Vigfús sigraði á hraðkvöldi Hellis

Vigfús Ó. Vigfússon sigraði með fullu húsi 7 vinninga í jafn mörgum skákum á hraðkvöldi Hellis sem fram fór 10. júní. Eftir að hafa tröll grísað á Bárð í fyrstu umferð þá komu vinningarnir á færibandi. Elsa María var að vísu nálægt því að ná jafntefli í næst síðustu umferð en þegar hún féll á tíma átti Vigfús sekúndu eftir á klukkunni.

Annar var Jón Úlfljótsson með 5,5 vinning en hann fylgdi Vigfúsi eins og skugginn allt mótið og átti möguleika á efsta sætinu í lokaumferðinni ef úrslitin hefðu orðið honum hagstæðari. Þriðji varð svo Örn Leó Jóhannsson með 5 vinninga. Vigfús dró svo Gunnar Björnsson í happdrættinu og báðir fengu þeir úttektarmiða á Saffran.

Næsta hraðkvöld verður 24. júní nk. og verður það síðasta hraðkvöldið þangað til í haust.

Lokastaðan á hraðkvöldinu:

Röð   Nafn                         Vinningar  M-Buch. Buch. Progr.

  1   Vigfús Ó. Vigfússon,             7        20.0  28.5   28.0
  2   Jón Úlfljótsson,                 5.5      20.5  28.5   23.5
  3   Örn Leó Jóhannsson,              5        20.0  29.5   19.0
 4-7  Páll Andrason,                   4        21.5  30.5   18.0
      Gauti Páll Jónsson,              4        16.5  23.5   17.0
      Gunnar Nikulásson,               4        16.5  20.5   16.0
      Björn Hólm Birkisson,            4        16.0  22.5   13.0
8-11  Elsa María Kristínardóttir,      3.5      22.0  32.5   17.0
      Gunnar Björnsson,                3.5      19.0  27.0   15.0
      Hörður Jónasson,                 3.5      16.0  22.0   13.5
      Hjálmar Sigurvaldason,           3.5      15.5  19.5   11.5
 12   Bárður Örn Birkisson,            3        17.5  24.5   12.0
 13   Heimir Páll Ragnarsson,          2.5      13.5  18.5    9.5
 14   Óskar Víkingur Davíðsson,        2        17.5  21.5    6.0
 15   Björgvin Kristbergsson,          1        17.5  23.0    5.0
 16   Pétur Jóhannesson,               0        15.0  20.0    0.0

Styrkjareglur SÍ taka breytingum

Stjórn SÍ hefur gert smávægilegar breytingar á styrkjareglum sínum. Breytingin felur í sér að styrkumsóknir verða afgreiddar framvegis þrisvar sinnum á ári, þ.e. 10. febrúar, 10. júní og 10. október. Umsóknir þurfa að hafa borist eigi síðar en í lok mánaðarins á undan.

Vegna þessara breytinga nú hefur fresturinn til að sækja um styrki verið lengdur til 30. júní í ár og verða styrkumsóknir sem bárust eða berast eftir 10. júní afgreiddar eigi síðar en 10. júlí næstkomandi.

Styrkjareglur SÍ

Aðalmarkmið styrkveitinga stjórnar Skáksambands Íslands til einstaklinga er að styðja við bakið á þeim skákmönnum sem sýnt hafa mestar framfarir, metnað og ástundun á síðustu 12 mánuðum, og þykja því líklegastir til að ná enn lengra í nánustu framtíð. Einnig er markmiðið að verðlauna fyrir afburðaárangur og hvetja þannig til afreka.

Styrkjum frá SÍ er ekki ætlað að styrkja hinn almenna skákáhugamann til farar erlendis, heldur einungis þá sem þykja skara fram úr. Sérstök áhersla er lögð á yngri skákmenn sem eru tilbúnir til að leggja á sig þjálfun til að standa sig á þeim mótum sem styrkbeiðni liggur fyrir um. 

