Skákdagurinn 26. janúar 2012 til heiðurs Friðrik Ólafssyni: Allsherjar skákhátíð um allt land

Skákdagur Íslands er haldinn í fyrsta sinn fimmtudaginn 26. janúar. Skákdagurinn er haldinn til heiðurs Friðrik Ólafssyni, fyrsta stórmeistara Íslendinga. Friðrik verður 77 ára þennan dag og tekur virkan þátt í hátíðahöldum.

Forseti Íslands Ólafur Ragnar Grímsson heldur móttöku til heiðurs Friðrik á Bessastöðum, en meðal annarra gesta verða þau börn sem í febrúar tefla fyrir Íslands hönd á Norðurlandamóti barna. Fjölmiðlum er boðið að vera viðstaddir á Bessastöðum, þar sem Friðrik mun m.a. tefla við Nansý Davíðsdóttur, 10 ára, sem er nýkrýndur Íslandsmeistari barna, fyrst stúlkna á Íslandi.

Að Skákdeginum standa Skáksamband Íslands, Skákakademía Reykjavíkur, Skákskóli Íslands og taflfélög um allt land, í samvinnu við skóla, íþróttafélög, sveitarfélög, fyrirtæki og einstaklinga.

Markmiðið er að heiðra Friðrik Ólafsson, fyrir einstakt framlag til samfélags okkar í heild og skákarinnar sérstaklega, jafnframt því að sýna þá grósku sem er í íslensku skáklífi um allt land.

Ótal  skákviðburðir fara fram í dag og eru Íslendingar hvattir til að draga fram skáksettin.Teflt verður í fjölmörgum grunnskólum, fjöltefli verður í Laugardalslaug, einvígi háð í Kringlunni, haldin skákhátíð á Akureyri, teflt í Trékyllisvík og efnt til margra skákmóta vítt og breitt um landið. Íslendingar víða um heim hafa einnig boðað þátttöku í Skákdeginum 2012.

Skákhreyfingin hvetur landsmenn til að draga fram taflið og taka þátt í hátíðinni, í fjöltefli við stórmeistara eða heima í stofu, enda er skáksett að finna á langflestum íslenskum heimilum.

Stefán Bergsson sagði frá Skákdeginum í morgunþætti Rásar eitt. Viðtalið hefst á 34. mínútu.: http://www.ruv.is/sarpurinn/morgunthattur-rasar-1/25012012-0

Dagskrá Skákdagsins 2012 er að finna á slóðinni: http://skakdagurinn.blog.is/blog/skakdagurinn/

Jafnframt er hægt að fylgjast með Facebook-síðu Skákdagsins.

Dagskráin (getur verið að það vanti eitthvað - verður uppfært):

Á Skákdaginn verður teflt um allt land og í fjölmörgum skólum meðal annars Laugalækjarskóla, Salaskóla, nemendur Ölduselsskóla verða með skákkynningu á leikskólanum Seljaborg, Unnsteinn Sigurjónsson mun tefla fjöltefli við nemendur í grunnskóla Bolungarvíkur og teflt verður í fjölda leikskóla.

Skákhreyfingin hvetur alla Íslendinga til að taka þátt í Skákdeginum, til heiðurs Friðrik, með einum eða öðrum hætti. Allir geta verið með: í sundlaugum, kaffihúsum, fjölteflum, hraðskákmótum - eða í stofunni heima. Kjörorð dagsins er: Upp með taflið!

Athugið er að hér ekki um tæmandi viðburðalista að ræða. Út um allt land - og víða um heim - leggja Íslendingar á ráðin um Skákdaginn 26. janúar 2012.

Hægt er að fylgjast með fréttum og viðburðum á skakdagurinn.blog.is.

07:30 Skákdagurinn hefst klukkan hálfátta á fimmtudagsmorgun með fjöltefli Björns Þorfinnssonar alþjóðlegs skákmeistara ofan í Laugardalslaug. Þátttakendur eru Hilmir Freyr Heimisson, Heimir Páll Ragnarsson, Donika Kolica, Hrund Hauksdóttir og Kristján Örn Elíasson.

