Skák.is

Færsluflokkur: Íslenskar skákfréttir

26.4.2010 | 11:28

Skákbók fyrir augað

Bókadómur eftir Pétur Blöndal um bókina Teflt fyrir augað sem birtist í Morgunblaðinu 18. apríl sl.

BÆKUR - ***½Skákbók

Skákbók fyrir augað

Teflt fyrir augað

12 bestu skákir Sverris Norðfjörð. Óttar M. Norðfjörð ritstýrði. Sögur gefur út, 120 bls. kilja.

Það var hógvær 16 ára unglingur sem settist að tafli gegn Mikhail Tal í Austurbæjarskólanum 27. júlí árið 1957. Sverrir Norðfjörð skrifaði á skákskýrsluna að Tal væri stórmeistari, en hann sjálfur „lítill meistari". Þrjátíu skákir voru tefldar í fjölteflinu þennan dag og fór Tal með sigur af hólmi í 28 þeirra, en tveim lauk með jafntefli.

Önnur þeirra var viðureign stóra og litla, Tals og Sverris.

Frá þessu segir í snotru og skemmtilegu kveri, Teflt fyrir augað, 12 bestu skákum Sverris Norðfjörð, sem er nýkomin út hjá forlaginu Sögum.

Skipta má skákbókum í tvo flokka, annars vegar fræðilegar bækur fyrir keppnisskákmenn og hins vegar almennar bækur fyrir áhugafólk um skák. Teflt fyrir augað fellur í síðari flokkinn, stórfróðleg og lipurlega skrifuð bók um mann sem ekki var stórmeistari, en gat sér orð fyrir litríkan og sókndjarfan skákstíl. Það má segja að þetta sé uppreisn skákáhugamannsins - þarna fáum við minni spámennirnir smáhillupláss á meðal meistaranna.

Sverrir stendur alveg undir því.

Rithöfundurinn Óttar M. Norðfjörð ritstýrir bókinni, en Sverrir var faðir hans. Bókin er þó ekki alfarið hugmynd Óttars, því Sverrir hafði lengi ætlað að hrinda því í verk að gefa út bók með sínum bestu skákum.

Og þær máttu bara vera tólf.

Raunar var hann búinn að skrifa lista með ellefu skákum (listinn með rithendi Sverris er birtur í bókinni), en það vantaði tólftu skákina. Óttar fór því í gegnum allar skákir föður síns og valdi þá skák, sem honum fannst helst eiga erindi á listann.

En víkjum aftur að Mikhail Tal, sem er goðsögn í skákheiminum. Töframaðurinn frá Ríga, eins og hann var kallaður, var kominn á sigurbraut árið 1957 og varð heimsmeistari þremur árum síðar. Í bók um einvígið við Botvinnik, sem Tal skrifaði sjálfur og kom út hér á landi árið 1975, segir þýðandinn, Bragi Halldórsson, um þennan sókndjarfa skákmann:

„Skákstíll Tals er eiginlega tímaskekkja í skáksögunni. Leiftrandi sóknir Tals, sem hrifu flesta áhorfendur á hans band, voru oft og tíðum meira í anda rómantíska skeiðsins á nítjándu öld og minntu á löngu horfna snillinga eins og Morphy og Andersen. Oft var eins og frumkvöðlar varnartaflmennskunnar, Steinitz og Lasker, hefðu aldrei komið við sögu í skáklistinni þegar Tal stýrði liði sínu til vinnings með því að fórna hverjum manninum á fætur öðrum. Skákmeistarar nútímans stóðu uppi ráðþrota gegn þessum ósköpum."

Engu að síður náði unglingurinn Sverrir betri stöðu gegn Tal, sem gat talist lánsamur að ná jafntefli. Sverrir lét ekki þar við sitja, heldur vann Bobby Fischer í fjöltefli í Kaupmannahöfn árið 1962, og þurfti mannsfórn til! Þannig er ekki aðeins útgáfa bókarinnar uppreisn „litla meistarans", heldur einnig skákferill Sverris Norðfjörðs, sem velgdi tveim heimsmeisturum undir uggum.

Teflt fyrir augað er svo sannarlega bók fyrir augað.

Pétur Blöndal

Íslenskar skákfréttir | Slóð | Facebook | Athugasemdir (1)

26.4.2010 | 10:57

Berlínarslagur

Mikil gróska hefur verið í starfsemi Skákdeildar KR að undanförnu, mánudagsmenturnar vel sóttar og unglingastarfsemi í örum vexti. Á hverjum miðvikudegi er boðið upp á fríar skákæfingar fyrir krakka á grunnskóla aldri kl. 17:30 í skáksal KR-inga. Áhuginn virðist vera mikill því mætingin er jafnan mjög góð. Í síðustu viku mættu 25 krakkar galvaskir til leiks og þó hart væri barist var leikgleðin ríkjandi. Skákdeild KR er nú komin í hóp 8 sterkustu taflfélaga landsins og mun keppa í 1. deild í Íslandsmóti Skákfélaga á næsta keppnistímabili.

