í vitlausa átt hjá honum og tap var niðurstaðan.

 Á 4. borði tapaði Matti síðan eftir að hafa lent í taktík í stöðu sem ekki mikið virtist vera að gerast.  Síðan tapaði hann endatafli sem virtist þó bjóða upp á einhverja möguleika fyrir hann.

 

Sem sagt, verstu mögulegu úrslit 0-4

 

Torfi Leósson

Sigur í Singapore

Íslenska liðinu tókst að sigra lið Kínversku Taipei í 1. umferð hér á ólympíumótinu í Singapore.

Leikar fóru 3-1 fyrir Ísland.

Sverrir Þorgeirsson og Ingvar Ásbjörnsson sigruðu á 1. og 2. borði.  Daði Ómarsson tapaði á 3. borði og Helgi Brynjarsson vann á 4. borði. 

Á morgun fær íslenska sveitin Zambíu, sem sigraði Ástralíu b í 1. umferð, og þá tefla Sverrir, Ingvar, Helgi og Matthías Pétursson kemur inn í liðið á 4. borð. 

Ekki get ég séð önnur úrslit eins og er, upplýsingaflæðið er eitthvað hektískt svona til að byrja með.

Annars þjást menn hér mismikið af flugþreytu.  Ég vaknaði kl.02.30 í nótt og sofnaði ekki aftur fyrr en um sexleytið.  Átti svo í mestu basli með að halda mér vakandi yfir skákunum í dag.  Sverrir og Ingvar voru líka hálfdofnir og kenndu smá svima.  Þeim tókst þó að yfirspila andstæðinga sína í endatöflunum í dag.

Daði fékk hinsvegar upp flókna miðtaflsstöðu og átti sennilega sigur.  Hann hafnaði síðan þrátefli í framhaldinu og lenti að lokum í töpuðu endatafli.

Helgi stóð lengi til sigurs í sinni skák, en náði þó ekki að knésetja andstæðing sinn fyrir en eftir æsispennandi lokamínútur. 

Torfi Leósson

Elsa María og Tinna Kristín efstar á unglingalandsmótinu á Höfn

Tinna Kristín Finnbogadóttir, UMSB, og Elsa María Þorfinnsdóttir, ÍBR (Hellir) sigruðu í skákkeppni á 10. unglingalandsmóti UMFÍ á Höfn í Hornafirði, sem fram fór í Nýheimum, menningar-og fræðslumiðstöð staðarins í dag.

Alls tóku 17 börn og unglingar þátt í mótinu og tefldar voru 7 umferðir. Keppnin var jöfn og spennandi allt frá upphafi til enda.

Tinna og Elsa fengu sex vinninga og fast á hæla þeirra komu þau Páll Andrason UMSK og Sigríður Björg Helgadóttir Umf. Fjölni með 5 vinninga. Umsjón með mótinu hafði skákdeild Fjölnis og skákstjóri var Helgi Árnason. Davíð Kjartansson skákmeistari úr Fjölni mun tefla fjöltefli á landsmótinu í stóra tjaldinu á mótsvæðinu.

Lokastaða efstu manna:

1-2        Tinna Kristín Finnbogadóttir       UMSB               6  vinningar
             Elsa María Þorfinnsdóttir          ÍBR
 
3-4        Sigríður Björg Helgadóttir           Fjölni                5  vinningar
            Páll Andrason                           UMSK         
 
5-9        Davíð Þór Jónsson                    UMSK               4 vinningar
            Auður Eiðsdóttir                        UMSB
            Emil Sigurðsson                        HSK
            Hulda Rún Finnbogadóttir          UMSB
            Einar Bjarni Björnsson               USAH

Heimasíða unglingalandsmótsins

Sauðslakir í Singapore

"Free and easy" er frasi sem innfæddir hér í Singapore nota mikið, en að þessu komst ég í dag þegar ég hitti innlendan kunningja minn. Sennilega myndi þessi frasi útleggjast sem sauðslakir eða eitthvað því um líkt á hinu ylhýra. 

Dagurinn hjá okkur Matta og Ingvari hófst á því að Ingvar fór fram úr klukkan sex og byrjaði að stúdera, eins og sést á meðfylgjandi mynd.  Þetta hafði keðjuverkandi áhrif og stuttu síðar vorum við allir þrír farnir að stúdera. 

Að öðru leyti var dagurinn frekar "free and easy" - smávegis verslunarleiðangur en að öðru leyti lítið skipulagt. 

Mér sýnist að ég muni breyta nokkuð áherslum frá því í síðustu skákferð, þ.e. þegar ég fór með skáksveit Laugalækjarskóla til Póllands og Búlgaríu.  Þá var tíminn nokkuð vel skipulagður - ég sá eftirá að ég hefði getað skipulagt hann enn betur - og ágætum tíma var varið í stúderingar og að fara yfir skákirnar eftir mót.

Hér í Singapore verður sennilega meiri áhersla lögð  á að vera "free and easy".  Strákarnir hafa æft sig vel heima á Fróni undir mótið og mótið er þar að auki strangt - oft tvær skákir á dag.  Ég held að meira máli skipti að vera sæmilega úthvíldur og í góðu skapi.

Annars er hin liðin farin að drífa að.  Liðsstjóri Ástralanna er Íslandsvinurinn Ian Rogers.  Daði rakst á hann í dag og bað þá Rogers fyrir kveðju til vinar síns og Garðabæjarskákmógulsins Jóhanns H. Ragnarssonar.  Annars eru Ástralarnir með metnaðarfullt lið; sennilega fjórðu stigahæstu í mótinu.

Torfi Leósson

Íslenski hópurinn kominn til Singapore

Íslenska ólympíuliðið kom til Singapore í dag.  Einn af skipuleggjendum mótsins tók á móti okkur á flugvellinum og borgaði sjálfur fyrir leigubílana.  Gestrisni sem er ekki alltaf upp á teningunum í ferðum sem þessum! 

Hótelið okkar, Hotel Royal er afskaplega þægilegt.  Á morgun er frídagur og svo byrjar taflmennskan síðari partinn á sunnudaginn.  Allir reyna því að slappa vel af, því að flesta dagana eru tefldar tvær skákir á dag. 

Ég smellti einni mynd af hópnum inni á hótelinu. 

Torfi Leósson