07:30 Viðtal við Friðrik Ólafsson á Rás 2.

08:00 Á Akureyri verður sundlaugarskáksett vígt í Akureyrarlaug klukkan átta. Gestum laugarinnar býðst að tefla við Akureyrarmeistarann Smára Ólafsson.

08:10 Ötulasti skákkennari landsins hefur sinn daglega rúnt milli grunnskóla í Reykjavík. Björn Ívar Karlsson kennir í 15 skólum í viku hverri og þennan fimmtudaginn verða þeir þrír; Húsaskóli, Korpuskóli og Hlíðaskóli.

09:00 Skákhátíð hefst í Grímsey og stendur allan daginn.

09:30 Þröstur Þórhallsson stórmeistari teflir fjöltefli við nemendur Víkur- og Korpuskóla.

10:00   Alþjóðlegi meistarinn Björn Þorfinnson teflir annað fjöltefli sitt og nú við nemendur Laugarnesskóla.

11:00 Skákgleði hefst á leikskólanum Marbakka í Kópavogi. Skákgleði og söngvar meðal elstu leikskólabarna stjórnað af stórmeistara kvenna Lenku Ptáčníková.

10:00 Hjörvar Steinn Grétarsson teflir kappskák við íslensku þjóðina gegnum netið. Hægt verður að velja milli þriggja leikja og koma valmöguleikarnir fram á http://www.skak.is/  Hjörvar lagði nýlega Shirov, sem hefur teflt hefur um heimsmeistaratitilinn. Getur þjóðin sigrað Hjörvar?

10:00 Skáksamband Austurlands annast kennslu fyrir börn í Egilsstaðaskóla mestallan daginn.

10:00 Hraðskákeinvígi stórmeistarans Stefáns Kristjánssonar og alþjóðlega meistarans Braga Þorfinnssonar hefst í Kringlunni. Landsliðsmennirnir munu ekki hætta að tefla fyrren annar þeirra sigrar í 50 skákum. Skákir einvígisins verða í beinni á skák.is

11:00 Skákmót fyrir börn og fullorðna í Finnbogarstaðaskóla Trékyllisvík.

11:00 Skákgleði hefst á leikskólanum Marbakka í Kópavogi. Skákgleði og söngvar meðal elstu leikskólabarna stjórnað af stórmeistara kvenna Lensku Lenka Ptáčníková.

12:00 Starfsmenn Vodafone halda skákdaginn hátíðlegan í hádeginu með hraðskákum og tefla svo fram eftir degi.

12:00 Starfsmenn Íslandsbanka grípa í tafl.

13:00 TOYOTA-skákmót heldri skákmanna hefst í höfuðstöðvum TOYOTA. Friðrik Ólafsson leikur fyrsta leikinn.

13:00 Mikið skákstarf er unnið í Lágafellsskóla Mosfellsbæ og ber mót dagsins hina skemmtilegu nafngift Litla Friðriksmótið.

13:00 Ungstirnin í Grafarvogi tefla um meistaratitil Rimaskóla. Hjörvar Steinn Grétarsson sigraði á mótinu mörg ár í röð en núverandi meistari er Jón Trausti Harðarson.

13:00 Minningarmót um Björn Sölva Sigurjónsson FIDE-meistarann verður haldið í VIN, Hverfisgötu 47. Björn var einn af sterkustu mönnum Skákfélags Vinjar og heiðra nú minningu fyrrum félaga.

14:00 Þröstur Þórhallsson teflir sitt þriðja fjöltefli um daginn. Í þetta skiptið við leikskólabörn á Laufásborg.

14:00 Friðrik heimsækir Ríkisútvarpið og teflir fjöltefli við starfsmenn. Árið 1956 sat íslenska þjóðin límd við útvarpstækin og fylgdist með beinum útsendingum frá skákum Friðriks Ólafssonar á stórmótinu í Hastings. Þar vann Friðrik glæstan sigur, sem sýndi að hann var kominn í hóp þeirra allra bestu.

