Skákþing Finnlands: Sá langstigalægsti hampaði titlinum!

Skákþingi Finnlands lauk síðustu helgi. Afar óvænt úrslit urðu á mótinu þegar langstigalægsti keppandi mótsins, hinn 18 ára, Teemu Virtanen (2204) vann mótið. Ungstirnið og hinn þrautreyndi alþjóðlegi meistari Mika Karttunen (2487) komu jafnir í mark með 4½ vinning í sjö skákum. Þeir tefldu til þrautar með styttri umhugsunartíma og þar hafði Virtanen betur 2-0. Anastsia Nazarov (2038) varð skákmeistari kvenna þriðja árið í röð þrátt fyrir að vera aðeins 15 ára.

Nánar á heimasíðu finnska skáksambandsins.

 

Pólverjar og Rússar efstir á HM landsliða

Þriðja umferð HM landsliða fór fram í Khanty-Mansiysk í Síberíu í gær. Í oprnum flokki eru Pólverjar efstir með fullt hús stiga eftir 3-1 sigur á Egyptum. Kínverjar og Rússar koma næstir með 5 vinninga. Rússar unnu Úkraínu 2,5-1,5 og náðu þar með hefna ófaranna frá Ólympíuskákmótinu. Kínverjar gerðu 2-2 jafntefli við Bandaríkin. 

Rússar og Úkraínukonur eru efstar með 5 stig í kvennaflokki. Georgíukonur og Pólverjar koma næstar með 4 stig.

Ítarlega umfjöllun má finna á Chess24. 

• Heimasíða mótsins
• Beinar útsendingar (hefjast kl. 10)

Skákhátíð á Ströndum fer fram 7.-9. júlí

Skákhátíð í Árneshreppi verður haldin dagana 7. til 9. júlí þar sem áhugamönnum gefst kostur á að spreyta sig gegn sumum bestu skákmönnum Íslands. Meðal þeirra sem þegar eru skráð til leiks eru Guðmundur Kjartansson, nýbakaður Íslandsmeistari, stórmeistararnir Jóhann Hjartarson, Jón L. Árnason og Lenka Ptacnikova og landsliðskonan Guðlaug Unnur Þorsteinsdóttir. 

Hátíðin hefst með tvískákarmóti og brennu í Trékyllisvík föstudagskvöldið 7. júlí kl. 20. Í tvískák eru tveir saman í liði, og iðulega afar heitt í kolunum. 

Hápunktur hátíðarinnar verður laugardaginn 8. júlí í félagsheimilinu, minninningarmót Jóhönnu Kristjónsdóttur 2017. Jóhanna, sem lést 11. maí síðastliðinn, var meðal ötulustu liðsmanna Hróksins og hafði jafnframt sterk tengsl við Árneshrepp. Yfirskrift hátíðarinnar er sótt í kjörorð Jóhönnu: Til lífs og til gleði. 

Minningarmótið hefst klukkan 14 og verða tefldar 8 umferðir, með 10 mínútna umhugsunartíma. Verðlaun á mótinu eru í senn vegleg og óvenjuleg, m.a. listaverk sem Guðjón Kristinsson frá Dröngum og Valgeir Benediktsson í Árnesi vinna sérstaklega af þessu tilefni. Þá verða ýmsir munir úr fjarlægum löndum, vegleg gjafabréf og fleiri vinningar. 

Á laugardagskvöldið verður hátíðarkvöldverður í félagsheimilinu, þar sem ýmislegt verður til skemmtunar, og verðlaun á minningarmóti Jóhönnu afhent. 

Hátíðinni lýkur með hraðskákmóti í Kaffi Norðurfirði sunnudaginn 9. júlí kl. 12. Þar verða tefldar 5 mínútna skákir, 7 umferðir, og sigurvegarinn hlýtur nafnbótina Norðurfjarðarmeistarinn 2017. 

Hrókurinn hefur um árabil efnt til skákviðburða í Árneshreppi og þangað hafa flestir bestu skákmenn landsins og fjölmargir áhugamenn lagt leið sína á skákmót og hátíðir. 

Árneshreppur er afskekktasta og fámennasta sveitarfélag á Íslandi, en jafnframt eitt hið fegursta og stórbrotnasta. Það er Hróknum mikið gleðiefni að geta nú boðað til hátíðar undir kjörorðunum: Til lífs og til gleði. 

