N1 Reykjavíkurskákmótið í ljósvakamiðlum

Mikil umfjöllun var um N1 Reykjavíkurskákmótið í helstu ljósvakamiðlum í gær. Hér að neðan má finna umfjallanir RÚV, Stöðvar 2 og Rásar 2 (Síðdegisútvarpið)

• RÚV 
• Stöð 2
• Rás 2 (Síðdegisútvarpið)

N1 Reykjavíkurskákmótið: 29 skákir sýndar beint í hverri umferð!

Hvorki meira né minna en 29 skákir eru sýndar beint í hverri umferð N1 Reykjavíkurskákmótsins en til samanburðar voru þær aðeins 12 í fyrra. Margar mjög athyglisverðar viðureignir fara fram í 2. umferð, sem hefst núna kl. 9:30 en tvær umferðir fara fram í dag. Má þar nefna að alþjóðlegu meistararnir Dagur Arngrímsson og Björn Þorfinnsson tefla við ofurstórmeistarana Anish Giri og Maxime Vachier-Lagrave.

Tinna Kristín Finnbogadóttir mætir svo hinum kínverska Ding Liren, sem var ekki kátur með úrslitin í gær.  Stórmeistarinn Stefán Kristjánsson teflir við Kínverjann unga Wang Yiey sem vakti mikla athygli fyrir góða taflmennsku í Landskeppninni.

Nokkrir keppendur nota reglu sem gerir þeim kleift að hvíla eina umferð í upphafi móts og fá fyrir það jafntefli. Má þar nefna Friðrik Ólafsson, Ivan Sokolov og Hannes Hlífar Stefánsson, sem án efa allir koma tvítefldir og úthvíldir til leiks í síðari umferð dagsins sem hefst kl. 16:30.

• Heimasíða mótsins
• Chess-Results
• Beinar útsendingar
• Skemmtilegt myndaalbúm frá setningarathöfn og 1. umferð.

Vetrarleyfismót Fjölnis og Gufunesbæjar

Hið árlega vetrarleyfisskákmót skákdeildar Fjölnis og frístundamiðstöðvarinnar Gufunesbæjar verður haldið í Hlöðunni Gufunesbæ föstudaginn 22. febrúar frá kl. 12:30 - 14.30.

Allir grunnskólanemendur í 1.-7. bekk mega taka þátt í mótinu og teflt verður um fjölmörg verðlaun, m.a. bíómiðar og pítsugjafabréf.

Tefldar verða 5 umferðir og umhugsunartími er 6 mínútur á skák. Vetrarleyfisskákmótið er upplagt tækifæri fyrir alla grunnskólanemendur í Grafarvogi að taka þátt í. 

Þátttaka er ókeypis og keppendur eru hvattir til að mæta tímanlega til skráningar.

Hægt er að kaupa veitingar a staðnum. 

Sæbjörn sigraði í Stangarhyl

Það var frekar afslappað andrúmsloft hjá heldri skákmönnum í Ásgarði í dag þar sem tuttugu og fjórir öðlingar léku sér á reitunum 64.

Trúlega hafa fyrstu orusturnar í Hörpu verið snarpari margar hverjar í fyrstu umferð Reykjavíkurskákmótsins sem byrjaði í dag.

Sæbjörn G Larsen varð efstur með 9 vinninga af 10, í öðru sæti varð  Þór Valtýsson með 8½ vinning, Guðfinnur R Kjartansson varð svo í þriðja sæti með 8 vinninga. Þessir þrír skáru sig úr því að næstu menn voru með 6 vinninga.