Við allar úthlutanir á að vera lögð áhersla á jafnrétti kynjanna og að þeim stúlkum sem skarað hafa fram úr í hverjum aldursflokki sé gert kleift að afla sér reynslu á skákmótum erlendis til jafns á við stráka. Sams konar kröfur um ástundun, árangur og framfarir eru hins vegar gerðar til stúlkna og drengja, kvenna og karla, hvað styrkjaúthlutanir varðar

Viðmið við styrkúthlutanir

1.     Allir styrkþegar SÍ (ungir, alþjóðlegir og aðrir) þurfa að uppfylla eftirfarandi þrjú skilyrði:

• Hafa teflt 50 kappskákir á síðustu 24 mánuðum fyrir árið 2010 og 60 skákir fyrir árið 2011 og síðar.
• Hafa sýnt umtalsverðar framfarir á sl. 12 mánuðum, sem sjáist m.a. á árangri á skákmótum ársins, hækkun skákstiga og reglulegri þjálfun.
• Hafa sýnt virkni í skákmótum innanlands.

2.     Ungir skákmenn (25 ára og yngri) hafa forgang þegar kemur að úthlutun ferðastyrkja. Eftirfarandi börn og unglingar njóta sérstaks forgangs:

• Undir 12 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 12-16 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 16-20 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)
• 20-25 ára: 2 stigahæstu og/eða þeir sem hækkað hafa mest á stigum undanfarna 12 mánuði (bæði í stráka- og stúlknaflokki)

3.     Alþjóðlegir meistarar geta fengið ferðastyrki frá SÍ óháð aldri.

4.     Þeir sem þiggja stórmeistaralaun geta ekki fengið almenna ferðastyrki frá SÍ.

5.     Aðrir skákmenn geta fengið ferðastyrki ef þeir ná árangri sem samsvarar 2350 stigum eða meira ("performance") í móti sem styrkur er sóttur um. Ákvörðun um styrkveitingu er tekin eftir mót.

Umsóknareyðublöð og skil 

Allir sem sækja um styrk til SÍ þurfa að leggja fram umsókn á þar til gerðu rafrænu eyðublaði.

Rafræna eyðublaðið

Þar á að koma fram hvers vegna tiltekið skákmót er valið og hvers vegna viðkomandi telur að hann hafi rétt á styrk frá SÍ skv. ofangreindum skilyrðum.

Í umsókninni skal lögð fram æfingaáætlun þar sem þjálfun fyrir tiltekið mót og þátttaka á skákmótum næstu 3 mánuði er skýrð.

Ef umsókn er ófullnægjandi og ekki skilað á þann hátt sem að ofan greinir, er henni sjálfkrafa vísað frá. 

Styrkir SÍ eru afgreiddir þrisvar sinnum á ári. 10. febrúar, 10. júní og 10. október. Sækja þarf um styrkina í lok mánaðarins á undan. Ætlast er til að sótt sé um styrki áður en haldið er mót en ef góðar aðstæður valda því að sótt er um eftir á er tekið tillit til þess.

Tímabundið sérákvæði: Þar sem þessar reglur eru  settar á í júní 2013 er umsóknarfrestur lengdur til júníloka 2013. Svör við umsóknunun sem bárust/berast eftir 10. júní verða afgreiddar eigi síðar en 10. júlí 2013.

Sérstök styrkjanefnd, skipuð af stjórn SÍ, fer yfir allar umsóknir og gerir tillögur til stjórnar um afgreiðslu styrkja hverju sinni. 

Að jafnaði getur enginn fengið meira en 60.000 krónur á ári í styrk frá SÍ, nema þegar hann er fulltrúi Íslands á alþjóðlegum mótum erlendis. Ef einhver þykir skara sérstaklega fram úr á sl. 12 mánuðum er þó hægt að gera undantekningu á þessari reglu og hækka árlegan styrk til viðkomandi aðila. 

Skyldur styrkþega gagnvart SÍ: 

Að loknu móti skulu styrkþegar senda stutta frásögn til styrkjanefndar og skýra skák frá mótinu sem þeir hlutu styrk til að taka þátt í. Styrkjanefnd mun síðan birta greinina í einhverjum miðli skákhreyfingarinnar.

Ef stjórn SÍ fær áreiðanlegar upplýsingar um ósæmilega og vítaverða hegðun styrkþega á skákstað (t.d. áfengisnotkun á meðan á móti stendur) og ef styrkþegi hættir á skákmóti án löglegra forfalla, mun viðkomandi vera sviptur þeim styrk sem honum var veittur. Viðkomandi mun auk þess ekki koma til greina við úthlutun styrkja SÍ næstu 12 mánuði.

