Norðurlandamót stúlkna hefst í dag

Norðurlandamót stúlkna 2013 hefst í kvöld í Limhamn Folkets Hus, Malmö, Svíþjóð.

 

Íslensku keppendurnir á mótinu eru:

 

A-flokkur

Jóhanna Björg Jóhannsdóttir, 1896

Hrund Hauksdóttir, 1686

 

B-flokkur

Veronika Steinunn Magnúsdóttir, 1577

Sóley Lind Pálsdóttir, 1415

 

C-flokkur

Nansý Davíðsdóttir, 1504

Svandís Rós Ríkharðsdóttir , 1352

 

 

Fyrsta umferðin hefst klukkan 16:30 að íslenskum tíma.

 

Beinar útsendingar:

http://www.limhamnssk.se/live/ (flash)

http://www.limhamnssk.se/live/jslive.php 

 

Myndir:

http://www.flickr.com/photos/limhamnssk/sets/72157633191277159/

 

Úrslit og röðun:

A flokkur

B flokkur

C flokkur

 

Davíð Ólafsson

Skráning á skákmót Árnamessu heldur áfram í dag á netinu - fjör færðist í skráninguna í gær

Hún tók vel við sér skráningin á Skákmót Árnamessu í gær fimmtudag og nú þegar er ljóst að stór hópur ungra og efnilegra skákmanna, drengja og stúlkna, mun taka þátt í þessu skákævintýri sem hefst stundvíslega í grunnskólanum í Stykkishólmi á morgun kl. 13:00. Rúta frá Reykjavík leggur af stað kl. 9:30 frá BSÍ og tekur upp keppendur á N1 í Ártúnshöfða.

Í dag föstudag verður áfram tekið við skráningum á www.skak.is . Meðal þátttakenda verða nýkrýndir Íslandsmeistarar barnaskólasveita, A sveit Álfhólsskóla, sem fékk m.a. boðsmiða á Árnamessu í verðlaun fyrir sigurinn. Henrik Danielsen stórmeistari hefur í gær og í dag verið við skákkennslu í grunnskólanum i Stykkishólmi og því má búast við hópi þátttakenda frá Snæfellsnesi á skákmótið.

Alls eru komin 37 verðlaun og happadrættisvinningar og því líklegt að meirihluti keppenda koma heim með verðlaun af mótinu. Tefldar verða sex umferðir með 10 mínútna umhugsunartíma.

Skákþing Norðlendinga hefst í kvöld - Hannes og Sveinbjörn meðal keppenda

Skákþing Norðlendinga verður haldið á Sauðárkróki helgina 19.-21. apríl n.k.  Samkvæmt venju verða tefldar 7 umferðir. Fjórar atskákir með 25 mín. umhugsunartíma á föstudagskvöldi. Tvær umferðir með umhugsunartímanum 90 mín + 30 sek á leik og lokaumferðin á sunnudegi með sama umhugsunartíma. Á lokinni 7. umferð á sunnudeginum verður  haldið Hraðskákmót Norðlendinga. Kappskákirnar verða reiknaðar til alþjóðlegra stiga.

Allir skákmenn eru velkomnir á Skákþing Norðlendinga, en einungis þeir sem eru með lögheimili á Norðurlandi geta öðlast nafnbótina Skákmeistari Norðlendinga. Heildar verðlaunafé á mótinu verður a.m.k. 160.000 krónur, en fjöldi þátttakenda hefur áhrif á verðlaunafé. Fyrstu verðlaun eru áætluð 65.000 krónur, önnur verðlaun 35.000 og þriðju verðlaun 25.000. Einnig verða veitt peningaverðlaun fyrir þá sem hafa undir 2000 íslensk Elo stig 20.000 krónur og þá sem hafa undir 1800 íslensk Elo Stig 20.000 krónur. Keppendur geta aðeins unnið til aukaverðlauna í einum flokki.  

Hótel Tindastóll, Gistiheimilið Mikligarður og Gistiheimilið Sólarborg gefa þátttakendum í mótinu 10% afslátt af gistingu. Til viðmiðunar er verð fyrir gistingu með morgunverði um 16.000 krónur á mann í gistiheimilunum og er þá miðað við tvo í herbergi í tvær nætur.  Nánari upplýsingar um tilboðið verða sendar í tölvupósti til áhugasamra.

Mótsgjöld eru kr. 2000 en ekkert kostar að taka þátt í hraðskákmótinu. Innifalið í verði er kaffi og meðlæti á stundum.

Skráning fer fram í netfanginu: [e-mail] og er þar hægt að fá nánari upplýsingar um framkvæmd mótsins.

