Páskaeggjamót Víkingaklúbbsins fer fram á miðvikudaginn

Páskaeggjamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 25. mars. Tefldar verða 6. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og þátttaka er ókeypis. Keppt verður þrem flokkum: Flokki fæddra 1999-2005, flokki fæddra 2006 og yngstu krakkarnir og byrjendur tefla tefla í sérflokki. (þrjú mót).  

Allir fá páskaegg fyrir framistöðu sína og  þátttaka í mótinu er ókeypis.  Barna og unglingaæfingar Víkingaklúbbsins verða vikulega á miðvikudögum fram á sumar.

ATH:  Nauðsynlegt er að skrá sig (nafn og fæðingarár) til að tryggja þátttöku.

Skráning á mótið fer fram á Skák.is (guli kassinn efst)

Heimilisfang hér:

Knattspyrnufélagið Víkingur
Traðarlandi 1, 108 Reykjavík

Páskaeggjamót Hugins

Páskaeggjamót Hugins verður haldið í 23. sinn mánudaginn 23. mars 2015, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri.

Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg verða í verðlaun fyrir þrjú efstu sætin, bæði í eldri flokki (fæddir 1999 – 2002) og yngri flokki (fæddir 2003 og síðar). Sá sem er efstur í hverjum árgangi fær einnig páskaegg sem og efstu þrjár stúlkurnar á mótinu. Að auki verða tvö páskaegg dregin út. Enginn fær þó fleiri en eitt páskaegg. Lítið páskaegg verður svo fyrir þá sem ekki vinna til verðlauna.

Páskaeggjamótið verður haldið í félagsheimili Hugins í  Álfabakka 14a í Mjóddinni. Inngangur er milli Subway og Fröken Júlíu en salur félagsins er á þriðju hæð hússins.

Skákfélagið Huginn Íslandsmeistari skákfélaga

Skákfélagið Huginn sigraði á æsispennandi Íslandsmóti skákfélaga sem lauk í gær í Rimaskóla. Sveitin vann Skákfélag Reykjanesbæjar 7,5-0,5 í lokaumferðinni á meðan helsti keppinauturinn Taflfélag Reykjavíkur sigraði Skákdeild Fjölnis 6,5-1,5. Taflfélag Vestmannaeyja varð í þriðja sæti. B-, C- og D-sveitir TR unnu 2.-4. deild. 

Lokastaðan:

1. Skákfélagið Huginn 56,5 v.
2. Taflfélag Reykjavíkur 55 v.
3. Taflfélag Vestmannaeyja 52,5 v.
4. Skákdeild Fjölnis 38 v.
5. Taflfélag Bolungarvíkur 36 v.
6. Skákfélag Akureyrar 33,5 v.
7. Víkingaklúbburinn 29,5 v.
8. Skákfélagið b-sveit 25 v.
9. Skákfélag Reykjanesbæjar 17,5 v.
10. Skákfélag Íslands 16,5 v.

Nánar á Chess-Results.

Skákfélag Reykjanesbæjar og Skákfélag Íslands falla niður í 2. deild.

Hjörvar Steinn Grétarsson, Hugin, og Björn Þorfinnsson, TR, stóðu sig best allra en þeir hlutu 8 vinninga í 9 skákum. 

2. deild

B-sveit TR vann öruggan sigur en hún hlaut 31,5 v. Skákdeild KR varð í öðru sæti með 28,5. Þessar tvær sveitir hafa áunnið sér rétt til að tefla í fyrstu deild að ári.

Spennan um þriðja sæti var mikil. Það féll í skaut b-sveitar Skákfélags Akureyrar en sveitin hlaut 22,5 vinning. Aðeins munaði 3 vinningum á verðlaunasæti og fallsæti. 