Styrkir eru borgaðir út eftir að skákmóti lýkur, þegar ljóst er að skyldur styrkþega hafa verið uppfylltar. 

Reglur um áfangastyrki og boð á EM-einstaklinga 

Stórmeistara áfangar: SÍ veitir íslenskum skákmanni sem nær stórmeistara áfanga karla 300þús krónur. Hægt er að fá tvo þannig styrki.

Alþjóðlegir áfangar: SÍ veitir íslenskum skákmanni sem nær alþjóðlegum áfanga  karla 100þús krónur. Hægt er að fá þrjá þannig styrki.

Áfangastyrkir eru ekki veittir þeim sem hafa náð viðkomandi titlum.

EM-einstaklinga í opnum flokki: 

Sigurvegari á Skákþingi Íslands er sendur af SÍ á næsta EM-einstaklinga.  

Ef íslenskur skákmaður,

a) nær að fara yfir 2600 FIDE-stig síðustu tólf mánuði fyrir EM

b) eða vinnur Reykjavíkurmótið (jafnt efsta sæti nægir)

c) eða nær árangri 7.umferða eða lengra skákmóti, sem mælist sem frammistaða ("performance") upp á 2670 FIDE-stig eða meira og innifelur GM-áfanga árangur

þá býður SÍ honum á næsta EM einstaklinga.

Ef stutt er frá því að réttur til EM náðist fram að næsta móti, er heimilt að taka boðið út á þarnæsta EM í staðinn.

 

EM-einstaklinga í kvennaflokki: 

Ef íslensk skákkona nær,

a) alþjóðlegum áfanga karla

b) eða nær árangri í 7.umferða eða lengra skákmóti sem mælist sem frammistaða ("performance") upp á 2450 FIDE-stig eða meira og innifelur WGM-áfanga árangur

þá býður SÍ henni á næsta EM-einstaklinga í kvennaflokki.

Ef stutt er frá því að réttur til EM náðist fram að næsta móti, er heimilt að taka boðið út á þarnæsta EM í staðinn.

Tal Memorial: Carlsen vann Kramnik

Tal Memorial hófst í dag í Moskvu. Stigahæsti skákmaður heims, Magnus Carlsen (2868), gerði sér lítið fyrir og vann Kramnik (2811) í fyrstu umferð. Caruana (2774) lagði heimsmeistarann Anand (2783). Flottasta skák umferðarinnar var hins vegar sigur Mamedyarov (2753) á Nakamura (2775). Aserinn fórnaði manni á laglegan hátt í 19. leik. Fórnina verður að finna í skákdálki Fréttablaðsins á laugardag.

Meðal frétta á heimasíðu mótshaldara er um Boris Spassky. Skráningu hans á stigalista FIDE hefur verið breytt en þar er hann nú skráður Rússi en frá 1984 og þar til nú hefur hann verið þar skráður á stigalistanum sem Frakki.

Önnur umferð fer fram á morgun og hefst kl. 11.

• Heimasíða mótsins
• Beinar útsendingar
• Chessbomb

Friðrik tefldi fjöltefli á Júní-námskeiði Skákskóla Íslands

Friðrik Ólafsson tók í dag fjöltefli á Júní-námskeiði Skákskóla Íslands. Friðrik tefldi við 25 krakka. Alls vann 19 af þeim en gerði sex jafntefli við hann. Sex gerðu jafntefli við hann en það voru þeir Jason Andri Gíslason, Dawid Kolka, Jóhann Arnar Finnsson, Felix Steinþórsson og tvíburarnir Bárður Örn og Björn Hólm Birkissynir.

Hér má smá myndbrot frá upphafi fjölteflisins.

 

 

Ný alþjóðleg bréfskákstig - Daði Örn stigahæstur Íslendinga

Í byrjun júní voru birt ný alþjóðleg bréfskákstig. 22 virkir Íslendingar eru á nýja listanum og er Daði Örn Jónsson hæstur þeirra með 2519 elóstig. Stigahæsti bréfskákmaður heims er hollenski stórmeistarinn Jopp J. Van Oosterom með 2711 elóstig.

