Bikarsyrpa Taflfélags Reykjavíkur hefst í dag

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Fyrsta mótið í syrpunni hefst föstudaginn 5. september og stendur til sunnudagsins 7.september. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á "alvöru mótum" einungis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar.  Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:

1. umferð 17.30 á föstudegi (5. september)

2. umferð 10.30 á laugardegi (6. september)

3. umferð 14.00 á laugardegi (6. september)

4. umferð 10.30 á sunnudegi (7. september)

5. umferð 14.00 á sunnudegi. (Lokaumferð + verðlaunaafhending) (7. september).

Skráning fer fram á heimasíðu Taflfélags Reykjavíkur www.taflfelag.is. Vinsamlegast skráið þátttakendur sem fyrst, það hjálpar við undirbúning mótsins!

Stefnt er að því að Bikarsyrpan samanstandi af fjórum mótum í vetur. Bikarar og medalíur eru í verðlaun fyrir efstu sætin í hverju móti, en auk þess verða veitt sértök verðlaun fyrir samanlagðan árangur á mótunum. 

Hlökkum til að sjá ykkur!

Undanúrslit Hraðskákkeppni taflfélaga fara fram í kvöld

Í kvöld skýrist hvaða lið mætast í úrslitum Hraðskákkeppni taflfélaga en þá fara fram undanúrslit keppninnar. Í viðureignum kvöldsins mætast annars vegar Skákfélagið Huginn og Skákfélag Reykjanesbæjar og hins vegar Taflfélag Reykjavíkur og Taflfélag Bolungarvíkur. Viðureignirnar fara fram í Huginsheimilinu, Álfabakka 14a, og hefjast kl. 20.

Áhorfendur eru velkomnir og heitt verður á könnunni.

 

Caruana - sjöunda sigurskákin í röð! - Mætir Carlsen á morgun

Fabiano Caruana (2801) heldur áfram að fara á kostum á Sinquefield Cup. Í kvöld vann sína sjöundu skák í röð þegar hann hreinlega yfirspilaði franska stórmeistarann Maxime Vachier-Lagrave (2768) með svörtu.  Að hafa sjö vinninga að að loknum sjö umferðum á svo sterku móti verður að teljast stórkostlegt.  Carlsen (2877) vann Nakamura (2787) mjög örugglega og er annar með 4 vinninga.

Gríðarleg spenna er fyrir umferð morgundagsins en þá mætast tveir sterkustu skákmenn heims; Caruana og Carlsen.

Staðan:

• 1. Caruana (2801) 7 v.
• 2. Carlsen (2877) 4 v.
• 3. Topalov (2772) 3 v.
• 4.-5. Vachier-Lagrave (2768) og Aronian (2805) 2,5 v.
• 6. Nakamura (2787) 2 v.

Séu lifandi skákstig (live chess ratings) skoðuð er Caruana nú kominn upp í 2835 skákstig og eru nú aðeins 31 stigi á eftir heimsmeistaranum.

• Heimasíða mótsins
• Beinar útsendingar

Davíð vann sjöttu skákina í röð

FIDE-meistarinn Davíð Kjartansson (2331) reynir að gera sitt besta til að halda í Fabiano Caruana. Í sjöttu umferð, sem fram fór í kvöld, vann hann sínu sjöttu skák í röð á Meistaramóti Hugins. Fórnarlamb dagsins var Ólafur Kjartansson (1997).

Sævar Bjarnason (2095) er annar með 5 vinninga eftir sigur á Vigfúsi Ó. Vigfússyni (1962).  Loftur Baldvinsson (1986) er svo þriðji með 4,5 vinning.

Nú er hlé á mótinu fram á næsta mánudagskvöld. Þá teflir Davíð við Árna Guðbjörnsson (1696) og Sævar mætir Lofti. 

