Íslandsmót skákfélaga fer fram 2.-5. október - félagaskiptafrestur rennur út 12. september

Fyrri hluti Íslandsmóts skákfélaga 2014-2015 fer fram dagana 2.-5. október nk.  Mótið fer fram í Rimaskóla í Reykjavík.  1. umferð (eingöngu í 1.deild) mun hefjast kl. 19.30 fimmtudaginn 2. október. Aðrar deildir munu hefja taflmennsku föstudaginn 3. okt. kl. 20.00 og síðan tefla laugardaginn 4. okt. kl. 11.00 og kl. 17.00 sama dag.  Síðasta umferðin í fyrri hlutanum hefst kl. 11.00 sunnudaginn 5. október.

Minnt er á að félagaskiptafrestur rennur út á miðnætti 12. september nk. Hægt er að fylgjast með nýjustu vendingum á félagaskiptamarkaðnum hér (innlendir) og hér (erlendir).

Skráning fer fram á Skák.is (guli kassinn efst) - upplýsingar um þegar skráðar sveitir má finna hér. Skráningarfrestur er fram til 22. september.

Umhugsunartími er 90 mín. á skákina + 30 sek. viðbótartími bætist við eftir hvern leik.

Þátttökugjöld:

• 1. deild                       kr. 55.000.-
• 2. deild                       kr. 50.000.-
• 3. deild                       kr. 15.000.-
• 4. deild                       kr. 15.000.-

Skáksamband Íslands mun greiða fargjöld utan stór-Reykjavíkursvæðisins samkvæmt reikningum fyrir sveitir í 1. og 2. deild.  Miða skal við einn brottfararstað á hverju svæði, t.d. Akureyri, Egilsstaði, Ísafjörð.  Sami háttur verður hafður í 3. og 4. deild og áður, þ.e. þátttökugjöld höfð lág en sveitirnar verða sjálfar að sjá um ferðakostnað á skákstað.

Minnt er á reglugerð um Íslandsmót skákfélaga og 3. kafla skáklaga Skáksambands Íslands sem varða Íslandsmót skákfélaga.

Vakin er athygli á viðbót við 2. grein reglugerðar um Íslandsmót Skákfélaga:

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra. 

Athugið að tilkynningar v. Keppendaskrár Skáksambands Íslands skulu hafa borist SÍ í síðasta lagi 12. september nk. sbr. 18. gr. skáklaga.

Vakin er athygli á eftirfarandi texta í 19. grein skáklaga:  „Fyrir upphaf 1.umferðar fyrri hluta ÍS skulu félögin skila inn styrkleikaröðuðum lista allra þeirra keppenda sem þeir hyggjast nota í keppninni."

Að gefnu tilefni er minnt á að nauðsynlegt er að skrá sveitir í keppnina, ekki síst í 4. deild.

Stjórn SÍ mælist til - af gefnu tilefni - að félögin skrái ekki fleiri sveitir til keppni en þau treysta sér til að manna í báðum hlutum keppninnar. 

Ath.  Seinni hluti Íslandsmóts skákfélaga verður færður aftur fyrir Reykjavíkurskákmótið vegna EM einstaklinga sem mun fara fram 23. febrúar - 7. mars.

Æsir tefla á þriðjudögum í Stangarhyl

Æsir minna eldri borgara á skákina á þriðjudögum í Ásgarði Stangarhyl 4 félagsheimili eldri borgara í Reykjavík.

Allir karlar 60+ og konur 50+ velkomin.

Teflt er frá  kl. 13.00 til 16.30 með 10 mín. umhugsunartíma.

Tekið skal fram að menn þurfa ekki  að vera miklir meistarar til þess að vera gjaldgengir. Þarna tefla menn af öllum styrkleika flokkum .