Röð	Titill	Nafn	Skákir	Stig
1	IM	Jónsson, Daði Örn	34	2519
2	SIM	Halldórsson, Jón Árni	274	2480
3	IM	Kristjánsson, Árni H.	255	2463
4	SIM	Pálsson, Jón Adólf	388	2460
5		Þorsteinsson, Þorsteinn	20	2438
6	SIM	Kárason, Áskell Örn	242	2412
7		Jónasson, Jónas	167	2408
8		Skúlason, Baldvin	113	2400
9	IM	Haraldsson, Haraldur	237	2388
10		Maack, Kjartan	76	2337
11		Elíson, Kári	418	2329
12		Guðlaugsson, Einar	315	2314
13		Jónsson, Kristján Jóhann	201	2252
14		Þorsteinsson, Erlingur	139	2249
15		Vigfússon, Vigfús Ó.	162	2217
16		Ingason, Sigurður	18	2189
17		Kristjánsson, Snorri Hergill	40	2171
18		Rúnarsson, Gunnar Freyr	151	2152
19		Hjaltason, Gisli	22	2133
20		Ragnarsson, Jóhann H.	130	2083
21		Gíslason, Guðmundur	58	2021
22		Hannesson, Sigurður Örn	26	1973

 

Sigurbjörn: Skemmtilegu Íslandsmóti lokið

Sigurbjörn Björnsson hefur skrifað góðan og mjög athyglisverðan pistil um Opna Íslandsmótið í skák. Þar segir meðal annars:

Mótið sjálft var vel heppnað og áður hef ég hrósað skákstaðnum og mótshöldurum. Það var fínt að tefla þarna og væri gaman ef mótið yrði á sama stað að ári, það hlýtur að vera gott fyrir alla aðila að nota þetta húsnæði meðan það er autt og ófrágengið að öðru leyti. Ég hef sagt það áður og endurtek nú að það er sjálfsagt mál að hafa mótið opið í tilefni af 100 ára afmæli mótsins en að sama skapi tel ég afar brýnt að mótið verði lokað á nýjan leik á næsta ári. Mótið hefur einfaldlega meiri vigt sé það lokað og það reynir meira á keppendurna sem þýðir að það nýtist keppendum betur í þeirri viðleitni að verða betri skákmenn.

Áður en mótið hófst las ég viðtalið við Friðrik Ólafsson í nýjasta SKÁK og tók ég sérstaklega eftir svari hans við spurningunni hvernig honum litist á skáklíf Íslendinga. Svar Friðriks var á þá leið að áhuginn virðist vera mikill en styrleikinn mætti vera meiri. Undir þetta tek ég heilshugar og vil ég líta á þetta sem áskorun Friðriks til skákmanna á Íslandi að bæta sig. Að mínu viti á þetta ekkert bara við toppmennina heldur líka við þá sem eru stigalægri. Áhuginn hlýtur að vera frumforsenda árangurs og á meðan áhuginn er mikill þá á að vera hægt að bæta sig, sama á hvaða styrkleikabili menn eru. Hver og einn skákmaður ætti að taka þessa áskorun Friðriks til sín og reyna að bæta sig sem skákmaður og að sama skapi tel ég að SÍ/Skákskólinn ætti að móta sér stefnu um það hvað sambandið geti gert til þess að eignast betri skákmenn. Ég tel að sóknarfærin séu mikil og það er hægt, án mikils tilkostnaðar, að fara markvisst í að búa til betri skákmenn. Það mætti t.d. prófa að halda námskeið sem standa undir sér sjálf fyrir skákmenn sem vilja læra að stúdera og vilja kynnast réttum aðferðum við að bæta sig.

Pistilinn má nálgast í heild sinni á Skakbaekur.is.

 

Dagur með jafntefli við stórmeistara í 2. umferð

Alþjóðlegi meistarinn Dagur Arngrímsson (2396) gerði jafntefli við makedónska stórmeistarann Dmitry Svetushkin (2605) í 2. umferð Golden Sands-mótsins sem fram fór í gær. Dagur hefur 1½ vinning. Í 3. umferð, sem fram fer í dag, teflir Dagur við úkraínska stórmeistarann Yuri Solodovnichenko (2565).

222 skákmenn taka þátt frá 31 landi. Þar af eru 38 stórmeistarar og 46 alþjóðlegir meistarar. Dagur er nr. 65 á stigum.

• Heimasíða mótsins
• Chess-Results
• Beinar útsendingar (hefjast kl. 12)

Hannes XII. mætir á Strandir!