Lokastaðan:

1. Taflfélag Reykjavíkur b-sveit 31,5 v.
2. Skákdeild KR 28,5 v.
3. Skákfélag Akureyrar b-sveit 22,5 v.
4. Skákdeild Hauka 21,5 v. (9 stig)
5. Taflfélag Garðabæjar 21,5 v. (7 stig)
6. Skákfélagið Huginn c-sveit 20 v.
7. Vinaskákfélagið 19,5 v.
8. Víkingaklúbburinn b-sveit3 v.

Vinaskákfélagið og Víkingaklúbburinn féllu niður í 3. deild. Afar litlu munaði að Vinaskákfélagið hefði fengið hálfan vinning til viðbótar í lokaumferðinni. Þá hefði komið til þeirra sérstöku stöðu og draga hefði þurft um hvort Vinaskákfélagið eða b-sveit Hugins hefði fallið en liðin hefðu verið hnífjöfn eftir allan stigaútreikning.

Stöðuna má nálgast á Chess-Results.

3. deild

C-sveit Taflfélags Reykjavíkur vann öruggan sigur en sveitin hlaut fullt hús stiga. Borgnesingar og Selfyssingar urðu í 2. og 3. sæti með 9 stig. Borgnesingar fengu fleiri vinninga og fá sæti í 2. deild að ári.

D-sveit Skákfélaga Akureyrar, a-unglingasveit TR og f-sveit Hugins féllu niður í 4. deild

Stöðuna má nálgast á Chess-Results.

4. deild

D-sveit TR vann öruggan sigur en sveitin hlaut 13 stig. B-sveit Taflfélags Garðabæjar varð í öðru sæti 12 stig. Skákgengið varð í þriðja sæti með 10 stig. Þessar þrjár sveitir unnu sér keppnisrétt í 3. deild að ári. 

Stöðuna má nálgast á Chess-Results.

Myndir væntanlegar!

Skákþáttur Morgunblaðsins: Hjörvar og Jón Viktor í fararbroddi

Hjörvar Steinn Grétarsson vann Zhansaya Abdumalik frá Kasakstan í fjórðu umferð Reykjavíkurskákmótsins á fimmtudagskvöldið og var með fullt hús vinninga ásamt fimm öðrum fyrir fimmtu umferð sem fram fór í gærkvöldi. Hann átti að tefla við Aserann Shakriyar Mamedyarov í toppslag umferðarinnar. Íslensku skákmennirnir hafa margir hverjir staðið sig prýðilega þó enginn eins vel og Jón Viktor Gunnarsson sem hafði hlotið 3 ½ vinning úr fjórum skákum eftir sigur á Gawain Jones á fimmtudagskvöldið. Hann gerði jafntefli við næststigahæsta keppanda mótsins, Tékkann David Navara, sem mátti berjast fyrir jafntefli peði undir í erfiðu hróksendatafli.

Með 3 vinninga af fjórum voru meðal annarra Hannes Hlífar Stefánsson, Einar Hjalti Jensson, Guðmundur Kjartansson, Henrik Danielsen, Einar Valdimarsson og Þröstur Þórhallsson. Athygli vekur einnig frammistaða hins unga Jóns Kristins Þorgeirssonar sem er með 2 ½ vinnning eftir jafntefli við indverska stórmeistarann Sahaj Grover í 4. umferð. Í þeirri umferð var heldur meira jafnræði með keppendum en í þeim fyrstu og margar stórskemmtilegar baráttuskákir sáu dagsins ljós. Mikla athygli vakti skák Héðins Steingrímssonar við Aserann Shakriyar Mamedyarov en Mamedyarov hafði sigur eftir að hafa náð að snúa á Héðin í miðtaflinu.

Jón Viktor Gunnarsson dróst á móti Svíanum Nils Grandelius í umferð gærdagsins. Það vita flestir að hann á heilmikið inni og gæti hæglega nælt sér í áfanga að stórmeistatatitli ef svo heldur fram sem horfir. Hann fann glæsilega vinningsleið gegn Gawain Jones þegar margir töldu að hann þyrfti að taka jafntefli með þráskák.