Davíð fylgir í fótspor Caruana - vann sína sjöundu skák í röð

FIDE-meistarinn Davíð Kjartansson (2331) fetaði í kvöld í spor Fabiano Caruana þegar hann vann sína sjöundu skák í röð. Reyndar á Meistaramóti Hugins. Fórnarlamb kvöldsins var Árni Guðbjörnsson (1696). Sævar Bjarnason (2095) fylgir Davíð eins og skugginn er hann er annar með 6 vinninga eftir sigur á Lofti Baldvinssyni (1986).

Í 3.-5. sæti með 5 vinninga eru Stefán Bergsson (2098), Vigfús Ó. Vigfússon (1962) og Gauti Páll Jónsson (1719). 

Vigfús er efstur í baráttunni um meistaratitil Hugins. Þar er Dawid Kolka (1730) annar með 4,5 vinning. Jón Eggert Hallsson (1632) og Felix Steinþórsson (1549) koma næstir með 4 vinninga.

Í lokaumferðinni, sem fram fer annað kvöld (þriðjudag) mætast meðal annars:

• Davíð (7) -Vigfús (5)
• Sævar (6) -Gauti Páll (5)
• Stefán (5) - Loftur (4,5)
• Jón Eggert (4) -Dawid (4)
• Felix (4) -Árni (4)

• Heimasíða Hugins
• Chess-Results

Góður árangur Smára Rafns hinum megin á hnettinum

Smári Rafn Teitsson (2057) er nú búsettur í Ástralíu. Hann tók þátt í móti í Tornelo þar fyrir skemmstu og stóð sig vel. Smári endaði í sjötta sæti á mótinu (var nr. 12 í stigaröð keppenda) með 4 vinninga í 5 skákum. Hann gerði meðal annars jafntefli við alþjóðlega meistarann Kanan Izzat (2406) og var taplaus á mótinu.

Heimasíða mótsins 

Aðalfundur SA næsta sunnudag

Aðalfundur Skákfélags Akureyrar verður haldinn nk. sunnudag, 14. september. Fundurinn hefst kl. 13 og fara þá fram venjuleg aðalfundarstörf. Þau eru þessi, skv. lögum félagsins:

• 1.              Formaður félagsins setur fundinn og lætur kjósa fundarstjóra og fundarritara.
• 2.              Kynnt fundargerð síðasta aðalfundar.
• 3.              Formaður flytur skýrslu stjórnar.
• 4.              Lesin árskýrsla ritara um starfsemi félagsins.
• 5.              Gjaldkeri gerir grein fyrir reikningum félagsins.
• 6.              Umræður umstörf stjórnar og afgreiðsla reikninga.
• 7.              Inntaka nýrra félaga.
• 8.              Kosning stjórnar og annarra fastra starfsmanna.
• 9.              Kosning tveggja endurskoðenda.
• 10.          Ákveðið árstillag félagsmanna.
• 11.          Umræður um lög og keppnisreglurfélagsins.
• 12.          Önnur mál

 

Félagið hvetur félaga til að mæta og taka þátt í fundinum. Minnt er á að fundurinn er eigi gildur nema 10 manns mæti. Það hefur einhvertíma staðið tæpt.

Barna- og unglingaæfingar Víkingaklúbbsins hefjast 17. september

Knattspyrnufélagið Víkingur og Víkingaklúbburinn verða með skákæfingar fyrir börn og unglinga í Víkinni Víkingsheimilinu á miðvikudögum í vetur. Fyrsta æfingin verður miðvikudaginn 17. september og síðasta æfingin fyrir jólafrí verður miðvikudaginn 10. desember, en þá verður jólamót Víkingaklúbbsins haldið.  

Stækka má mynd

Mótaáætlun Víkingaklúbbsins í haust

 

Haustnámskeið Skákskóla Íslands hefjast vikuna 15.-21. september

Haustnámskeið Skákskóla Íslands 

hefjast vikuna 15. - 21. september

10 vikna námskeið

Úrvalsflokkar

Úrvalsflokkar eru ætlaðir nemendum sem hafa 1400 ELO-stig eða meira. Foreldrar eða forráðamenn taflfélaga geta sótt um og eru hvattir til að sækja um þjálfun og kennslu fyrir börn og unglinga. Helgi Ólafsson, Davíð Ólafsson, Hjörvar Steinn Grétarsson eru meðal þeirra sem hafa séð um þessa kennslu. Þessir nemendur hafa fengið og fá einkaþjálfun hjá reyndum stórmeisturum. Skákskólinn sér um þjálfun þeirra sem tefla fyrir Íslands á hönd á alþjóðlegum mótum t.d. heimsmeistaramóti unglinga sem fram fer í Durban í Afríku í september og Evrópumóti ungmenna í  Batumi í Georgíu sem hefst í október nk.     