 

• Heimasíða Hugins
• Chess-Results

Afmælismót Gylfa um næstu helgi

Eins og áður hefur komið fram varð Gylfi Þórhallsson, sem manna lengst hefur setið í stjórn Skákfélags Akureyrar -  þar af formaður þess í nær tvo áratugi - sextugur sl. vor. Í tilefni af því efnum við til skákmóts nú um helgina og vonumst eftir sem bestri þátttöku ungra sem aldinna. Gylfi sjálfur verður auðvitað meðal keppenda - og tekur þátt í baráttunni um sigurlaunin ef við þekkjum hann rétt. 

Mótið hefst laugardaginn 6. september kl. 13.00 í Skákheimilinu á Akureyri. Tefldar verða 10 mínútna skákir og áformað að tefla 7 umferðir á laugardeginum og 6 á sunnudeginum, en þá hefst taflið einnig kl. 13.00. Fjöldi umferða ræðst þó endanlega þegar þátttaka liggur fyrir, en skráning verður í netfangið [e-mail], eða á skákstað, kl. 12.30-12.50 fyrir upphaf móts.

Peningaverðlaun verða veitt sem hér segir:

1. verðlaun    kr. 15.000

2. verðlaun    kr. 10.000

3. verðlaun    kr.   5.000

Við hlökkum til skemmtilegs og spennandi móts og minnum líka á hið árlega STARTMÓT félagsins sem hefst fimmtudaginn 4. september kl. 18.00.  Tímasetningin er óvenjuleg en mótið verður bara skemmtilegra fyrir vikið!

Haustmót Taflfélags Reykjavíkur

Haustmót Taflfélags Reykjavíkur 2014 hefst sunnudaginn 14. september kl.14. Mótið á 80 ára afmæli í ár, er eitt af aðalmótum vetrarins í reykvísku skáklífi og er jafnframt meistaramót T.R. Mótið er flokkaskipt og öllum opið.

Haustmótið fer fram í félagsheimili Taflfélags Reykjavíkur, skákhöllinni að Faxafeni 12. Tefldar verða tvær umferðir á viku. Alls eru níu umferðir í hverjum flokki. Lokuðu flokkarnir eru skipaðir tíu keppendum hver þar sem allir tefla við alla, en í opna flokknum er teflt eftir svissnesku kerfi.

Tímamörk eru 1 klst. og 30 mín. + 30 sek. á leik. Að loknum 40 leikjum bætast 15 mínútur við.

Skráning fer fram hér. Skráningarform er væntanlegt á Skák.is og einnig á heimasíðu T.R. síðar í vikunni.

Fylgjast má með skráningu hér.

Skráningu í alla lokaða flokka lýkur laugardaginn 13. september kl. 18.
Lokaumferð fer fram föstudaginn 17. október en mótinu lýkur með verðlaunaafhendingu sunnudaginn 19. október þegar Hraðskákmót T.R. fer fram.

Núverandi skákmeistari Taflfélags Reykjavíkur er Kjartan Maack.
 
Dagskrá:
1. umferð: Sunnudag 14. september kl.14.00
2. umferð: Miðvikudag 17. september kl.19.30
3. umferð: Sunnudag 21. september kl.14.00
4. umferð: Miðvikudag 24. september kl.19.30
5. umferð: Sunnudag 28. september kl.14.00

---Hlé vegna Islandsmóts skákfélaga---

6. umferð: Miðvikudag 8. október kl.19.30
7. umferð: Sunnudag 12. október kl.14.00
8. umferð: Miðvikudag 15. október kl. 19.30
9. umferð: Föstudag 17. október. kl.19.30

Verðlaun í A-flokki:
1. sæti kr. 100.000
2. sæti kr. 50.000
3. sæti kr. 25.000
4. og 5. sæti ókeypis í Skákþing Reykjavíkur 2014

Verðlaun í B-flokki:
1. sæti kr. 20.000
2.-3. sæti ókeypis í Skákþing Reykjavíkur 2014