Tafla:

1        Sæbjörn G Larsen                               9

2        Þór Valtýsson                                     8.5

3        Guðfinnur R Kjartansson                              8

4-5     Ágúst Ingimundarson                         6

          Þorsteinn K Guðlaugsson                             6

6-11   Valdimar Ásmundsson                       5.5

          Jón Víglundsson                                 5.5

          Kristján Guðmundsson                       5.5

          Gísli Sigurhansson                                       5.5

          Stefán Þormar                                     5.5

          Bragi G Bjarnarson                             5.5

12-16 Magnús V Pétursson                           5

          Ari Stefánsson                                    5

          Ásgeir Sigurðsson                              5

          Haraldur Axel                                     5

          Gísli Árnason                                     5

 Næstu átta skákmenn voru með færri vinninga í þettað sinn.

N1 Reykjavíkurskákmótið af stað með glæsibrag: Óvænt úrslit í 1. umferð

• Friðrik Ólafsson og íslensku stórmeistararnir sigruðu allir í 1. umferð
• Ingibjörg Edda Birgisdóttir með góðan sigur á alþjóðameistara.
• Dagur Ragnarsson, 15 ára, með jafntefli við stórmeistara 
• Kornungur norskur piltur með jafntefli við ofurmeistarann DingLiren 

Alþjóðlega N1 Reykjavíkurskákmótið hófst í Hörpu í kvöld og er hið fjölmennasta í næstum 50 ára sögu mótsins. 228 skákmenn frá 38 löndum taka þátt og þar af 35 stórmeistarar. Mótið fór mjög fjörlega af stað og nokkur mjög óvænt úrslit sáu dagsins ljós. 

Ingibjörg Edda Birgisdóttir, tvöfaldur Íslandsmeistari kvenna í skák, sigraði hollenskan alþjóðameistara sem er tæplega 600 stigum hærri. Tinna Kristín Finnbogadóttir gerði jafntefli við þýskan alþjóðameistara og Dagur Ragnarsson, 15 ára, gerði jafntefli við tyrkneska stórmeistarann og landsliðsmanninn Mustafa Yilmaz.

Íslensku stórmeistararnir Friðrik Ólafsson, Stefán Kristjánsson, Henrik Danielsen og Þröstur Þórhallsson unnu allir sínar skákir.

Ein alóvæntustu úrslit 1. umferðar voru  jafntefli hins 13 ára Sebastian Mihajlov frá Noregi við kínverska ofurstórmeistarann Ding Liren, sem hefur um 650 stigum meira en Norðmaðurinn ungi.Ding Liren var sýnilega brugðið í lok skákarinnar, en hann er næststigahæsti skákmaður Kínverja, sem eru risaveldi í skákheiminum.

Aðrir ofurstórmeistarar náðu að komast óskaddaðir gegnum 1. umferðina. Anish Giri, stighæsti skákmaður mótsins, lagði Norðmanninn Johan-Sebastian Christiansen, og Frakkinn MaximeVachier-Lagrave lagði Svetoslav Mihajlov, en hann er pabbi norska drengsins sem gerði hið frækilega jafntefli við Ding Liren.

Setningarathöfn N1 Reykjavíkurmótsins var í senn skemmtileg og hátíðleg. Ávörp fluttu Gunnar Björnsson forseti Skáksambandsins, Eggert Benedikt Guðmundsson forstjóri N1, Jóhanna Sigurðardóttir forsætisráðherra og Jón Gnarr borgarstjóri, sem síðan lék fyrsti leikinn fyrir Anish Giri. Haraldur Reynisson tónlistarmaður flutti lag um vináttuna, en athöfninni stjórnaði Þóra Arnórsdóttir sjónvarpskona með miklum glæsibrag.  

Margir áhorfendur lögðu leið sína í Hörpu að fylgjast með skáksnillingunum. Þátttaka Friðriks Ólafssonar, fyrsta stórmeistara Íslendinga, vekur mikla gleði meðal íslenskra skákáhugamanna, en Friðrik er fyrsti stórmeistari Íslendinga og tók þátt í fyrsta Reykjavíkurskákmótinu, fyrir 49 árum. Friðrik, sem nú er 78 ára, lagði Ólaf Gísla Jónsson í skemmtilegri skák í 1. umferð.