Framhaldsflokkar

Þessir flokkar eru ætlaðir krökkum sem þegar hafa öðlast nokkra reynslu í keppnum eða jafnvel t.d. með skólaliðum og vilja auka við styrk sinn. Nýjasti stórmeistari Íslendinga Hjörvar Steinn Grétarsson og Björn Ívar Karlsson sem báðir eru þrautreyndir skákkennarar munu sjá um kennslu fyrir þennan hóp. 

Námskeiðin verða tvisvar á viku. Á laugardögum kl. 14:00-15:30  og á þriðjudögum kl. 15:30-17:00. Verð kr. 22.000.

Skákkennsla í Kópavogi

Skákskóli Íslands hefur frá haust ársins 2010 staði fyrir skákkennslu í Stúkunni á Kópavogsvelli. Skákskólinn tengist því verkefni sem Skákdeild Breiðabliks með Halldór Grétar Einarsson og Birkir Karl Sigurðsson hafa umsjón með en Helgi Ólafsson stórmeistari og skólastjóri Skákskólans mun áfram sjá um skákkennslukennslu á laugardögum fyrir þá ungu skákmenn sem þegar hafa öðlast nokkra reynslu í opinberum mótum og hafa e.t.v. ELO-stig þó það sé ekki endilega skilyrði. Foreldrar og áhugasamir aðilar geta haft samband á skrifstofu skólans og sótt sérstaklega um að fá að taka þátt í þessum tímum.

Stúlknanámskeið 7 - 12 ára

Landsliðskonurnar Hallgerður Helga Þorsteinsdóttir og Tinna Kristín Finnbogadóttur munu sjá um skáknámskeið fyrir stúlkur á aldrinum 7 - 12 ára. Námskeiðin hefjast sunnudaginn 20. september. Foreldrar stúlkna á þessum aldri eru hvattar til að mæta í fyrsta tíma sunnudaginn 20. september sem jafnframt er  kynningarfundur.  

Námskeiðin eru kl. 11 á sunnudögum. Verð kr. 14.000.

Upplýsingar um önnur námskeið á vegum skólans verða kynnt síðar.

Skráning á námskeiðin fer fram á www.skak.is. 

Nánari upplýsingar má einnig fá á skrifstofu skólans í síma 568 9141 568 9141 eða í gegnum netföngin [e-mail] (skrifstofa SÍ) eða [e-mail] (Skólastjóri).

Heimasíða Skákskóla Íslands

Call

Send SMS

Add to Skype

You'll need Skype CreditFree via Skype

Stelpuæfingar Hugins byrja á miðvikudaginn

Stelpuæfingar Skákfélagsins Hugins eru byrjaðar en þær verða í vetur á miðvikudögum og hefjast kl. 17:15. Fyrirkomulagið þannig á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tími vinnst til. Einhverjar æfingar verða einnig eingöngu teknar undir kennslu. Æfingarnar eru opnar öllum  stelpum á grunnskólaaldri. Ef ástæða er til verður skipt í tvo flokka eftir aldri og styrkleika á sumum æfingum. Engin þátttökugjöld.

Æfingarnar verða haldnar í félagsheimili Hugins í Álfabakka 14a, Mjódd. Inngangur er við hliðina á Subway en salur félagsins er á þriðju hæð hússins. Umsjón með æfingunum hefur Elsa María Kristínardóttir.