Verðlaun í C-flokki:
1. sæti kr. 15.000
2. og 3. sæti ókeypis í Skákþing Reykjavíkur 2014

Verðlaun í opnum flokki:
1. sæti kr. 10.000
2. og 3. sæti ókeypis í Skákþing Reykjavíkur 2014
 
Ef lokuðum flokkum fjölgar þá verða verðlaun í þeim þau sömu og í C-flokki. Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu. Verði keppendur jafnir í efstu sætum verður peningaverðlaunum skipt en stigaútreikningur látinn ráða lokaröð keppenda. Taflfélag Reykjavíkur áskilur sér jafnframt rétt til þess að halda eftir 25% af verðlaunafé þeirra sem ekki mæta á verðlaunaafhendinguna.

Tímamörk:
1 klst. og 30 mín. + 30 sek. á leik.

Þátttökugjöld:
3.500 kr. fyrir félagsmenn T.R. 16 ára og eldri (5.000 kr. fyrir aðra).
1.500 kr. fyrir félagsmenn T.R. 15 ára og yngri (2.500 kr. fyrir aðra).

Ný íslensk skákstig

Ný íslensk skákstig komu út 1. september sl. Jóhann Hjartarson er sem fyrr stigahæstur íslenskra skákmanna. Aron Þór Mai er stigahæstur nýliða. Björn Hólmi Birkisson og Jón Aðalsteinn Hermannsson hækka mest allra frá júní-listanum.

Topp 20

 

No.	Name	RtgC	Diff	Cat	Tit	Club
1	Jóhann Hjartarson	2603	0	-	GM	TB
2	Margeir Pétursson	2589	0	-	GM	TR
3	Hannes H Stefánsson	2581	-8	-	GM	TR
4	Helgi Ólafsson	2548	0	-	GM	TV
5	Héðinn Steingrímsson	2543	-2	-	GM	Fjölnir
6	Hjörvar Grétarsson	2532	-3	-	GM	Huginn
7	Jón Loftur Árnason	2514	0	-	GM	TB
8	Henrik Danielsen	2500	-3	-	GM	TV
9	Helgi Áss Grétarsson	2488	-10	-	GM	Huginn
10	Stefán Kristjánsson	2480	0	-	GM	Huginn
11	Friðrik Ólafsson	2459	0	SEN	GM	TR
12	Karl Þorsteins	2457	0	-	IM	TR
13	Guðmundur Kjartansson	2440	44	-	IM	TR
14	Þröstur Þórhallsson	2432	4	-	GM	Huginn
15	Bragi Þorfinnsson	2426	-8	-	IM	TB
16	Jón Viktor Gunnarsson	2425	0	-	IM	TR
17	Arnar Gunnarsson	2400	0	-	IM	TR
18	Dagur Arngrímsson	2400	0	-	IM	TB
19	Björn Þorfinnsson	2390	0	-	IM	Víkingaklúbburinn
20	Magnús Örn Úlfarsson	2366	0	-	FM	Huginn

Nýliðar

Aron Þór Mai (1268) er stigahæstur nýliða er Sólon Siguringason (1123) er næststigahæstur.

 

No.	Name	RtgC	Diff	Cat	Tit	Club
1	Aron Þór Mai	1268	1268	U14		TR
2	Sólon Siguringason	1123	1123	U10		TG
3	Alexander Már Bjarnþórsson	1000	1000	U10		TR
4	Gabríel Sær Bjarnþórsson	1000	1000	U08		TR

Mestu hækkanir

Björn Hólm Birkisson og Jón Aðalsteinn Hermannsson (47) hækka mest allra frá júní-listanum. Næstir koma Íslandsmeistarinn Guðmundur Kjartansson og Róbert Luu (44).