Afar góðar aðstæður eru á skákstað og hægt að fylgjast með mörgum skákum beint á risaskjá. Ingvar Þór Jóhannesson annaðist skákskýringar, og var meðal annars farið í saumana á sigurskák Ingibjargar Eddu og hrakförum Ding Liren.

Tvær umferðir verða tefldar á morgun, miðvikudag. Sú fyrri hefst kl. 9:30 og sú síðari hefst kl. 16:30.

• Heimasíða mótsins
• Chess-Results
• Beinar útsendingar
• Skemmtilegt myndaalbúm frá setningarathöfn og 1. umferð.

N1 Reykjavíkurskákmótið hafið

N1 Reykjavíkurskákmótið hófst í dag í Hörpu. 228 skákmenn frá 38 löndum taka þátt og þar af 35 stórmeistarar. Allt eru þetta er met og vex vegur mótsins ár frá ári. 150 erlendir skákmenn og hefur fjölgað um tæplega frá í fyrra.

Meðal keppenda er Friðrik Ólafsson, sem tekur þátt í sínu fyrsta Reykjavíkurskákmóti í 29 ár en hann var meðal keppenda á fyrsta Reykjavíkurskákmótinu sem fram fór fyrir tæplegri hálfi öld. Friðrik teflir í dag við Ólaf Gísla Jónsson, sem er meðal margra íslenskra skákáhugamanna sem taka þátt.

Þóra Arnórsdóttir, stýrði setningarathöfn mótsins. Ræður héldu Gunnar Björnsson, forseti Skáksambands Íslands, Jóhanna Sigurðardóttir, forsætisráðherra og Jón Gnarr, borgarstjórinn í Reykjavík, sem lék fyrsta leik mótsins fyrir stigahæsta keppendann, Anish Giri gegn Norðmanninum unga Johan-Sebastian Christiansen.

Strax urðu óvænt úrslit í fyrstu umferð þegar danskur skákmaður með tæplega 2.000 skákstig, Sören Jensen, lagði næsta stórmeistaraefni Norðmanna, Frode Urkedal.

Afar góðar aðstæður eru á skákstað og hægt að fylgjast með mörgum skákum beint á risaskjá. Í kvöld verður svo Ingvar Þór Jóhannesson með skákskýringar á skákstað. Þess fyrir utan eru hvorki meira né minna en 22 skákir sýndar beint á vefsíðu mótsins.

Tvær umferðir verða tefldar á morgun. Sú fyrri hefst kl. 9:30 og sú síðari hefst kl. 16:30.

• Heimasíða mótsins
• Chess-Results
• Beinar útsendingar

N1 Reykjavíkurskákmótið 2013 í Hörpu hefst klukkan 16 á þriðjudag

• Aldrei fleiri keppendur í hálfrar aldar sögu mótsins.
• Friðrik Ólafsson meðal keppenda.
• Tveir heimsmeistarar.
• Þrír stigahæstu skákmenn heims undir 20 ára.
• Forsætisráðherra, borgarstjóri og forstjóri N1 flytja ávörp

N1 Reykjavíkurskákmótið 2013 í Hörpu hefst í dag, þriðjudag, klukkan 16. Mótið er hið fjölmennasta frá upphafi og er búist við um 230 keppendum, þar af um 170 erlendum gestum frá næstum 40 þjóðum. Meðal keppenda á mótinu verður hinn 78 ára gamli Friðrik Ólafsson, fyrsti stórmeistari Íslendinga og goðsögn í skákheiminum. Tveir heimsmeistarar keppa á mótinu og þrír stigahæstu skákmenn heims 20 ára og yngri. Kínverskan stúlkan Guo Qi er heimsmeistari stúlkna og Alexander Ipatov er heimsmeistari pilta, og eru meðal margra kornungra snillinga sem setja munu mikinn svip á N1 Reykjavíkurskákvótið. Stigahæstur allra er Anish Giri, 19 ára gamall, en meðal annarra meistara eru Wesley So frá Filippseyjum og kínversku ofurstórmeistarnir Bu Xiangzhi, Yu Yangyi og Ding Liren.

