Huginn vó Víkinga

Huginsmenn og Víkingaklúbburinn leiddu saman hesta sína í hraðskákkeppni taflfélaga í gærkvöld.

Aflsmunur var allnokkur á liðunum og þrátt fyrir grimmilega báráttu Víkinga lauk viðureigninni með öruggum sigri Hugins, 53 -19.

Hlutskarpastur Huginsmanna var Hjörvar Steinn Grétarsson með 11 vinninga af 12 en næstur kom Stefán Kristjánsson með 9,5 af 12.

Aðrir kappar sem tefldu fyrir Hugin voru Magnús Örn Úlfarsson, Sigurður Daði Sigfússon, Ásgeir Páll Ásbjörnsson og Kristján Ólafur Eðvarðsson.

Flesta vinninga Víkingaklúbbsins hlutu Gunnar Freyr Rúnarsson, 6 vinninga af 11, og Ólafur B. Þórsson, 6 vinninga af 12.

Aðrir Víkingar sem tóku þátt í rimmunni voru Stefán Þór Sigurjónsson, Sigurður Ingason, Sturla Þórðarson og Jón Úflljótsson.

Skákdómari nær og fjær var Gunnar Björnsson og er honum þökkuð yfirveguð dómgæsla í vandasömum úrlausnarefnum.

Búið er að draga hvaða lið mætast í undúrslitum. Það er:

• Skákfélagið Huginn - Skákfélag Reykjanesbæjar
• Taflfélag Reykjavíkur - Taflfélag Bolungarvíkur

Viðureignirnar fara fram fimmtudagskvöldið, 4. september og hefjast kl. 20. Teflt er í félagsheimili Hugins, Álfabakka 14a.

Mótstafla gærdagsins (hægt að stækka):

 

 

Mánudagsæfingar Hugins byrja í dag

Barna- og unglingaæfingar Hugins í Mjóddinni hefjast aftur eftir sumarfrí mánudaginn 1. september 2014. Taflið byrjar kl. 17:15 og fyrirkomulagið verður það sama og síðasta vetur.  Æfingarnar eru opnar öllum 15 ára og yngri en skipt verður í tvo flokka eftir aldri og styrkleika á sumum æfingum. Engin þátttökugjöld.

Æfingarnar verða haldnar í félagsheimili Hugins í Álfabakka 14a, Mjódd. Inngangur er við hliðina á Subway en salur félagsins er á þriðju hæð hússins. Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til. Þegar starfsemin verður komin vel af stað verður unnið í litlum verkefnahópum á einni æfingu í mánuði og þannig stuðlað að því að efla einingu og samstöðu innan hópsins.  Þær æfingar verða eingöngu fyrir félagsmenn og verða kynntar síðar. Jafnframt verða í boði nokkrar æfingar utan æfingatíma fyrir félagsmenn þar sem farið verður í dæmi, verkefni og fleira. Umsjón með þessum æfingunum hafa Erla Hlín Hjálmarsdóttir og Vigfús Ó. Vigfússon. Stúlknaæfingar í Mjóddinni hefjast síðar og verða kynntar þegar þar að kemur.

Þeim sem sækja æfingarnar stendur einnig til boða skákþjálfun  í Stúkunni við Kópavogsvöll þriðjudaga til föstudaga frá 16:00 – 17:30.

Aðalþjálfari í Stúkunni verður Birkir Karl Sigurðsson.  Honum til aðstoðar verður einvala lið þjálfara frá Skákskóla Íslands, Skákfélaginu Huginn og Skákdeild Breiðabliks.

Í þjálfuninni verður stuðst við námsefni frá Chess Steps, stig 3 til 6.

Jón Kristinn sigurvegari Framsýnarmótsins

Jón Kristinn Þorgeirsson vann öruggan sigur á Framsýnarmótinu í skák sem lauk á Húsavík í dag. Jón Kristinn fékk 6,5 vinninga af 7 mögulegum. Símon Þórhallsson varð í öðru sæti með 5,5 vinninga og Haraldur Haraldsson varð þriðji með 5 vinninga.

Tómas Veigar Sigurðarson varð efstur Huginsmanna með 4 vinninga, Smári Sigurðsson varð annar einnig með 4 vinninga og Jakob Sævar Sigurðsson þriðji með 3,5 vinninga.

Jón Aðalsteinn Hermannsson vann sigur í yngri flokki með 3 vinninga.

Aðalsteinn Árni Baldursson formaður stéttarféalgsins Framsýnar afhenti verðlaunin í mótslok.

Lokastöðu mótsins má finna á Chess-Results.

Heimasíða Hugins