Teflt verður í Safnahúsi Skagfirðinga. Nánari upplýsingar um tímasetningu umferða, þátttakendur o.fl. verða birtar fljótlega hér á heimasíðunni.

Mótsstjóri verður Gunnar Björnsson forseti Skáksambands Íslands.

Nánari upplýsingar um mótsfyrirkomulag o.fl. má finna á heimasíðu Skákfélags Sauðárkróks.

Upplýsingar um þegar skráða keppendur má finna á Chess-Results en meðal þegar skráðra keppenda er stórmeistarinn Hannes Hlífar Stefánsson og Sveinbjörn O. Sigurðsson.

Pistill: Stórgóð skákheimsókn á Blönduós - upphafsstað Skáksambandsins

Skákheimsóknin á Norðurlandi vestra hélt áfram í dag þegar skákbærinn Blönduós, þar sem Skáksambandið var stofnað 23. júní 1925, var heimsóttur. Við Stefán Bergsson hófum heimsóknina í Blönduskóla þar sem Berglind Björnsdóttir aðstoðarskólastjóri tók á móti okkur. Boðið var upp á skákkennslu/skákkynningu í skólanum sem langflestir nemendur sóttu.

Hannes Hlífar Stefánsson, stórmeistari, ellefufaldur Íslandsmeistari í skák og skákkennari við Skákskólann bættist við í hópinn í dag eftir að hafa komið fljúgandi með Eyjaflugi í flugi í morgun og tók þátt í kennslunni með okkur.

Vel gekk í Blönduskóla. Margir krakkanna þekktu vel til skákarinnar og voru ákaflega áhugasamir. Ólafur Sigfús Benediktsson (Óli Ben) og Brynhildur Erla Jakobsdóttir íþróttakennarar hafa ýtt undir skákiðkun í skólanum og verið með skákkennslu öðru hvoru sem hafði greinilega skilað sér.

Að lokinni skákkennslunni kíktum við á gamla læknisbústaðinn, sem nú er íbúðarhúsnæði, þar sem Skáksambandið var stofnað árið 1925. Utan á því húsnæði er skjöldur sem settur var á það árið 1985 þegar afmælismót SÍ var haldið. Við Hannes Hlífar tókum einmitt báðir þátt í því móti.

Ástæðan fyrir því að Skáksambandið var stofnað á Blönduósi er merkileg. Það voru norðlensk félög sem stofnuðu Skáksambandið en freistuðu þess mjög að fá Taflfélag Reykjavíkur, sem var þá langstærsta og öfluga félag landsins, til að taka þátt í stofnun SÍ. Til þess að auka líkurnar á að TR tæki þátt í stofnunni var þess freistað að færa stofnfundinn nær Reykjavík. Sú tilraun mistókst en TR gekk í Skáksambandið ári síðar og SÍ tók svo við Skákþingi Íslands árið 1927 af TR, sem hafði haldið mótið frá 1913.

Við hittum Arnar Þór Sævarsson, bæjarstjóra Blönduóss, og fórum meðal annars yfir hvernig mætti minnast 90 ára afmælis SÍ eftir tvö ár auk þess sem við gáfum bænum sögu SÍ sem rituð var af Þráni Guðmundssyni, fyrrvervandi forseta SÍ, í tilefni 70 ára afmæli SÍ árið 1995.

Af því loknu var haldið í Blönduóslaug. Þar var sundlaugarsett vígt af bæjarstjóranum og Óla Ben íþróttakennara. Í ljós kom að þeir félagarnir eru báðir býsna góðir skákmenn. Bæjarstjórinn var á góðri leið að vinna skákina en augnabliks einbeitingarleysi varð til þess að hann lék af sér sem íþróttakennarinn var ekki lengi að nýta sér og hafði sigur.

Við gáfum einnig taflsett á bæjarskrifstofuna sem og íþróttamiðstöðina.

Á morgun förum við í Árskóla á Sauðarkróki og einnig verða þrjú sundlaugarsett gefin til bæjarfélagsins, þ.e. á Sauðárkrók, Hofsós og Varmahlíð. Um kvöldið hefst svo Skákþing Norðlendinga þar sem 22 keppendur eru skráðir til leiks.

Það er skemmtilegt frá því að segja að þeir skólar sem við höfum ekki heimsótt í þessari heimsókn á Norðurlandi vestra hafa haft samband og „kvartað" yfir því að höfum ekki sinnt þeim. Segir manni að skákáhugi er mikill á landsbyggðinni og sóknarfæri mikil!

Myndaalbúm (GB og Róbert Daníel Jónsson, forstöðumaður íþróttamiðstöðvarinnar).

Skólaskákmót Kópavogs í sveitakeppni fyrir grunnskólanemendur

Skólaskákmót Kópavogs í sveitakeppni fyrir grunnskólanemendur verður haldið sunnudaginn 28. apríl nk. í Álfhólsskóla (Hjallamegin). 