Fjölmörg börn og ungmenni tefla á stórmótinu í Hörpu. Margra augu munu beinast að hinum 13 ára Wei Yi, sem er stigahæstur allra í heiminum, 14 ára og yngri, og er kominn með tvo stórmeistaraáfanga af þremur. Yngsti keppandi mótsins er Óskar Víkingur Davíðsson, 7 ára, sem jafnframt er yngsti keppandinn í 49 ára sögu mótsins.

Mótið var fyrst haldið árið 1964 og meðal keppenda þá var Friðrik Ólafsson. Hann hefur í þrígang sigrað á Reykjavíkurskákmótinu, sem nú er haldið í 28. skipti. Friðrik verður aldursforseti í Hörpu, en yngsti keppandinn er Óskar Víkingur Davíðsson, sem er aðeins 7 ára. Fjölmörg íslensk börn og ungmenni eru skráð til leiks í Hörpu og fá einstakt tækifæri til að spreyta sig á aþjóðlegu skákmóti. 

Aldrei hafa fleiri stórmeistarar teflt á alþjóðlegu skákmóti á Íslandi, og ljóst að hörð barátta bíður íslenska heimavarnarliðsins. Þar eru í flokki fremst Friðrik Ólafsson, Hjörvar Steinn Grétarsson, Stefán Kristjánsson, Þröstur Þórhallsson, Henrik Danielsen og Hannes Hlífar Stefánsson, en Hannes er sigursælasti keppandi í sögu Reykjavíkurmótanna með fimm sigra.

N1 Reykjavíkurmótið verður sett í Hörpu klukkan 16 þriðjudaginn 19. febrúar. Ávörp flytja Gunnar Björnsson forseti Skáksambandsins, Eggert Benedikt Guðmundsson forstjóri N1, Jóhanna Sigurðardóttir forsætisráðherra og Jón Gnarr borgarstjóri. Þá mun Haraldur Reynisson tónlistarmaður flytja lag, en athöfninni stýrir Þóra Arnórsdótttir sjónvarpskona.

Alls eru tefldar 10 umferðir og stendur mótið 19. til 27. febrúar. Áhorfendur eru velkomnir í Hörpu og er aðgangur ókeypis. Skákskýringar eru í boði, sem og frábært tækifæri til að sjá suma af bestu og efnilegustu skákmönnum heims leika listir sínar.

Stefán Kristjánsson sigraði á Fastus mótinu 2013

Vel heppnuðu Fastus móti Goðans-Máta er nú lokið eftir skemmtilega keppni. Stefán Kristjánsson, stórmeistari, varð hlutskarpastur 30 keppenda, hlaut 6 vinninga af 7 mögulegum. Hann kom greinilega vel undirbúinn til leiks og var sá eini keppenda sem tapaði ekki skák.  Úrslit mótsin réðust í raun í 6. umferð þegar stórmeistararnir tveir, Stefán og Þröstur, leiddu saman hesta sína en þeir voru jafnir og efstir fyrir þá rimmu.

Í 2.-4. sæti á mótinu urðu kapparnir Sigurbjörn Björnsson, fidemeistari, Karl Þorsteins, alþjóðlegur meistari, og Þröstur Þórhallsson, stórmeistari, með 5 vinninga hver. Rétt á hæla þeirra með 4,5 vinninga komu Ingvar Þór Jóhannesson, fidemeistari, Jón Viktor Gunnarsson, alþjóðlegur meistari, unglingurinn efnilegi Daði Ómarsson og fidemeistarinn margreyndi, Benedikt Jónasson, sem átti flottan endasprett, hlaut 4 vinninga úr síðustu 5 skákunum. Í 9.-13. sæti með 4 vinninga urðu svo fidemeistarinn Andri Áss Grétarsson, sem teflir afar sjaldan núrorðið, Þorsteinn Þorsteinsson, fidemeistari, Lenka Ptachnikova, stórmeistari kvenna, Einar Hjalti Jensson, fidemeistari, og Þorvarður Ólafsson.

