Myndir frá KORNAX mótinu - Skákþingi Reykjavíkur

Þau Jóhann H. Ragnarsson og Sigurlaug R. Friðþjófsdóttir tóku allmargar myndir frá 1. umferð KORNAX mótsins - Skákþings Reykjavíkur sem hófst í gær. 

Á myndinni hér til hliðar má sjá Evu Einarsdóttur, formann ÍTR, leika fyrsta leikinn fyrir landsliðsmanninn Hjörvar Stein Grétarsson gegn Jóni Trausta Harðarsyni.

Myndaalbúm mótsins

Einar tekur upp hanskann fyrir Guðmund

Norðmaður og bréfskákmeistari nokkur að nafni Morten Lilleören skrifaði fyrir nokkru mjög harðorða og ákaflega rætna grein þar sem hann gagnrýnir kenningu Guðmundar  G. Þórarinssonar um hugsanlegan íslenskan uppruna hinna fornu sögualdartaflmanna og telur hana  vera út í hött, því þeir séu norskir.  

Í mikilli langloku sem birtist á skákfréttasíðunni Chessbase  2. desember sl. vandar hann Guðmundi ekki kveðjurnar og telur hann misfara með heimildir, draga rangar ályktanir og fara mjög villu vegar.   Þetta er önnur grein Lilleören um þetta álitamál,  en hinni fyrri svaraði Guðmundur skilmerkilega bæði á ChessCafe.com þar sem hún birtist fyrst og síðar á Chessbase.   Í skrifum sínum þyrlar Lillören upp miklu moldviðri og veður svo mikinn reyk að greinar hans eru ekki taldar svaraverðar af bestu manna yfirsýn.  

Einar S. Einarsson sem hefur verið Guðmundi innanhandar við að kynna kenningu hans bæði hér heima og erlendis sá sig þó knúinn til að bera í bætifláka fyrir þá félaga og birtist grein eftir hann á Chessbase fyrir helgina.   Hana og aðrar greinar um þetta  hitamál og miklu ráðgátu má lesa hér:

http://www.chessbase.com/newsdetail.asp?newsid=7820

og meira um málið á heimasíðunni www.leit.is/lewis

Henrik vann í áttundu umferð

Stórmeistarinn Henrik Danielsen (2536) vann Indverjann . Aswath (2249) í áttundu umferð alþjóðlega mótsinsí Chennai í Indlani sem fram fór í nótt/morgun.  Henrik hefur 6 vinninga og er í 13.-18. sæti

Næstu nótt teflir hann við sjöunda Indverjann í jafn mörgum skákum að þessu sinn við alþjóðlega meistarann Kumar Praveen (2338). 

Efstir með 7 vinninga eru hvít-rússneski stórmeistarinn Aleksej Alekandrov (2612) og Kínverjinn Yu Ruiyuan (2491).

Alls taka 297 skákmenn þátt í mótinu og þar af eru 16 stórmeistarar.   Henrik er nr. 5 í stigaröð keppenda.  

Hægt er að fylgjast með nokkrum skákum beint í hverri umferð á Chessbomb og virðast skákir Henriks ávallt vera sýndar.  Umferðirnar hefjast hins vegar allar hér eftir kl. 4 að nóttu!

• Heimasíða mótsins 
• Chessbomb