Keppt er í fjórum flokkum:

Kl. 11.00- 13.30 5 umferðir og 2x5 mín umhugsunartími

• 1. flokkur 1.-2. bekkur
• 2. flokkur 3.-4. bekkur

Kl. 14.00 - 17.00 5 umferðir og 2x10 mín umhugsunartími

• 3. flokkur 5.-7. bekkur
• 4. flokkur 8.-10. bekkur

Allir krakkar sem kunna skákreglur og eru skráðir til náms við grunnskóla í Kópavogi eru velkomnir og er aðgangur ókeypis.  Gull, silfur og brons verðlaun verða veitt fyrir hvern flokk fyrir sig. Hverjum liði þarf að fylgjast liðstjóri. Yngri krakkar geta teflt í eldri flokki.

Liðin verða að skrá sig fyrir kl 12:00 föstudaginn  26. apríl 2013.

Skráning fer fram á [e-mail] .

Lundarskóli Akureyrarmeistari grunnskólasveita

Þriðjudaginn 16. apríl sl. var háð sveitakeppni grunnskóla á Akureyri.  Að þessu sinni sendu þrír skóla sveitir til keppni. Viðstaddir varamenn og áhugamenn úr öðrum skólum skipuðu svo fjórðu sveitina sem fékk það virðulega nafn "Samsafn", en skákir þeirrar sveitar reiknuðust ekki í baráttunni um sigurlaunin í keppninni. Fyrirfram mátti búast við því að Lundskælingar og Brekkskælingar myndu bítast um sigurinn, enda í báðum sveitum harðsnúnir skákmenn sem æft hafa lengi með Skákfélaginu.  Sveit Glerárskóla - sem reyndar vann mótið í fyrra - mátti heita heldur veikari, enda aðeins fyrstaborðsmaður þeirra sem stundar reglulegar skákæfingar eftir því sem best er vitað. Þátttaka þeirra setti þó skemmtilegan svip á mótið.

Í fyrstu umferð vann Lundarskóli Glerárskóla á öllum borðum 4-0. Í þeirri næstu fékk Glerárskóli 1/2 vinning gegn 3 1/2 vinningi Brekkuskóla og þegar úrslitaviðureign tveggja efstu skólanna lauk með bræðrabyltu 2-2 lá ljóst fyrir að Lundarskóli hafði sigrað með hálfs vinnings mun. Var lengi tvísýnt um úrslitin, en Lundaskóli knúði fram sigur á tveimur efri borðunum, en Brekkuskóli vann á 3. og 4. borði.

Ef skákir við samsafns eru taldar með urðu heildarúrslit sem hér segir: 1. Lundarskóli 9 vinninga; 2. Brekkuskóli 7,5; 3. Samsafn 3 og 4. Glerárskóli 2,5.

Sigursveit Lundarskóla skipuðu þeir Jón Kristinn Þorgeirsson (1. borð), Símon Þórhallsson (2. borð), Guðmundur Aron Guðmundsson (3. borð), Gunnar Aðalgeir Arason (4. borð) og Atli Fannar Franklín.

Sveit Brekkuskóla var skipuð þeim Andra Frey Björgvinssyni, Óliver Ísak Ólasyni, Magnús Mar Võljaots, Aðalsteini Leifssyni og Ísak Svavarssyni.  Fyrir Glerárskóla tefldu þau Tinna Ósk Ompi Rúnarsdóttir, Baldvin Ingvarsson, Bjarni Magnússon, Júlíus Þór Björnsson Waage og Sóley Dögg Rúnarsdóttir.  Leiðtogi samsafnsins var svo Benedikt Stefánsson úr Þelamerkuskóla.

Herimasíða SA - myndskreytt frásögn

Gallerý Skák - Gunni Gunn bar sigur úr bítum

Skákkvöldum vetrarins fer fækkandi enda sumardagurinn fyrsti á næsta leiti.  Í síðustu viku var fjölskrúðugur hópur ástríðuskákmanna mættur til tafls í Bolholtinu þar sem öllum er frjálst að koma við  til spreyta sig og sjá aðra kl. 18 á fimmtudögum.  Engan vinning er hægt að bóka fyrirfram - nokkuð sem menn skyldu jafnan varast og ýmsir hafa bitra reynslu af, jafnvel þó stutt sé í mátið.  