Gawain Jones – Jón Viktor Gunnarsson

Enskur leikur

1. c4 c5 2. Rf3 g6 3. g3 Rc6 4. Rc3 Bg7 5. Bg2 d6 6. O-O Bf5 7. d3 Dd7

Þetta dálítið frumstæða kerfi sem byggist á framrás h-peðsins hefur Jón Viktor margoft reynt í hraðskák. Hvers vegna ekki að prófa það líka í kappskák?

8. He1 Bh3 9. Bh1 h5 10. Rg5 h4 11. Rd5 hxg3 12. hxg3 Rf6 13. Rf4 Bg4 14. f3 e5!

Byrjunartaktík Jóns hefur gengið fullkomlega upp, hann hefur náð að opna h-línuna og getur hrókerað langt.

15. Rd5 Be6 16. e4 Rh5 17. Kf2 Bxd5 18. exd5 Rd4 19. g4 Rf6 20. Bg2 O-O-O 21. Be3 Rh7 22. Rxh7 Hxh7 23. Dd2 f5 24. Hh1 Hdh8 25. Bxd4 cxd4 26. Hxh7 Hxh7 27. Hh1 Hxh1 28. Bxh1 Dd8!

Mislitir biskupar eru engin trygging fyrir jafntefli því biskup svarts er miklu virkari en sá hvíti.

29. Kg3 Bf6 30. Dh6!

Góður varnarleikur, annars kemst biskupinn til g5.

30. ... Da5!?

Lítur glæfralega út en Jón Viktor hafði komið auga á hinn snjalla 32. leik.

31. gxf5 De1+ 32. Kh2 e4! 

Leikur peðinu ofan í þrælvaldaða reitinn! Þessu þema beitti Kasparov betur en aðrir.

33. Df8+ Bd8! 34. fxg6 Dh4+ 35. Kg2 Dg5+ 36. Kf1 Dc1+ 37. Kg2 Dg5+ 38. Kf1 exd3 39. Dxd6 Dc1+ 40. Kg2 Dg5+ 41. Kf1

 

 

 

 

Það lá ekki alveg ljóst fyrir hvernig svartur ætlaði að tefla þessa stöðu til vinnings. Þannig gengur ekki 41. ... d2 vegna 42. De6+ Kb8 43. Ke2! o.s.frv. En Jón fann lausnina.

41. ... Dc1+ 42. Kg2 Dd2+ 43. Kh3

Eða 43.Kg1 De3+ og 44. ... d2.

43. ... Dh6+ 44. Kg2 d2! 45. Dc5+ Kb8 46. Dxd4 Dxg6+ 47. Kh3 Dh7+ 48. Kg2 Dc2! 49. Df4+ Ka8

- og hvítur gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 14. mars 2015

Skákþættir Morgunblaðsins

Huginn með hálfs vinnings forskot fyrir lokaumferð Íslandsmóts skákfélaga

Skákfélagið Huginn hefur hálfs vinnings forskot á Taflfélag Reykjavíkur fyrir lokaumferð Íslandsmóts skákfélaga. Taflfélag Vestmannaeyja er skammt undan 1,5 vinningi á eftir TR. Lokaumferðin hefst kl. 17 á eftir í Rimaskóla. 

Huginn vann 6,5-1,5 sigur á Skákfélagi Akureyrar. Þar vakti sigur Stefáns Bergssonar á Helga Áss Grétarssyni mesta athygli. TR-ingar unnu sannfærandi 7,5-0,5 vinning á Bolvíkingum. Guðmundur Kjartansson vann þar Jóhann Hjartarson. Eyjamenn unnu b-sveit Hugins 7-1. 

Öll úrslit má finna á Chess-Results.

Stöðuna má einnig finna á Chess-Results.

Í lokaumferðinni mætir Huginn Skákfélagi Reykjanesbæjar, TR mætir Skákdeild Fjölnis og Eyjamenn mæta Bolvíkingum. 