Hannes Hlífar Stefánsson, tólf-faldur Íslandsmeistari í skák, var rétt í þessu að staðfesta þátttöku sína á Afmælismóti Jóhanns Hjartarsonar í Trékyllisvík, 22. júní 2013. Hannes er fimmti i stórmeistarinn sem boðar komu sína á Strandir -- og fleiri eru í sigtinu. Ljóst er að margir vilja heiðra Jóhann, hinn ástsæla skákmeistara, sem næst allra Íslendinga hefur komist krúnu heimsmeistara.

Stórmeistararnir eru Jóhann Hjartarson, Hannes Hlífar Stefánsson, Helgi Ólafsson, Henrik Danielsen og Jón L. Árnason. 

Skákhátíð í Árnreshreppi verður haldin dagana 21. til 23. júní næstkomandi, og er þetta sjötta árið í röð sem Hrókurinn efnir til skákveislu í afskektustu og fegurstu sveit landsins, en skákstarf félagsins í sveitinni teygir sig enn lengra aftur.

 Skákhátíð í Árneshreppi hefur unnið sér sess sem gleði- og uppskeruhátíð skákmanna. Allar upplýsingar hér:Skákhátíð.

Mjög vel heppnað Íslandsmót í Turninum

Skákþing Íslendinga var fyrst haldið í janúar 1913 að ég held á Hótel Íslandi. Taflfélag Reykjavíkur hélt mótið fram til ársins 1926 en hið nýstofnaða Skáksamband Íslands tók við mótinu 1927 og hefur haldið það síðan. Síðar breyttist heiti mótsins í Skákþing Íslands en er reyndar kallað í daglegu tali  Íslandsmótið í skák. Mótið hefur reyndar fallið niður tvisvar sinnum og mótið í ár var því hið 99. sem haldið er.

Í tilefni 100 ára afmælis mótsins var ákveðið að halda mótið með gerbreyttu fyrirkomulagi. Mótið var opið og öllum gefinn kostur á tefla í efsta flokki - eitthvað sem aldrei hefur verið gert áður. Hugmyndin kom frá Hrafni Jökulssyni eins og margar góðar hugmyndir. Nærri 70 keppendur tóku þátt og þar af fjórir sem komu erlendis frá.

Segja má að sú hugmynd hafi gengið vonum framar og í ljós kom að þær gagnrýnisraddir á fyrirkomulagið áttu sér fáar stoðir. Fyrsti stórmeistaraáfanginn í sögu þessa 100 ára móts náðist, eitthvað sem aldrei kom í hús á meðan teflt var í lokuðum 10-14 manna flokkum. Varað var við að efstu menn myndu ekki mætast.  Þegar lokastaðan er skoðuð sést að það voru einungis Hjörvar og Héðinn sem mættust ekki  og að Hannes og Björn tefldu báðir við alla sínu helstu andstæðinga.

Teflt var við einstakar aðstæður, það er á 20. hæðinni í Turninum í Borgartúni. Sú hugmynd kom upp úr samtali Stefáns Bergssonar og Hrafns Jökulssonar og reyndar dóttur hans Jóhönnu Engilráð en feðginin höfðu skoðað hæðina. Hæðin var hrá - nánast fokheld. Þegar Albert húsvörður í Höfðatorgi, sem á húsnæðið og lánaði okkur fyrir málamyndaleigu, sýndi mér húsnæðið féll ég strax fyrir því. Auðvitað var ljóst að alls konar erfiðleikar voru til staðar enda takmarkað rafmagn til staðar, ekkert net, engir stólar og borð, takmörkuð lýsing, engin gluggatjöld, takmörkuð og hávær loftræsting, ekkert rennandi vatn nema þá á salernum, takmörkuð salernisaðstaða og fleira í þeim dúr. En þetta voru allt leysanleg verkefni og ekki stór vandamál.

Þegar ég sýndi svo stjórn SÍ og Ásdísi framkvæmdastjóra og Birnu, sem ætlaði að sjá um veitingarnar  og þrif, húsnæðið féllust þeim Ásdísi og Birnu og andlit þeirra sagði: „Jæja, nú er Gunnar minn, endanlega farinn".

Allt gekk þetta upp. Vodafone lagði fram net, Arion banki lánaði lampa og skjávarpa, Selecta lagði fram vatn, Menntaskólinn við Hamrahlíð lánaði stóla, Ráðhús Reykjavíkur lánaði okkur borð, við fengum aðgang að salernum á 17. hæðinni og starfsmenn Eyktar hjálpuðu til með með ýmislegt á skákstað eins og t.d. loftræstingu.