16:00 Helgi Ólafsson teflir fjöltefli á Hyrnutorgi í Borgarnesi. Helgi hefur í mörg ár heimsótt Borgarnes og staðið fyrir kennslu í Borgarfirði. Upp úr þeirri kennslu kom meðal annars landsliðskonan Tinna Kristín Finnbogadóttir sem hefur  ásamt móður sinni forgöngu fyrir vígslu skáksundlaugarsetts í Borgarnesi í tilefni dagsins.

16:00 Um miðjan daginn mæta kaffihúsaskákmenn miðborgarinnar á Cafe Haíti sem er sívaxandi skákmiðstöð. Skák og pönnukökur! Allir velkomnir.

16:30 Skákmeistari Landsbankans. Fyrsti leikurinn verður leikinn fyrir eitt af afmælisbörnum dagsins, fyrrum ólympíumeistarann Bergstein Einarsson.

17:00  Hinn ungi meistari Jón Kristinn Þorgeirsson teflir við gesti og gangandi í Pennanum-Eymundsson á Akureyri. Jón verður með 1 mínútu gegn fimm!

18:00 Heldri skákmenn Reykjavíkur standa fyrir öðru stórmóti sínu þennan dag að þessu sinni verða þeir í Gallerí Skák Bolholti. Fyrsta kappteflið af fjórum um Friðrikskónginn. Friðrik mætir um áttaleytið og áritar Taflkónginn. Skákmenn á öllum aldri velkomnir.

19:00 Víkingaklúbburinn býður skákmönnum á Dubliners í miðbæ Reykjavíkur þar sem fram fer Víkingaskákmót.

19:00 Skákfélag fjölskyldunnar verður stofnað í húsakynnum Skáksambands Íslands, Facafeni 12. Að stofnun félagsins stendur kraftmikið fólk, sem kemur með nýja sýn á heim skákarinnar. Foreldrar skákbarna, sem og afar og ömmur og aðrir ættingjar, eru hvattir til að fylgjast með starfi félagsins. Þátttaka er ókeypis og án skuldbindinga.

19:30 Krakkaskákmót á vegum Taflfélags Garðabæjar í gamla betrunarhúsinu.

19:30 Fimmtudagsmót hjá TR í félagsheimili þeirra að Faxafeni 12. Allir velkomnir.

20:00 Hraðskákmót, "Friðriksmót", verður haldið fimmtud. að Koltröð 4, Egilsstöðum.

20:00 Þriðja umferð hefst í Gestamóti Goðans Faxafeni 12. Gestamót Goðans er skemmtileg nýjung í hinn mikla skákmánuð janúar. Á mótinu tefla fyrrum Íslandsmeistarar, fyrrum Ólympíumeistarar og fjölmargir titilhafar.

20:00 Goðinn hefur tvær starfsstöðvar og á heimavellinum í Húsavík verður opið hús og kynning á félaginu. Hermann Aðalsteinsson fer fyrir sínum mönnum.

20:00 Mátar halda skákmót í húsakynnum sínum að Garðatorgi. Hefur félagsmönnum verið tilkynnt um leynigest og spennandi að sjá hver það verður.

20:00 Skákæfing í Dvalarheimilinu Barmahlíð Reykhólasveit. Hlynur Þór Magnússon sér um æfinguna og von er á góðum gestum og ber að nefna sjálfan Jón Kristinsson fyrrverandi Íslandsmeistara í skák.

20:00 Skákmenn á Siglufirði hittast í Safnaðarheimili staðarins. Skák hefur verið kennd í Grunnskólanum í vetur og mælst vel fyrir.

20:00 Opið hús hjá Skákfélagi Akureyrar. Skákfélagsmenn fara yfir perlur með Friðrik. Hann sigraði fleiri heimsmeistara en nokkur annar Íslendingur.

20:00 Atskákmót Sauðárkróks í Safnahúsi staðarins. Allir velkomnir.

22:30 Hellismenn standa fyrir Íslandsmótinu í ofurhraðskák á ICC en umhugsunartíminn er aðeins 2 mínútur á hverja skák. Eru netverjar hvattir til að fylgjast með þeim sviptingum.