Verði jafnt verður teflt til þrautar með styttri umhugsunartíma.

2. deild

B-sveit TR er efst með 26,5 og hefur þegar tryggt sér sæti í efstu deild að ári. KR-ingar eru í vænlegri stöðu að fylgja þeim upp en þeir hafa 24,5 vinning. Í 3.-4. sæti eru b-sveit Akureyringa og Taflfélag Garðabæjar.

Stöðuna má nálgast á Chess-Results.

3. deild

C-sveit Taflfélags Reykjavíkur er efst með fullt hús stiga í 3. deild og hefur þegar tryggt sér sigur og sæti í 2. deild að ári. C-sveit Skákfélags Akureyrar og Selfyssingar eru í 2.-3. sæti með 8 stig.

Stöðuna má nálgast á Chess-Results.

4. deild

D-sveit TR er efst í 4. deild með 11 stig B-sveit TG er í öðru sæti með 10 stig. Þessar sveitir hafa þegar tryggt sér sæti í 3. deild að ári. Óljósara er hins vegar hvað sveit fylgir þeim upp en Skákgengið er í þriðja sæti með 8 stig.

Stöðuna má nálgast á Chess-Results.

Wow air Vormót TR hefst á mánudagskvöldið

Hið glæsilega Wow air Vormót Taflfélags Reykjavíkur hefst í skákhöll félagsins að Faxafeni 12 mánudaginn 23. mars  Frábærar viðtökur er mótið var haldið í fyrsta sinn í fyrra tryggja að það verður nú árlegur viðburður í fjöbreyttri mótaflóru félagsins.

Tefldar verða sjö umferðir eftir svissneska kerfinu og er umhugsunartíminn 90 mínútur á fyrstu 40 leikina en eftir það bætast við 15 mínútur.  30 sekúndur bætast við eftir hvern leik alla skákina.  Teflt verður einu sinni í viku á mánudagskvöldum og hefjast umferðirnar kl. 19.30  Tvær yfirsetur (bye) verða leyfðar í umferðum 1-5.

Mótið er fyrst og fremst hugsað fyrir sterkari skákmenn og er frábær upphitun fyrir Skákþing Íslands sem hefst að móti loknu. 

Í A – meistaraflokk hafa allir skákmenn með GM/IM/FM/WGM titil þátttökurétt, auk allra skákmanna með yfir 2200 Elo skákstig.

Í B – áskorendaflokk hafa allir skákmenn með yfir 2000 Elo skákstig þátttökurétt.

Skákmenn sem uppfylla stigalágmörkin á 1. mars eða ná þeim á Reykjavik Open er gjaldgengir í mótið.

Tveimur skákmönnum á stigabilinu 2000 – 2199 verður boðið sæti í A flokki.  Þau sæti eru fyrst og fremst hugsuð fyrir unga og upprennandi skákmenn á öllum aldri í mikilli framför. 

Allt að fjórum skákmönnum sem ekki hafa tilskilin stig fyrir B flokkinn verður boðin þátttaka þar.  Þau sæti eru fyrst og fremst ætluð efnilegustu skákkrökkunum og unglingunum okkar, en allir geta sótt um.

Hægt er að sækja um þessi 6 sæti með því að senda póst á [e-mail] eða hafa samband við formann félagsins Björn Jónsson í síma 8999268 eigi síðar en 18. mars.

Sigurvegari Wow air Vormótsins í fyrra var Hjörvar Steinn Grétarsson stórmeistari. Magnús Pálmi Örnólfsson sigraði í B flokki og annar varð Kjartan Maack.  Þeir tveir unnu sér inn keppnisrétt í A - flokki í ár.

Í fyrra tóku þátt fimm stórmeistarar, tveir alþjóðlegir meistarar, fjórir Fide meistarar og einn stórmeistari kvenna

Glæsileg verðlaun eru í mótinu í boði Taflfélags Reykjavíkur og vina okkar hjá Wow air.