Eftir margar vinnustundir í aðdraganda mótsins var allt orðið tilbúið á skákstað. Illugi Gunnarsson, menntamálaráðherra, mætti á staðinn og setti mótið. Illuga var tíðrætt um mikilvægi skákar í skólum - eitthvað sem rímar frábærlega við verkefnið - Skák eflir skóla - sem ráðuneytið hefur ýtt úr vör.

Mótið var hafið. Strax bar til tíðinda í fyrstu umferð þegar Loftur Baldvinsson átti sennilega skák líf síns og lagði Braga Þorfinnsson að velli með hverri fórninni á fætur annarri. Og þetta gaf tóninn fyrir óvænt úrslit í umferð eftir umferð. Fleiri misstigu sig í byrjun móts. Héðinn Steingrímsson tapaði fyrir Skotanum Michael Grove í 2. umferð og skyndilega voru tveir af þeim sigurstranglegri komnir með einn niður.0

Fljótlega tók Hannes Hlífar Stefánsson forystuna og það var ljóst að hann væri í banastuði. Hannes sem átti skelfilegt mót í fyrra, þegar hann fékk aðeins 50% vinningshlutfall, lagði bræðurna Björn og Braga Þorfinnssyni að velli, en í fyrra tapaði hann fyrir þeim báðum.

Hannes hafði eins vinnings forskot á bræðurna fyrir lokaumferðina og mætti þá Héðni. Héðinn vann þá skák eftir að Hannes lék af sér manni.

Þá reyndi á nýlegar breytingar á lögum SÍ. Áður hafði það verið bundið í lög að tefldar væru a.m.k. fjórar kappskákir í einvígi ef tveir yrðu efstir. Á aðalfundi SÍ í vor var það afnumið og þar kemur fram að SÍ ákveði fyrirkomulag úrslitakeppni hverju sinni. Stjórn SÍ hafði ákveðið að ef tveir eða fleiri yrðu efstir og jafnir myndu tveir efstu eftir stigaútreikning tefla einvígi sama dag og mótinu lyki. Þetta er í samræmi við þróunina út í heimi. Langar úrslitakeppnir heyra einfaldlega sögunni til og það meira segja í heimsmeistarakeppninni sjálfri. Menn vilja endapunkt.

Í fyrra, í einvígi Þrastar og Braga voru örfáir áhorfendur þegar þeir tefldu kappskákirnar en mikið fjölmenni þegar lokaátökin fóru fram. Sama gerðist nú; um 80 manns fylgdust með úrslitaeinvígi Hannesar og Björns á staðnum og u.þ.b. jafnmargir með vefútsendingunni frá einvíginu. Þetta er fyrir utan þá sem horfðu svo á skákirnar sjálfar í gegnum netið. Ég skynjaði á samtölum við fólk að langflestir sterkustu skákmenn landsins væru mjög sáttir við þá breytingu að stytta úrslitakeppnina og það kom einnig fram í máli Björns í ræðu sem hann hélt að móti loknu.

Að loknu einvígi fór fram lokahóf og verðlaunaafhending. Til að byrja var klappað fyrir minningu skákvinarins Hermanns Gunnarssonar sem reynst hefur skákhreyfingunni dyggur þjónn í gegnum tíðina. Hannes fékk Íslandsmeistaratitilinn í tólfta sinn. Hann hefur nú unnið titilinn í 12 af 13 síðustu skiptum sem hann hefur tekið þátt! Hannes verður einnig sendur á vegum SÍ á EM einstaklinga sem fram fer í Yerevan í Armeníu á næsta ári. Silfurhafinn, Björn Þorfinnsson, verður hins vegar fulltrúi SÍ á NM í skák sem fram fer í Köge Kyst í Danmörku í október. Björn náði sínum fyrsta áfanga að stórmeistaratitli með þessum frábæra árangri. Þeir félagar Hannes og Björn tefldu frísklegast og best í mótinu.

Þeir bræður Björn og Bragi hafa skipst á því að vera í öðru sæti á Íslandsmótinu skák síðan 2009. Bragi varð annar í fyrra í Kópavogi og í hitteðfyrra á Eigðum og 2009 í Bolungarvík. Björn varð svo annar nú og árið 2010 í Mosfellsbæ. Það hlýtur að styttast í gullið hjá þeim bræðrum!