Haustmót Taflfélags Reykjavíkur

Haustmót Taflfélags Reykjavíkur 2014 hefst sunnudaginn 14. september kl.14. Mótið á 80 ára afmæli í ár, er eitt af aðalmótum vetrarins í reykvísku skáklífi og er jafnframt meistaramót T.R. Mótið er flokkaskipt og öllum opið.

Haustmótið fer fram í félagsheimili Taflfélags Reykjavíkur, skákhöllinni að Faxafeni 12. Tefldar verða tvær umferðir á viku. Alls eru níu umferðir í hverjum flokki. Lokuðu flokkarnir eru skipaðir tíu keppendum hver þar sem allir tefla við alla, en í opna flokknum er teflt eftir svissnesku kerfi.

Skráning fer fram á skak.is og einnig á heimasíðu T.R. Fylgjast má með skráningu hér.

Skráningu í alla lokaða flokka lýkur laugardaginn 13. september kl. 18.
Lokaumferð fer fram föstudaginn 17. október en mótinu lýkur með verðlaunaafhendingu sunnudaginn 19. október þegar Hraðskákmót T.R. fer fram.

Núverandi skákmeistari Taflfélags Reykjavíkur er Kjartan Maack.
 
Dagskrá:
1. umferð: Sunnudag 14. september kl.14.00
2. umferð: Miðvikudag 17. september kl.19.30
3. umferð: Sunnudag 21. september kl.14.00
4. umferð: Miðvikudag 24. september kl.19.30
5. umferð: Sunnudag 28. september kl.14.00

---Hlé vegna Islandsmóts skákfélaga---

6. umferð: Miðvikudag 8. október kl.19.30
7. umferð: Sunnudag 12. október kl.14.00
8. umferð: Miðvikudag 15. október kl. 19.30
9. umferð: Föstudag 17. október. kl.19.30

Verðlaun í A-flokki:
1. sæti kr. 100.000
2. sæti kr. 50.000
3. sæti kr. 25.000
4. og 5. sæti ókeypis í Skákþing Reykjavíkur 2015

Verðlaun í B-flokki:
1. sæti kr. 20.000
2.-3. sæti ókeypis í Skákþing Reykjavíkur 2015

Verðlaun í C-flokki:
1. sæti kr. 15.000
2. og 3. sæti ókeypis í Skákþing Reykjavíkur 2015

Verðlaun í opnum flokki:
1. sæti kr. 10.000
2. og 3. sæti ókeypis í Skákþing Reykjavíkur 2015

Ef lokuðum flokkum fjölgar þá verða verðlaun í þeim þau sömu og í C-flokki. Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu. Verði keppendur jafnir í efstu sætum verður peningaverðlaunum skipt en stigaútreikningur látinn ráða lokaröð keppenda. Taflfélag Reykjavíkur áskilur sér jafnframt rétt til þess að halda eftir 25% af verðlaunafé þeirra sem ekki mæta á verðlaunaafhendinguna.

Tímamörk:
1 klst. og 30 mín. + 30 sek. á leik. Að loknum 40 leikjum bætast við 15 mínútur.

Þátttökugjöld:
3.500 kr. fyrir félagsmenn T.R. 16 ára og eldri (5.000 kr. fyrir aðra).
1.500 kr. fyrir félagsmenn T.R. 15 ára og yngri (2.500 kr. fyrir aðra).

Henrik teflir í Skovbo

Stórmeistarinn Henrik Danielsen (2488) situr um þessar mundir að tafli á alþjóðlegu móti í Skovbo í Danmörku. Eftir 4 umferðir hefur Henrik 3 vinninga og er í 3.-10. sæti. Henrik hefur unnið tvær skákir og gert tvö jafntefli. Alþjóðlegi meistarinn Mikkel Djernæs Antonsen (2459) er efstur með fullt hús.

Hlé er nú á mótinu fram til 11. september.

Alls taka 52 skákmenn þátt í mótinu og þar af eru fimm stórmeistarar. Henrik er nr. 3 í stigaröð keppenda.

• Heimasíða mótsins
• Beinar útsendingar