A – Meistaraflokkur:

1. Flugmiði með Wow air á einn af áfangastöðum félagsins (skattar og gjöld innifalið) plús 40.000 krónur
2. 40.000 krónur
3. 20.000 krónur

 

B – Áskorendaflokkur:

1. Flugmiði með Wow air á einn af áfangastöðum félagsins (skattar og gjöld innifalið) plús 20.000 krónur
2. 20.000 krónur
3. 10.000 krónur

Auk þess verða veittir bikarar fyrir efsta sætið í hvorum flokki auk farandbikars fyrir sigurvegara A flokks.  Verðlaunapeningar fyrir annað og þriðja sætið í báðum flokkum.

Að lokum eiga allir keppendur möguleika á að vinna glæsilegar DGT  skákklukkur  en tvær slíkar verða dregnar út í happdrætti við verðlaunaafhendingu.

Tvö efstu sætin í B – flokki veita þátttökurétt í A flokki að ári. 

Umferðatafla:

1. umferð mánudag 23. mars kl. 19.30
2. umferð mánudag 30. mars  kl. 19.30

Páskahlé

3. umferð mánudag 13. apríl  kl. 19.30
4. umferð mánudag 20. apríl  kl. 19.30
5. umferð mánudag 27. apríl  kl. 19.30
6. umferð mánudag 04. maí   kl. 19.30
7. umferð mánudag 11. maí   kl. 19.30

 

Verðlaunaafhending mun fara fram föstudagskvöldið 22. maí, en þá mun fara fram skemmtikvöld hjá TR. 

Tekið skal fram að 25% af verðlaunafé úr Wow air mótinu verður haldið eftir ef verðlaunahafar mæta ekki á verðlaunaafhendinguna til að taka við verðlaunum sínum án gildra ástæðna.

Ef fresta þarf skákum verða þær viðureignir tefldar á miðvikudagskvöldum kl. 19.30 (samhliða skákmóti öðlinga). 

Þátttökugjald er kr. 5000 fyrir félagsmenn Taflfélags Reykjavíkur en kr. 10.000 fyrir aðra. 

Þeir skákmenn sem skrá sig fyrir 20. mars fá 50% afslátt af þátttökugjaldinu.  Frítt er fyrir titilhafa á mótið skrái þeir sig fyrir 20. mars, annars kr. 5000.  

Skráning fer fram hér og lýkur á miðnætti 22. mars. 

Hér má sjá keppendalistann. 

Taflfélag Reykjavíkur hvetur alla skákmenn til að taka þátt enda var mótið í fyrra eitt sterkasta og best heppnaða mót ársins.

• WOW air mótið 2014

Skákmót öðlinga hefst á miðvikudagskvöld

Skákmót öðlinga 40 ára og eldri hefst miðvikudaginn 25. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.

Skákmót öðlinga verður nú haldið í 24. sinn. Núverandi Skákmeistari öðlinga er alþjóðlegi meistarinn Sævar Bjarnason.

 

Dagskrá:

• 1. umferð miðvikudag 25. mars kl. 19.30

• 2. umferð miðvikudag 8. apríl kl. 19.30

• 3. umferð miðvikudag 15. apríl kl. 19.30

• 4. umferð miðvikudag 22. apríl kl. 19.30

• 5. umferð miðvikudag 29. apríl kl. 19.30

• 6. umferð miðvikudag 6. maí kl. 19.30

• 7. umferð miðvikudag 13. maí kl. 19.30

Mótinu lýkur miðvikudaginn 20. maí kl. 19:30 með hraðskákmóti og verðlaunaafhendingu. Keppt er um veglegan farandbikar,en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 4.000 fyrir aðalmótið og kr 500 fyrir hraðskákmótið. Innifalið er frítt kaffi allt mótið ásamt rjómavöfflum og öðru góðgæti á lokakvöldi. 