Snar þáttur í félagsstarfinu er að efla og rækta skáktengsl með heimsóknum og keppnum við aðra klúbba eins og nýlega við Garðbæinga. Skák(her)deildin hefur þegar herjað á Færeyjar, Skotland, Danmörk og jafnan haft sigur. Í næsta mánuði er fyrirhuguð herför til Berlínar, að lemja á þarlendum. Þessar ferðir hafa verið farnar ásamt mökum og hafa styrkt og eflt félagatengsl. Í Berlin verður att kappi i við Schach-club KREUZBERG einn virtasta skákklúbb borgarinnar.

Í hinum fríða flokki sem heldur utan til Þýzkalands eru eftirtaldir valinkunnir skákmenn úr KR ásamt nokkrum liðsmönnum úr vinaklúbbum: Andri V. Hrólfsson, Daði Guðmundsson, Einar S. Einarsson (liðstj.), Finnbogi Guðmundsson, Guðmundur Ingason, Gunnar Finnsson, Jónas Elíasson, Jón G. Friðjónsson, Jón Steinn Elíasson, Hálfdán Hermannsson, Kristinn Bjarnason, Kristján Stefánsson (form.), Leifur Eiríksson, Ólafur Gísli Jónsson, Páll G. Jónsson, Sæbjörn G. Larsen, Össur Kristinsson. Stefán Þormar Guðmundsson, Sigurður E. Kristjánsson, Sverrir Gunnarsson. Þá mun Andrés Fjeldsted, sem býr ytra telfa með liðinu.

Keppnis- og kúlturferðir sem þessar eru að jafnaði farnar 2 hvert ár. Árið 2012 er heimsókn til New York og keppni við Manhattan Chess Club á dagsskrá, 2014 liggur svo leiðin til Hollands eða Tékklands þar sem PORG skákklúbburinn tekur á móti, ef af verður.

Myndir frá starfsemi KR

Íslenskar skákfréttir | Slóð | Facebook | Athugasemdir (0)

26.4.2010 | 07:47

Skólaskákmót Reykjavíkur hefst í dag

Skólaskákmót Reykjavíkur í yngri flokki (1.-7. bekkur) og eldri flokki (8.-10. bekkur) fer fram mánudaginn 26. apríl og þriðjudaginn 27. apríl. Taflið hefst báða dagana klukkan 17:00. Á mánudeginum verða tefldar 4 umferðir en 3 á þriðjudeginum.

Athygli skal vakin á því að mótið er ekki opið að þessu sinni. Þeir einir hafa rétt til þátttöku sem hafa unnið skólamót síns skóla. Einstaka skólum verða gefin fleiri en eitt sæti ef tilefni er til þess. Í þeim tilvikum verður einkum litið til íslenskra skákstiga. Mælst er til þess að strax eftir páska fari fram skólaskákmót í þeim skólum sem hafa ekki þegar haldið þau. Tilkynna skal keppendur og skóla á netfangið stebbibergs@gmail.com í síðasta lagi föstudaginn 23. apríl.

Tefldar verða 7 umferðir á mótinu með 15 mínútna umhugsunartíma. Teflt verður í Taflfélagi Reykjavíkur að Faxafeni 12. Þrjú efstu sætin í eldri flokki gefa sæti á landsmót og tvö efstu sætin í yngri flokki gefa sæti á landsmó

Íslenskar skákfréttir | Slóð | Facebook | Athugasemdir (0)

25.4.2010 | 13:59

Jón Björnsson atskákmeistari Austurlands

Atskákmót Austurlands var haldið í gær í Eskifjarðarskóla. Enginn kom til leiks í unglingaflokki og féll hann því niður. Atskákmeistari Austurlands varð Jón Björnsson, Egilsstöðum, í öðru sæti varð Hákon Sófusson, Eskifirði, og í þriðja sæti varð Rúnar Hilmarsson, Reyðarfirði.

Verðlaunin voru eingnarbikar fyrir 1. sæti, en verðlaunapeningar fyrir 2. og 3. sæti.

Heimasíða SAUST

Íslenskar skákfréttir | Breytt s.d. kl. 14:01 | Slóð | Facebook | Athugasemdir (0)

24.4.2010 | 10:36

Síðustu dagar Skáklistahátíðar

Skáklistahátíð leikskólabarna er nú í fullum gangi í Ráðhúsi Reykjavíkur. Skáklistahátíðin er haldin af Skákakademíunni sem hefur sl. 2 ár staðið fyrir kennslu í 4 leikskólum höfuðborgarinnar undir handleiðslu Róberts Lagerman. Það eru krakkar á Lindaborg, Barónsborg, Hlíðaborg og Njálsborg sem eiga heiðurinn af listaverkunum.

Við listsköpunina var skákin höfð að leiðarljósi og sýnir afraksturinn hvernig ungir krakkar hugsa um skáklistina. Sýningin hefur staðið yfir í nær tvær vikur og eru síðustu sýningardagarnir nú um helgina. Eru skákmenn á öllum aldri hvattir til að ganga í hóp þeirra hundruða sem lagt hafa leið sína í Ráðhúsið til að bera þessa skemmtilegu sýningu augu og grípa í tafl í leiðinni.