Góðir gestir

Fastus mótið er eitt sterkasta mót ársins. Um er að ræða innanfélagsmót Goðans-Máta að viðbættum góðum gestum sem setja skemmtilegan svip á mótið. Ólympíulið kvenna var meðal boðsgesta að þessu sinni og stóðu þær valkyrjur sig með miklum sóma. Hallgerður Þorsteinsdóttir lagði m.a. Björn Þorsteinsson, og Jóhanna Björg Jóhannsdóttir gerði sér lítið fyrir og sigraði Benedikt Jónasson en hástökkvari mótsins í stigum talið var Elsa María Kristínardóttir sem hækkaði um 25,8 eló-stig.

Áhersla á lítt virka skákmenn

Í Fastus mótinu er annars lögð sérstök áhersla á þátttöku skákmanna, sem hafa lítið teflt síðustu árin eða jafnvel áratugina. Það er afar ánægjulegt að laða menn eins og Karl Þorsteins og Þröst Árnason aftur að skákborðinu - kempur sem hafa ekki teflt á kappskákmótum, fyrir utan Íslandsmót skákfélaga, í áratugi.  Fyrirkomulag mótsins hefur þann stóra kost að aðeins er teflt einu sinni í viku, þannig að þeir sem njörvaðir eru niður við dagleg störf eða nám hafa svigrúm til að taka þátt og hafa næði til þess að undirbúa sig af kostgæfni. Greinilegt að þessi tilhögun á framtíðina fyrir sér. Hún mælist almennt vel fyrir meðal íslenskra skákmanna og nægir þar að nefna Öðlingamót TR sem eru jafnan fjölsótt.

Þó að hart væri barist á mótinu var skemmtilegt samneyti, spjall og spaug snar þáttur í upplifuninni. Goðinn-Mátar þakkar keppendum drengilega framgöngu, gestum góð viðkynni og áhorfendum áhugann.

Vignir Vatnar unglingameistari Reykjavíkur - Nansý stúlknameistari Reykjavíkur

Barna-og unglingameistaramót Reykjavíkur sem og Stúlknameistaramót Reykjavíkur fór fram í skákhöll Taflfélags Reykjavíkur í dag sunnudaginn  17. febrúar. Mótið var opið fyrir börn á grunnskólaaldri.

Þrenn verðlaun voru veitt fyrir þrjú efstu sætin í mótinu, þrenn verðlaun fyrir efstu stúlkur og svo þrenn verðlaun fyrir 12 ára og yngri (fædd 2000 og síðar). Þau sem eru búsett í Reykjavík eða eru félagar í reykvískum taflfélögum tefldu um titilinn Unglingameistari Reykjavíkur 2013 og Stúlknameistari Reykjavíkur 2013.

Þátttakendur voru 28 og var mótið vel skipað, því þarna var samankominn þorri sterkustu og virkustu skákbarna og skákunglinga Reykjavíkur. Einnig tóku þátt nokkrir efnilegir krakkar úr Garðabæ. Flest allir keppendurnir eru þaulvant keppnisfólk, en einnig voru þarna nokkrir af yngri kynslóðinni sem voru í þessu móti að stíga sín fyrstu skref í þátttöku á skákmótum.

Tefldar voru 7 umferðir með 15 mín. umhugsunartíma á skák. Teflt var í einum flokki.

Keppnin var mjög spennandi og ekki ljóst fyrr en í síðustu umferð hverjum myndi falla sigurinn í mótinu í skaut. Gauti Páll Jónsson úr TR leiddi allt mótið fram í síðustu umferð og var hann sá eini sem vann bæði Vigni Vatnar Stefánsson og Oliver Aron Jóhannesson. Hann tefldi einstaklega glæsilegt endatafl í skákinni við Oliver og var fyrir síðustu umferð einn efstur með 5,5 vinning. En í síðustu umferð mætti Gauti Páll félaga sínum í TR Mykhaylo Kravchuk og beið lægri hlut, sem þýddi að hann lenti í 2. sæti í mótinu. 