Skráning fer fram hér.

Hér er hægt að fylgjast með skráningu.

• Skákmót öðlinga 2014
• Skákmeistarar öðlinga
• Mótstöflur

Huginn efstur fyrir lokadag Íslandsmóts skákfélaga

Skákfélagið Huginn hefur 1,5 vinnings forskot á Taflfélag Reykjavíkur fyrir lokadag Íslandsmóts skákfélaga sem fram fer á morgun með tveimur umferðum. Huginn vann Skákdeild Fjölnis 6-2. Taflfélag Reykjavíkur vann Skákfélag Íslands með sama mun. Taflfélag Vestmannaeyja er vinningi þar á eftir. Eyjamenn unnu Reyknesinga 7-1.

Nokkuð var um óvænt úrslit. Jóhann Ingvason (2142), Reykjanesbæ, gerði jafntefli við Helga Ólafsson (2543), Taflfélagi Vestmannaeyja, en Jóhann gerði einnig jafntefli við Jón L. Árnason í gær.  Rúnar Sigurpálsson (2249), Skákfélagi Akureyrar, vann portúgalska stórmeistarann Luis Galego (2465), Víkingaklúbbnum.

Úrslit kvöldsins má finna á Chess-Results.

Stöðuna má einnig finna á Chess-Results.

Næstsíðasta umferð fer fram á morgun og hefst kl. 11. Þá teflir Huginn við Skákfélag Akureyrar, TR við Bolvíkinga og Eyjamenn við b-sveit Hugins.

2. deild

B-sveit TR er efst með 21 vinning. KR-ingar eru aðrir með 20 vinninga og b-sveit Akureyringa er í þriðja sæti með 18 vinninga.

Stöðuna má nálgast á Chess-Results.

3. deild

C-sveit Taflfélags Reykjavíkur er efst með fullt hús stiga í 3. deild. B-sveit Fjölnis og Selfyssingar eru í 2. og 3. sæti með 7 stig.

Stöðuna má nálgast á Chess-Results.

4. deild

D-sveit TR er efst í 4. deild með fullt hús stiga. B-sveit Garðbæinga er í öðru sæti með 8 stig. Sex sveitir koma þar á eftir með 6 stig.

Stöðuna má nálgast á Chess-Results.

 

Íslandsmót skákfélaga - allar deildir í kvöld!

Seinni hluti Íslandsmóts skákfélaga 2014-2015 fer fram dagana 19.-21 mars. nk. Mótið fer fram í Rimaskóla, Reykjavík.  Keppnin hefst (eingöngu í 1.deild) kl. 19.30 fimmtudaginn 19. mars. Aðrar deildir munu hefja taflmennsku föstudaginn 20. mars  kl. 20.00 og síðan  laugardaginn 21. mars. kl. 11.00 og kl. 17.00 sama dag. 

Nemendur og foreldrar 7 . bekkjar í Rimaskóla munu sjá um veitingasölu á Íslandsmóti skákfélaga og er veitingasalan liður í fjáröflun krakkanna fyrir Skólabúðir að Reykjum. Posi til taks og einnig er skákfélögum heimilt að stofna til reiknings gegn undirskrift ábryrgðarmanns.

Lokahóf mótsins er á Kringlukránni að móti lokinni. Lokahófið er aðeins fyrri 18 ára og eldri nema þá í fylgd í fullorðnum. 

Nánar á heimasíðu Skáksambands Íslands.

Áskorendaflokkur Íslandsmótsins í skák

Áskorendaflokkur Íslandsmótsins í skák fer fram um páskana, 27. mars – 5. apríl nk. Teflt er húsnæði Taflfélag Reykjavíkur, Faxafeni 12. Tefldar verða níu umferðir eftir svissneska kerfinu. Mótið verður jafnframt Íslandsmót kvenna.