• Áhugasamir ættu að skrá sig sem fyrst hjá [e-mail] eða [e-mail]. 
• Mjög góð tjaldstæði eru í Trékyllisvík og Norðurfirði.  
• Gistirými er takmarkað en við reynum að hjálpast að við að koma öllum góðum gestum í hús!

Kínverjar og Rússar efstir á HM landsliða

Þegar tveimur umferðum er lokið á HM landsliða í Khanty í Rússlandi eru Kínverjar efstir í opnum flokki, Rússar aðrir og Pólverjar þriðju. Rússar eru efstir í kvennaflokki, Pólverjar aðrir og Indverjar þriðju.

Í opnum flokki vakti það mesta athyglis að stigalægsta liðið, Egyptar, gerðu jafntefli við Rússa. Heimamenn hafa á að skipa næststigahæsta liðinu vegna forfalla stigahæstu manna á eftir Kínjverjum.

Rússar hafa byrjarð frábærlega í kvennaflokki og unnu Kínverja, sem eru án Hou Yifan, 3-1.  

Byrjun Kínverja er slök en þeir hafa stigahæsta liðið þrátt fyrir fjarveru Yifan.

 

Ítarlega umfjöllun um fyrstu tvær umferðirnar má finna á Chess.com. .

• Heimasíða mótsins
• Beinar útsendingar (hefjast kl. 10)

Hannes endaði með 5 vinninga í Teplice

Stórmeistarinn Hannes Hlífar Stefánsson (2548) endaði með 5 vinninga á opna skákmótinu í Teplice í Tékklandi sem lauk í dag. Hann endaði í 45.-65. sæti. 

Einstaklingsárangur Hannesar má finna hér. 

Rússneski stórmeistarinn Maxim Turov (2595) sigraði á mótinu. Hann hlaut 7,5 vinninga.

166 skákmenn frá 26 löndum tóku þátt í mótinu. Þar af voru 14 stórmeistarar. Hannes var nr. 11 í stigaröð keppenda.

• Heimasíða mótsins
• Chess-Results
• Beinar útsendingar (hefjast kl. 14)

Boðsmót TR endurvakið 23.-25. júní

Boðsmót Taflfélags Reykjavíkur á sér yfir 40 ára langa sögu en mótið hefur legið í dvala síðasta áratuginn. Nú hefur stjórn T.R. ákveðið að endurlífga Boðsmótið í formi helgarskákmóts. Boðsmót T.R. hefur því göngu sína á ný föstudaginn 23. júní kl. 19:30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og verða tefldar atskákir í bland við kappskákir samkvæmt dagskrá hér að neðan. Venju samkvæmt verður mótið reiknað til skákstiga.

Keppt er um stórglæsilegan farandbikar, en auk hans eru peningaverðlaun fyrir þrjú efstu sætin. Þá verða veitt bókaverðlaun fyrir bestu frammistöðu miðað við eigin stig. Verði keppendur jafnir að vinningum mun stigaútreikningur (tiebreaks) skera úr um lokaröð. Peningaverðlaunum verður skipt eftir Hort kerfinu.

Skráningu lýkur föstudaginn 23.júní kl.19:15.

Dagskrá:
1. umferð (atskák) föstudaginn 23. júní kl. 19:30
2. umferð (atskák) föstudaginn 23. júní kl. 20:45
3. umferð (atskák) föstudaginn 23. júní kl. 22:00
4. umferð (kappskák) laugardaginn 24. júní kl. 11:00
5. umferð (kappskák) laugardaginn 24. júní kl. 17:00
6. umferð (kappskák) sunnudaginn 25. júní kl. 11:00
7. umferð (kappskák) sunnudaginn 25. júní kl. 17:00

Tímamörk:
Atskákir: 20 mínútur + 10 sekúndna viðbót eftir hvern leik.
Kappskákir: 90 mínútur + 30 sekúndna viðbót eftir hvern leik.

Verðlaun:
1. sæti kr. 20.000
2. sæti kr. 10.000
3. sæti kr. 5.000

Bókaverðlaun fyrir bestu frammistöðu miðað við eigin kappskákstig (“performance” mínus “eigin kappskákstig”).