 

No.	Name	RtgC	Diff	Cat	Tit	Club
1	Björn Hólm Birkisson	1568	47	U14		TR
2	Jón Aðalsteinn Hermannsson	1047	47	U16		Huginn
3	Guðmundur Kjartansson	2440	44	-	IM	TR
4	Róbert Luu	1060	44	U10		TR
5	Hermann Aðalsteinsson	1350	37	-		Huginn
6	Þorsteinn Magnússon	1233	32	U14		TR
7	Sighvatur Karlsson	1298	30	-		Huginn
8	Guðmundur Agnar Bragason	1392	29	U14		TR
9	Heimir Páll Ragnarsson	1381	29	U14		Huginn
10	Óskar Víkingur Davíðsson	1341	29	U10		Huginn

Reiknuð mót

• Meistaramót Skákskóla Íslands
• Íslandsmótið í skák - landsliðsflokkkur
• Íslandsmótið í skák - áskorendaflokkur
• Framsýnarmótið - 5.-7. umferð

Enn sigrar Caruana - sjötta sigurskákin í röð!

Ekkert virðist getað stöðvað ítalska stórmeistarann Fabiano Caruna (2801) sem í kvöld vann sína sjöttu (!!!) skák í röð þegar hann vann Topalov (2772) á Sinquefield Cup-mótinu. Hreint og beint ótrúlegur árangur. Það stefnir í einn besta mótaárangur sögunnar í St. Louis. Öðrum skákum lauk með jafntefli. Magnus Carlsen (2877) er annar með 50% vinningshlutfall - heilum þremur vinningum á eftir Caruana þegar aðeins fjórum umferðum er ólokið.

Staðan:

• 1. Caruana (2801) 6 v.
• 2. Carlsen (2877) 3 v.
• 3.-4. Vachier-Lagrave (2768) og Topalov (2772) 2,5 v.
• 5.-6. Nakamura (2787) og Aronian (2805) 1,5 v.

Séu lifandi skákstig (live chess ratings) skoðuð er Caruana nú kominn upp í 2831 skákstig og eru nú aðeins 33 stigum á eftir heimsmeistaranum. Ítalinn hefur svo 37 skákstigaforskot á Aronian sem er þriðji.

• Heimasíða mótsins
• Beinar útsendingar

Davíð efstur á Meistaramóti Hugins

FIDE-meistarinn Davíð Kjartansson (2331) vann alþjóðlega meistarann Sævar Bjarnason (2095) í fimmtu umferð Meistaramóts Hugins sem fram fór í kvöld og er efstur með fullt hús. Fjórir keppendur hafa 4 vinninga en það eru auk Sævars þeir Loftur Baldvinsson (1986), Vigfús Ó. Vigfússon (1962) og Ólafur Kjartansson (1997).

Sjötta umferð fer fram á morgun. Þá mætast meðal annars: Davíð-Ólafur og Vigfús-Sævar.

 

• Heimasíða Hugins
• Chess-Results

Fyrsti skákdagur Ása í dag eftir sumarfrí

Það var vel mætt á þessum fyrsta skákdegi á þessari vetrarvertíð. Tuttugu og átta karlar gengu í salinn og ein kona. Hún var boðin velkomin en því miður tefldi hún bara fyrstu umferðina og hvarf svo af vettvangi, sem var slæmt þvi að við höfum verið að hvetja konur til þess að mæta og ögra þessum körlum við skákborðið. Það er auðvitað óþarfi að jarða þær alveg í fyrstu umferð jafntefli er t.d kurteisleg  byrjun.

Það voru margir vígfimir skákvíkingar sem mættu í dag og úrslitin urðu nokkuð eftir bókinni. Björgvin Víglundsson varð efstur með 8½ vinning af 10 mögulegum.

Í öðru sæti varð Jóhann Örn Sigurjónsson með jafnmarga vinninga en örlítið færri stig. Jóhann er að koma aftur til leiks eftir erfið veikindi og virðist engu hafa gleymt sem betur fer.

Í þriðja sæti varð svo Ingimar Halldórsson með 7 vinninga.

SJÁ NANARI ÚRSLIT Í MEÐF. TÖFLU.