Einnig verður teflt í opnum flokki sem verður opinn fyrir skákmenn með 1600 skákstig eða minna. Keppendur með minna en 1600 skákstig geta valið á milli flokka.

Í áskorendaflokki verða tefldar níu umferðir en í opnum flokki verða tefldar sjö umferðir. Opnum flokki lýkur á föstudeginum langa. 

Verðlaun í áskorendaflokki eru sem hér segir: 

1. 75.000 kr.
2. 45.000 kr.
3. 30.000 kr. 

Verðlaun í opnum flokki: 

1. Þrjár skákbækur hjá bóksölu Sigurbjörns
2. Tvær skákbækur hjá bóksölu Sigurbjörns
3. Skákbók hjá bóksölu Sigurbjörns. 

Auk þess verði sérstök stigaverðlaun fyrir þá sem hafa minna en 1200 stig í opnum flokki. 

Verðlaun skiptast eftir Hort-kerfi séu menn efstir í verðlaunasætum í áskorendaflokki. Tvö efstu sætin gefa keppnisrétt í landsliðsflokki að ári. Séu menn jafnir ræður stigaútreikningur (nánar í mótsreglum hér að neðan). Í opnum flokki gildir stigaútreikningur um verðlaunsæti.  

Skráning

Þátttökugjöld eru 5.000 kr. Unglingar 15 ára og yngri (1999 og síðar) og F3-félagar fá 50% afslátt. 

Í opnum flokki (sem eingöngu fyrir opinn fyrir þá sem hafa 1600 skákstig eða minna) eru þátttökugjöld fyrir alla kr. 2.000. 

Skráning fer fram á Skák.is (guli kassinn efst). Þátttökugjöld greiðist inn á reikning 101-26-12763, kt. 580269-5409 fyrir mót.

Upplýsingar um þegar skráða keppendur má finna hér.

Tímamörk

Áskorendaflokkur: 90 mínútur + 30 mínútur eftir 40 leiki. 30 sekúnda viðbótartími eftir hvern leik.

Opinn flokkur: 60 mínútur auk 30 sekúnda viðbótartími eftir hvern leik.

Dagskrá: 

1. umferð, Föstudagurinn, 27. mars, kl. 18 
2. umferð, Laugardagurinn, 28. mars, kl. 10
3. umferð, Laugardaginn, 28. mars, kl. 18 
4. umferð, þriðjudaginn 31. mars, kl. 18
5. umferð, miðvikudaginn, 1. apríl, kl. 18
6. umferð, föstudagurinn (langi), 3. apríl, kl. 10
7. umferð, föstudagurinn (langi), 3. apríl, kl. 18
8. umferð, laugardagurinn, 4. apríl, kl. 14
9. umferð, sunnudagurinn, 5. apríl, kl. 14

Opinn flokkur klárast föstudaginn 3. apríl.

Nánari mótreglur

Ef tveir eða fleiri eru jafnir í sæti mun stigaútreikningur ráða ferð.

Nánar um útreikninginn:

• Samanlagðir vinningar allra andstæðinga lagðir saman nema þess stigalægsta
• Samanlagðir vinningar allra andstæðinga lagðir saman.
• Samanlagðir vinningar allra andstæðinga lagðir saman nema tveggja stigalægstu
• Innbyrðis úrslit  þeirra sem eru jafnir
• Sonneborn-Berger
• Hlutkesti

Jafnteflisreglur 

Takmarkanir eru settar á jafnteflisboð. Hún gengur út á það að ekki er heimilt að bjóða jafntefli fyrr en báðir keppendur hafa leikið 30 leiki. Á því má gera undantekningar sé þráteflt en þá verður að stöðva klukku, kalla á skákstjóra og koma með jafntefliskröfu. 

Yfirseta

Hægt er að taka tvær yfirsetur  í umferðum 1-6 og fá fyrir hana hálfan vinning. Óska þarf eftir yfirsetunni með góðum fyrirvara og fylla út eyðublað þess efnis hjá skákstjóra.