Þátttökugjald:
Fyrir fullgilda meðlimi T.R. er gjaldið 2.500kr en aðrir greiða 4.000kr. Þátttökugjöld greiðast með reiðufé við upphaf móts. Fyrrum sigurvegarar Boðsmótsins fá frítt í mótið. Titilhafar fá auk þess frítt í mótið.

Skráningarform

Skráðir keppendur

HM landsliða hófst í gær

Heimsmeistaramót landsliða hófst í gær í Khanty-Mansiysk í Síberíu í Rússlandi. Þar tefla 10 lið í bæði opnum- og kvennaflokki. Liðin vinna sér keppnisrétt í gegnum Ólympíuskákmót og álfukeppnir. Það er sláandi með keppendalista mótsins í ár hversu marga af sterkustu skákmönnum heims og t.d. höfnuðu bæði lið Asera og Armena þátttöku í opnum flokki þar sem þeirra bestu skákmenn (Mamedyarov og Aronian) gáfu ekki kost á sér. Í lið Norðmanna vantar bæði Carlsen og Hammer. 

Skýringuna má að miklu leyti rekja til þess að mótið skaraðist á Altibox Norway Chess-mótið og at- og hraðskákmót í París og Leuven í Belgíu dagana 21. júní - 2. júlí nk. með þátttöku flestra bestu skákmanna heims. Emil Sutovsky, forseti ACP, hefur gagnrýnt tímasetningu mótsins mjög. 

Kínverjar mæta með sitt besta lið og Rússarnir eru ekki árennilegir, með Peter Svidler á fyrsta borði, þrátt fyrir fjarveru þeirra allra stigahæstu manna eins og Kramnik, Karjakin og Grischuk. Í lið Bandaríkjanna vantar So, Caruana og Nakamura. 

Umfjöllun um gang gærdagsins má finna á Chess24.

• Heimasíða mótsins
• Beinar útsendingar (hefjast kl. 10)

Skákþáttur Morgunblaðsins: Hárgreiðsla heimsmeistarans, gleraugun og kærastan

Norska skákmótið sem hófst með pompi og pragt í Stafangri í byrjun vikunnar dregur til sín tíu af tólf stigahæstu skákmönnum heims. Þegar það var upphaflega kynnt lögðu skipuleggjendur þess og stærsti styrktaraðili, norska fyrirtækið Altibox, áherslu á að ná saman öllum á topp tíu lista FIDE. Smávægilegar breytingar á elo-listanum sem birtur var í byrjun maí sl. og eru þær helstar að Aserinn Mamedyarov hefur skotist upp í í 5. sæti og Kínverjinn Liren Ding situr í því tíunda. En það skiptir Norðmenn litlu máli; þeir eru hvort eð er allir að fylgjast með heimsmeistaranum Magnúsi Carlsen sem þessa dagana skartar nýjum gleraugum, nýrri hárgreiðslu og hefur eignast kærustu, hina 22 ár gömlu Synn Christin Larsen.

Mótshaldið hófst á mánudaginn með hraðskákmóti keppendanna en fimm efstu sætin þar tryggðu fleiri skákir með hvítu í aðalmótinu. Magnús var baneitraður og vann með yfirburðum, hlaut 7 ½ vinning af níu mögulegum en í 2. – 3. sæti komu Nakamura og Aronjan með 5 ½ v. hvor, Vachier-Lagrave varð fjórði með 5 vinninga og Kramnik náði 5. sæti á stigum.

Hressileg barátta í hraðskákinni hefur svo vikið fyrir yfrið varfærnislegri taflmennsku á aðalmótinu; í fyrstu þrem umferðunum hefur 13 skákum af 15 lokið með jafntefli. Nakamura og Kramnik eru efstir með 2 vinninga, síðan koma Magnús, So, Aronjan, Vachier-Lagrave, Caruana og Karjakin með 1 ½ vinning en lestina reka Anand og Giri með 1 vinning.

Enn á Magnús eftir að vinna skák og hefur gert jafntefli við So, Caruana og Nakamura. Sá síðastnefndi hóf keppnina með því að vinna Anish Giri sem sjaldan tapar en vendipunkturinn kom í þessari stöðu: 

Nakamura – Giri

Hollendingurinn hafði verið í varnarstöðu lengi og biskupinn virtist ofjarl riddarans en samt lék Naka...

48. Bxd7! Hxd7+ 49. Ke5 Kf7 50. Hb8!

Svartur ræðst inn á b7 og a7-peðið fellur. Eftirleikurinn er auðveldur.