Sjón er sögu ríkari!

Íslenskar skákfréttir | Slóð | Facebook | Athugasemdir (0)

23.4.2010 | 23:39

Innrás Hróksins vekur athygli á Grænlandi

Innrás Hróksins í Grænlandi vekur athygli í þarlendum jölmiðlum og 16. apríl birtist grein í hinum víðlesna blaði Sermitsiaq. Ekki treystir ritstjóri sér til þýða greinina. Í meðfylgjandi mynd má sjá Sussi Josefsen, sem ku var mikil skákáhugamaður, og fylgdi Hróksverjum víða í heimsókn þeirra nýlega. Hún leikur hér g3 í fyrsta leik.

Greinin fylgir með sem viðhengi í fréttinni.

Skrár tengdar þessari bloggfærslu:

skak_artikel.pdf

Íslenskar skákfréttir | Breytt s.d. kl. 23:52 | Slóð | Facebook | Athugasemdir (0)

23.4.2010 | 10:11

Skólaskákmót Reykjavíkur hefst á mánudag

Íslenskar skákfréttir | Slóð | Facebook | Athugasemdir (0)

23.4.2010 | 08:02

Mikael Jóhann og Jón Kristinn kjördæmismeistarar Norðurlands eystra

Mikael Jóhann Karlsson, Brekkuskóla, Akureyri, og Jón Kristinn Þorgeirsson, Lundarskóla, Akureyri, urðu kjördæmismeistarar í skólaskák á Norðurlandi eystra.

Kjördæmismótið á Norðurlandi eystra í skólaskák fór fram sl. mánudag í Valsárskóla á Svalbarðseyri við Eyjafjörð. Alls voru 16 keppendur, 7 í eldri flokki og 9 keppendur í yngri. Mikael Jóhann Karlsson vann örugglega í flokki, 8. - 10. bekk, vann allar sínar sex skákir og Hjörtur Snær Jónsson, Glerárskóla, Akureyri, varð annar með fimm vinninga. Þetta var fimmta árið í röð sem Mikael sigrar á kjördæmismóti, tvö síðustu ár í eldri flokki en þar á undan í yngri flokki.

Jón Kristinn Þorgeirsson sigraði einnig örugglega í yngri flokknum (1. - 7. bekk), fékk fullt hús, 8 vinninga af 8 mögulegum. Andri Freyr Björgvinsson, Brekkuskóla, varð annar með 7 vinninga. Þetta var annað árið í röð sem Jón sigrar á Kjördæmismóti.

Lokastaðan:

	8. - 10. bekkur.
			vinn.
1.	Mikael Jóhann Karlsson	Brekkuskóla	6	af 6!
2.	Hjörtur Snær Jónsson	Glerárskóla	5
3.	Benedikt Þór Jóhannsson	Borgahólsskóla	4
4.	Hersteinn Heiðarsson	Glerárskóla	3
5.	Samuel Chaen	Valsárskóla	1
6.	Aron Fannar Skarphéðinsson	Hlíðaskóla	1
7.	Svavar Jónsson	Valsárskóla	1
	Tefldar voru 15.	mínútna skákir.
	1. - 7. bekkur.		vinn.
1.	Jón Kristinn Þorgeirsson	Lundarskóla	8
2.	Andri Freyr Björgvinsson	Brekkuskóla	7
3.	Snorri Hallgrímsson	Borgahólsskóla	5 +	15 stig.
4.	Hlynur Snær Viðarsson	Borgahólsskóla	5 +	11 st.
5.	Sigtryggur Vagnsson	Stórutjarnarskóla	4
6.	Tinna Ósk Rúnarsdóttir	Hrafnagilsskóla	3
7.	Gunnar Arason	Lundarskóla	2
8.	Jóhanna Þorgilsdóttir	Valsárskóla	1
9.	Sævar Gylfason	Valsárskóla	1

Tefldar voru 12 mínútna skákir, allir við alla. Skákstjórar voru Gylfi Þórhallsson og Hjörleifur Halldórsson.

Landsmót í skólaskák fer fram í næsta mánuði og keppa minnsta kosti þrír keppendur að norðan á mótinu, en það eru Mikael Jóhann Karlsson í eldri flokki og úr þeim yngri þeir Jón Kristinn Þorgeirsson og Andri Freyr Björgvinsson.

Íslenskar skákfréttir | Slóð | Facebook | Athugasemdir (0)

23.4.2010 | 07:51

Örn Leó sigraði á fimmtudagsmóti TR

Örn Leó Jóhannsson sigraði á fimmtudagsmótinu í gær. Stefán Pétursson var efstur í kaffihléinu eftir 4. umferð en Örn Leó, sem hafði gert jafntefli í fyrstu tveimur umferðunum, vann allar sem eftir voru (þ.á.m. Jón Úlfljótsson í síðustu umferð en tap fyrir honum í síðustu umferð kostaði Örn efsta sætið fyrir viku) og stóð uppi sem öruggur sigurvegari. Mótin á fimmtudögum í T.R. verða út maí og jafnvel lengur ef áhugi reynist fyrir hendi.