Sigurvegari kvöldsins hin síungi en þó aldni meistari Gunnar Kristinn Gunnarsson mátti þó hafa sig allan við að þessu sinni til að landa sigri enda með 3 niður fyrir lokaumferðina. En það tókst og hann vann mótið með 8 vinningum að 11 mögulegum og gat leyft sér að brosa breitt. Fast á hæla honum komu þeir Guðfinnur „annar"  og   baráttujaxlinn Þórarinn Sigþórsson, tannlæknir, með 7.5 v.  Jón Steinn Elíasson, fiskverkandi, gerði það einnig gott varð fjórði með sjö vinninga.

 Ungi pilturinn Guðmundur Agnar Bragason, 11 ára, kom í heimsókn ásamt Gísla Gunnlaugssyni „fóstra" sínum og sýndi að þar er stórefnilegur skákmaður á ferð  - varð efstur í flokki 50 ára og yngri - og var leystur út með glæsilegu síðbúnu Geirfuglspáskaeggi.   

Mótið var óvenju jafnt að þessu sinni aðeins munaði 1 vinningi á þeim sem voru  í 5. til 12. sæti eins og sést á meðf. mótstöflu.

 

 

Teflt verður í Gallerýinu í kvöld (18. apríl) og síðan næst þann 2. maí, sem jafnframt verður eins konar lokahóf/tafllok  með einhverjum óvæntum uppákomum. /ESE

Flugfélagi Íslands og Ístaki þökkuð liðveisla við útgáfu fyrsta grænlenska skákkversins

Það var skemmtileg stund á Reykjavíkurflugvelli í morgun þegar Siguringi Sigurjónsson afhenti framkvæmdastjórum Ístaks hf. og Flugfélags Íslands eintak af fyrsta skákkverinu, sem út hefur komið á grænlensku.

 

Siguringi stóð að útgáfunni, með stuðningi fyrirtækjanna, og um páskana fengu börnin í Ittoqqortoormiit fyrstu eintökin á hinni árlegu skákhátíð, sem Hrókurinn, Kalak og Skákakademían efndu til.

 

Siguringi starfaði um árabil hjá Flugfélaginu en hefur undanfarin misseri helgað sig skákkennslu og útbreiðslu skákíþróttarinnar. Hann hefur sett upp kennsluvefinn Krakkaskák og gefið út kennslukver fyrir byrjendur sem margir skólar hafa nýtt sér.

 

Árni Gunnarsson framkvæmdastjóri Flugfélagsins og Kolbeinn Kolbeinsson framkvæmdastjóri Ístaks tóku við eintökunum, og sögðu mikið ánægjuefni að taka þátt í svo skemmtilegu verkefni.

 

Næstu eintök verða afhent í Kulusuk á næstu vikum, og við sama tækifæri verða íbúum í litla þorpinu afhent hljóðfæri og tæknibúnaður í stað þess sem glataðist þegar tónlistarhúsið brann í mars. 

 

Þorvarður efstur á öðlingamóti

Þorvarður Fannar Ólafsson (2225) er efstur á Skákmóti öðlinga að lokinni fimmtu umferð sem fram fór í gærkveldi en þá vann hann Hrafn Loftsson (2204). Sævar Bjarnason (2132) er annar með 4 vinninga en hann gerði jafntefli við Sigurð Daða Sigfússon (2324). Fimm skákmenn koma næstir með 3,5 vinning. s Ó. Vigfússon (1988).

Öll úrslit fimmtu umferðar má nálgast hér.

Stöðu mótsins má nálgast hér.

Sjötta og næstsíðasta umferð fer fram nk. miðvikudagskvöld. Þá mætast meðal annars Sævar og Þorvarður.

Pörun sjöttu umferðar má í heild nálgast hér. 

• Heimasíða TR
• Chess-Results

Vor í lofti á Selfossi - Björgvin sigurvegari Vormótsins

Þegar fækka tekur á skákæfingum hjá SSON liggur fyrir að vorið er komið og sumarið bankar á dyrnar, eigi að síður mættu 5 höfðingjar til skákiðkunar í gærkvöldi og tefldu 7 mínútna skákir, tvöfalda umferð.

Björgvin Smári og Magnús áttu ágætis spretti, að minnsta kosti betri en aðrir og voru efstir og jafnir fyrir síðustu umferð þar sem þær mættust og Björgvin hafði góðan sigur og sigur á mótinu þar með.

Lokastaðan:

1. Björgvin     7
2. Magnús      6
3. Páll Leó      4
4. Ingimundur 3
5. Þorsteinn   0

Í ljósi ofangreinds fer nú að draga úr skákæfingum þannig að menn geti sinnt vorverkum á bújörðum sínum eins og vera ber.  Að sjálfsögðu verður tilkynnt á heimasíðu SSON þegar meiriháttar skákviðburðir eru á dagskrá en þeir eru nokkrir áður en skáksettum verður pakkað niður fram að hausti.

Heimasíða SSON