50. ... He7+ 51. Kd5 Kf6 52. Hb7 He5+ 53. Kd4 Ha5 54. Hxa7 f4 55. Kc4 Ha2 56. Kc5 h5 57. Ha8 Hc2 58. Kb6 Hb2+ 59. Kc5 Hc2+ 60. Kb6 Hb2+ 61. Ka7 Hxg2 62. Hb8 Hf2 63. Hb6+ Kg7 64. Kb7 Hxf3 65. a7 Ha3 66. Ha6 Hb3+ 67. Kc6

- og Giri gafst upp.

Nakamura dregur enga dul á þá fyrirætlan sína að ná heimsmeistaratitlinum úr hendi Magnúsar en árangur hans gegn Norðmanninum er slakur. En þegar á hólminn er komið þurfa fyrri viðureignir ekki að skipta neinu máli. Góðir fræðimenn voru fljótur að benda á nokkurn skyldleika við einn frægasta leik Fischers frá lokaeinvígi áskorendakeppninnar árið 1971 og hefur stundum verið tekinn sem dæmi um það hvernig koma má betri stöðu í verð með óvæntum uppskiptum:

Buenos Aires 1971; 7. einvígisskák: 

Fischer – Petrosjan

Það hafði margt fróðlegt gerst áður en þessi staða kom upp. Riddarinn á c5 er greinilega mikill stólpagripur en án þess a depla auga lék Fischer ... ..

22. Rxd7+! Hxd7 23. Hc1 Hd6 24. Hc7 Rd7 25. He2 g6 26. Kf2 h5 27. f4 h4?

Petrosjan hefði betur sleppt þessum leik en staðan var erfið.

28. Kf3 f5 29. Ke3 d4+ 30. Kd2 Rb6 31. Hee7 Rd5 32. Hf7+ Ke8 33. Hb7 Rxb4 34. Bc4!

Það fór vel á því að uppáhaldsbiskup Fischers ætti síðasta orðið. Petrosjan gafst upp.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 10. júní 2017

Skákþættir Morgunblaðsins

Aronian sigurvegari Altibox Norway Chess

Altibox Norway Chess-mótinu lauk í dag í Stafangri. Levon Aronian (2793) gerði jafntefli við Wesley So (2812) í lokaumferðinni. Armeninn viðkunnanlegi hlaut 6 vinninga og varð vinningi fyrir ofan næstu menn. Í 2.-3. sæti með 5 vinninga urðu Hikaru Nakamura (2785), sem tapaði fyrir Fabiano Caruana (2808), og Vladimir Kramnik (2808) sem yfirspilaði Anish Giri (2771) í lokaumferðinni. Carlsen (2832) gerði jafntefli við Anand (2786) og varð í 7.-9. sæti með 4 vinninga.  

Lokastaðan

Heimsmeistarinn heldur efsta sætinu á lifandi heimlistanum. Kramnik er annar, So þriðji og Aronian er fjórði.

Ítarlega umfjöllun um lokaumferðina má finna á Chess.com.

 

• Heimasíða mótsins
• Beinar útsendingar

 

Fjöltefli á vegum Vinaskákfélagsins og Geðhjálpar

Vinaskákfélagið í samstarfi við Geðhjálp heldur fjöltefli mánudaginn 21. ágúst kl. 16:00 í húsnæði Geðhjálpar að Borgartúni 30.

Keppendur verða 10 manns frá athvörfum, búsetukjörnum, geðdeildum og fólki frá Kleppi. 1 til 2 frá hverjum stað. Engin skákmaður yfir 2000 skákstig mun tefla, þannig að þetta verða bara áhuga skákmenn sem verða þarna í fararbroddi. Hörður Jónasson og Hjálmar Sigurvaldason frá Vinaskákfélaginu munu svo tefla við þau. Teflt verður með klukku og er áætlað að skákmenn hafi 15 mín, en þeir Hörður og Hjálmar 20 mín. Verðlaun verða veitt öllum sem keppa þ.e. gullverðlaunapeningur sem á stendur "Fjöltefli á vegum Geðhjálpar og Vinaskákfélagsins 2017". Ennfremur mun Vinaskákfélagið vera með kaffi og kökur í samvinnu við Geðhjálp.

Áhorfendur eru velkomnir!