Hjörvar Steinn og Héðinn urðu jafnir í þriðja og fjórða sætið. Hjörvar fékk bronsið eftir stigaútreikning. Henrik Danielsen, Guðmundur Gíslason og Bragi urðu jafnir í 5.-7. sæti. Fimm efstu menn eiga tryggt sæti í landsliðsflokki að ári fyrir árangur nú, þ.e. Hannes, Björn, Hjörvar, Héðinn og Henrik.

Lenka Ptácníková varð Íslandsmeistari kvenna annað árið í röð og í fimmta skipti alls. Jóhanna Björg Jóhannsdóttir og Elsa María Kristínardóttir urðu næstar. Jóhanna tók silfrið eftir stigaútreikning og Elsa fékk bronsið.

Veitt voru sérstök verðlaun fyrir bestan árangur í samanburði við skákstig bæði fyrir þá sem höfðu meira en 2000 skákstig og þá sem höfðu 1000-2000 skákstig. Björn tók þau verðlaun fyrir hina stigahærri og hinn ungi og efnilegi skákmaður, Vignir Vatnar Stefánsson, tók þau fyrir hina stigalægri. Þess má geta Vignir er barnabarnabarn fyrsta Íslandsmeistarans í skák, Péturs Zóphaníassonar.

Alltaf er gaman að skoða hverjir hækka mest á stigum. Símon Þórhallsson hækkar mest allra á alþjóðlegum skákstigum fyrir frammistöðuna eða um 72 skákstig. Vignir Vatnar (47), Felix Steinþórsson (35) og Björn Þorfinnsson (26) komu næstir.

Vignir hækkar mest á íslenskum stigum eða um 103. Næstir eru Baldur Teódór Petersson (96), Hilmir Freyr Heimisson (79) og Símon Þórhallsson (78) og Felix (75).

Það komu margir að þessu móti. Má nefna skákstjórana Ríkharð Sveinsson, sem þurfti á köflum að taka á erfiðum málum, Omar Salama, Ólaf S. Ásgrímsson og Róbert Lagerman. Omar og Rikki sáu auk þess um beinar útsendingar ásamt Steinþóri Baldurssyni sem var heilinn á bakvið vefútsendinguna. Þórir Benediktsson sá um innslátt skáka og Ingvar var formaður dómnefndar um val á skák hverrar umferðar og sá um heimasíðu mótsins. Stefán Bergsson var lykilmaður í undirbúningi mótsins og átti heiðurinn af úrklippunum. Hrafn Jökulsson kom að myndatökum auk þess að eiga þessu skemmtilega hugmynd um mótshaldið. Ásdís Bragadóttir var sem fyrr algjörlega ómissandi og gerir margt að því sem menn ekki sjá. Birna Halldórsdóttir hélt uppi Birnukaffi og sá auk þess um mörg önnur verkin. Algjör perla hún Birna. Og fjöldi annarra stjórnarmanna hjálpuðu við mótið.

Ýmsir styrktaraðilar komu að mótinu. Má þar nefna Icelandic, N1, Olís, Íslandsbanka, LS-Retail, Markó Partners, Borgun og Ölgerð Egils Skallagrímssonar. Hamborgarfabrikkan gaf svo verðlaun fyrir skák umferðirnar, alls 20 máltíðir.

Allir þessir aðilar sem og aðrir sem studdu við mótið fá miklar þakkir fyrir.

Nú er spurning hvernig fyrirkomulagið verður að ári!

Gunnar Björnsson

Sumarnámskeið í Skákskólanum

Þessa vikunna stendur yfir júní-námskeið í Skákskóla Íslands. Fjölmargir þátttakendur eru á námskeiðinu sem hefur gengið afskaplega vel. Meðal kennara á námskeiðinu eru Helgi Ólafsson, sem er auk þess aðalskipuleggjandi þess, Héðinn Steingrímsson, Hjörvar Steinn Grétarsson og Lenka Ptácníková. Í gær var Daði Örn Jónsson, einn fremsti skákforritasérfræðingur landsins og jafnframt einn sterkasti bréfskákmaður landsins með fyrirlestur um skákreikna.

Myndirnar tvær er að finna þaðan. Góður rómur er að námskeiðinu meðal nemenda.