Sigurinn kom í hlut Vignis Vatnars Stefánssonar, nýbakaðs Norðurlandameistara, en hann tapaði einungis fyrir Gauta Páli og vann alla aðra keppinauta. Vignir Vatnar er því Unglingameistari Reykjavíkur 2013.  Gauti Páll Jónsson varð í 2. sæti með 5,5, v.og Mykhaylo Kravchuk í 3. sæti einnig með 5,5 vinning en lægri á stigum en Gauti Páll.  Það voru því þrír TR-ingar sem tóku fyrstu þrjú sætin í mótinu, en allir eru þeir félagar í Afrekshóp TR.

Í Stúlknameistaramótinu var keppnin engu að síður spennandi. 7 stelpur tóku þátt í mótinu. Keppnin stóð aðallega milli Fjölnisstúlkunnar Nansý Davíðsdóttur og TR-stúlkunnar Doniku Kolica. Það var Nansý sem kom í mark hálfum vinningi fyrir ofan Doniku og varð því Stúlknameistari Reykjavíkur 2013. Í þriðja sæti  varð síðan TR-stúlkan Svava Þorsteinsdóttir með 3 vinninga.

Í flokki 12 ára og yngri sigraði sigurvegari mótsins Vignir Vatnar, þar sem hann er einungis 10 ára gamall. Í öðru sæti varð Mykhalylo Kravchuk, 9 ára og í 3. sæti  Óskar Víkingur Davíðsson, 7 ára úr Helli. 

Flestir keppendur mótsins komu frá Taflfélagi Reykjavíkur eða 13. Keppendur frá Helli voru 7, 3 frá Fjölni, 2 frá T.G. og þrír keppendur voru utan félaga.

Flest verðlaun komu í hlut skákkrakkanna úr Taflfélagi Reykjavíkur, en þau hlutu 7 verðlaun af 9 mögulegum.

Fyrstu þrjú sætin í hverjum verðlaunaflokki skipuðu eftirfarandi keppendur:

1. Vignir Vatnar Stefánsson, T.R. 6 v. Unglingameistari Reykjavíkur 2013.:
2. Gauti Páll Jónsson, T.R. 5,5 v. (31,5 stig)
3. Mykhaylo Kravchuk, T.R. 5,5 v. (28 stig)

Stúlknameistaramót Reykjavíkur:

1. Nansý Davíðsdóttir, Fjölni, 4,5 v.  Stúlknameistari Reykjavíkur 2013.
2. Donika Kolica, T.R. 4 v.
3. Svava Þorsteinsdóttir, T.R. 3 v.

Í flokki 12 ára og yngri (fædd 2000 og síðar).

1.  Vignir Vatnar Stefánsson, T.R. 6.v.

2.  Mykhaylo Kravchuk, T.R. 5,5 v.
3.  Óskar Víkingur Davíðsson, Helli, 5 v.

Heildarúrslit:

1	Vignir Vatnar Stefánsson	1500	TR	6	31
2	Gauti Páll Jónsson	1441	TR	5½	31½
3	Mykhaylo Kravchuk	1065	TR	5½	28
4	Óskar Víkingur Davíðsson	1017	Hellir	5	27½
5	Oliver Aron Jóhannesson	1914	Fjölni	5	26
6	Nansý Davíðsdóttir	1426	Fjölni	4½	31
7	Björn Hólm Birkisson	0	TR	4½	24½
8	Felix Steinþórsson	1370	Hellir	4½	22½
9	Alec Elías Sigurðarson	0	Hellir	4	29
10	Donika Kolica	1178	TR	4	28
11	Bárður Örn Birkisson	1479	TR	4	26½
12	Guðmundur Agnar Bragason	1092	TR	4	26
13	Jakob Alexander Petersen	1242	TR	4	25
14	Kristófer Jóel Jóhannesson	1373	Fjölni	3½	30½
15	Bjarki Arnaldarson	1000	TG	3	28½
16	Þorsteinn Freygarðsson	1226	TR	3	26½
17	Tinni Teitsson	0	Hellir	3	24
18	Matthías Hildir Pálmason	0	TG	3	23
19	Bjartur Máni Sigmundsson	0	Hellir	3	21
20	Svava Þorsteinsdóttir	0	TR	3	21
21	Stefán Orri Davíðsson	0	Hellir	3	19½
22	Davíð Dimitry Indriðason	0	TR	3	19
23	Sigrún Linda Baldursdóttir	0		3	19
24	Brynjar Haraldsson	0	Hellir	2	25
25	Sólrún Elín Freygarðsdóttir	0	TR	2	18½
26	Freyja Birkisdóttir	0	TR	2	15
27	Elsa Kristín Arnaldardóttir	0		1	19½
28	Sveinn Nökkvi Guðlaugsson	0		0	19½

Mótshaldari var Taflfélag Reykjavíkur. Skákstjórar voru Torfi Leósson og Sigurlaug Regína Friðþjófsdóttir sem einnig tók myndir. Birna Halldórsdóttir sá um veitingar á meðan mótinu stóð.

Pistill: Sigurlaug Regína Friðþjófsdóttir.

TR -æfingin sl. laugardag - undanúrslit fyrir Barnablitz

Á skákæfingunni í Taflfélagi Reykjavíkur sl. laugardag var keppt um tvö sæti í úrslitum Barnablitz sem fram fer í Hörpunni um næstu helgi, sem hliðarviðburður við Alþjóðlega Reykjavíkurskákmótið, Reykjavík Open. 

25 krakkar mættu á æfinguna og tefldar voru 6 umferðir með 7. mín. umhugsunartíma og af keppendalistanum var ljóst að um mikla keppni yrði að ræða! 

Það voru landssliðsdrengirnir Vignir Vatnar Stefánsson og Dawid Kolka sem tóku forustuna strax frá byrjun. Eftir þrjár umferðir var gert hlé fyrir hressinguna. Í leiðinni notaði Sigurlaug formaður TR tækifærið til að vekja athygli á frábærum árangri þriggja drengja, sem þarna voru á meðal keppenda, á skákmótum það sem af er árinu. Þetta var TR-ingurinn Mykhaylo Kravchuk sem varð þriðji á Íslandsmóti barna í janúar, Dawid Kolka úr Helli, sem varð þriðji í D-flokki á nýafstöðnu Norðurlandamóti og TR-ingurinn Vignir Vatnar Stefánsson, sem varð Íslandsmeistari barna í janúar og svo Norðurlandameistari í flokki 11 ára og yngri um síðustu helgi. Þessum þremur strákum var klappað lof í lófa og allir þátttakendurnir á skákæfingunni fengu í tilefni dagsins smá auka góðgæti í hressingunni!

Síðan hélt taflmennskan áfram. Þeir Vignir og Dawid héldu forystunni allan tímann, gerðu innbyrðis jafntefli, en unnu annars alla sína andstæðinga. Þeir fengu báðir 5,5 vinning af 6 mögulegum og unnu sér því inn sæti í úrslitum í Barnablitz í Hörpunni. Verður gaman að fylgjast með þeim þar.

Hingað til eru því eftirtaldir krakkar búnir að vinna sér inn sæti í úrslitum í Barnablitz: Vignir Vatnar Stefánsson og Björn Hólm Birkisson, báðir úr TR, Felix Steinþórsson og Dawid Kolka úr Helli og Nansý Davíðsdóttir og Þorsteinn Magnússon úr Fjölni. Aðrir geta reynt að ná sér í sæti á Hellisæfingunni á mánudaginn!

Pistill: SRF