Aronian með eins vinnings forskot í Sjávarvík

Aronian (2805) vann Caruana (2736) í níundu umferð Tata Steel-mótsins sem fram fór í kvöld í Wijk aan Zee.  Hann náði þar með vinnings forskoti þar sem Carlsen (2835) tapaði fyrir Karjakin (2769).  Carlsen er í 2.-4. sæti ásamt Ivanchuk (2766), sem vann Giri (2714), og Radjabov (2773).

Í 10. umferð, sem fram fer á morgun, mætast m.a.: Nakamura-Carlsen, Giri-Aronian og Topalov-Caruana.

• Heimasíða mótsins
• Beinar útsendingar (hefjast kl. 12:30 nema lokumaferðin kl. 11 - frídagar (18., 23. og 26. janúar)
  
• ChessBomb

Guðmundur tapaði í fyrstu umferð í Gíbraltar

Guðmundur Gíslason (2332) tapaði enska stórmeistaranum David Howell í fyrstu umferð Gibraltar-mótsins sem hófst í dag.   Í 2. umferð, sem fram fer á morgun, teflir Guðmundur við spænska skákmeistarann Enrique Osuna Vega (2122).

Alls taka 256 skákmenn þátt í þessa sterka móti frá 58 löndum.  Þar af eru 56 stórmeistarar og 11 þeirra með með meira en 2700 skákstig.

• Heimasíða mótsins
• Chess-Restults
• Beinar útsendingar (12 efstu borðin)

 

 

Nýtt frímerki og kort með Friðrik

Í tilefni að DEGI SKÁKARINNAR á fimmtudaginn kemur, þann 26. janúar á afmælisdegi Friðriks Ólafssonar, fyrsta stórmeistara Íslendinga, kemur út nýtt frímerki með mynd af honum sérútgefið á vegum Gallerý Skákar, sem áður hefur gefið út nokkur skákfrímerki, m.a. með Bobby Fischer.

Frímerkið prýðir blýantsteikning Svölu Sóleygar, myndlistarkonu, af Friðrik frá 1978 þegar hann var á hátindi skákferils síns og var kjörinn forseti Alþjóðaskáksambandsins FIDE.  Þá hefur einnig verið prentað að þessu tilefni  sérstakt póstkort með mynd af Friðrik eftir málverki Einars Hákonarsonar, listmálara.

Á bakhlið kortsins  er áletrun á þessa leið á íslensku og ensku:

FRIÐRIK ÓLAFSSON, stórmeistari í skák, fæddur 26. janúar 1935.Fremsti skákmaður Íslands fyrr og síðar, margfaldur Íslands- og Reykjavíkurmeistari og sigurvegari á mörgum stórmótum, bæði heima og erlendis.  Friðrik varð stórmeistari fyrstur Íslendinga árið 1958 og skipaði sér á bekk með bestu skákmönnum heims á sínum tíma. Virtur vel enda síðar kjörinn forseti Alþjóðaskáksambandsins FIDE, embætti sem hann gengdi 1978-1982. Íslenski skákdagurinn er haldinn á afmælisdegi hans ár hvert.

Í fyrstu útgáfu eru aðeins gefnar út 10 arkir x24 eða alls 240 frímerki með burðargjaldi innanlands. Heilar arkir kosta kr. 12.000- Póstkort með 2 frímerkjum, annað að framan og öðru á bakhlið,  póststimpluðu á útgáfudegi kosta kr. 1000-  Póstkort með óstimpluði frímerki að aftan kr. 600- allt að viðbættum sendingarkostnaði.

Merkin er hægt að panta á www.galleryskak.net en einnig með tölvupósti á netfangið [e-mail]

Björn Þorsteinsson efstur í Stangarhyl í dag

Það mættu 20 skákkempur til leiks í dag þrátt fyrir þæfingsfærð og ótryggt veður útlit.  Björn Þorsteinsson varð efstur með 8 vinninga af 9, Þorsteinn Guðlaugsson náði öðru sæti með 7 vinninga og Haukur Angantýsson varð síðan í þriðja sæti með 6.5 vinning.

Toyota-skákmótið verður haldið fimmtudaginn 26 jan. kl.13.00. Mótstaður Söludeild Toyota við Nýbýlaveg. Tefldar verða 9 umferðir með 10 minútna umhugsunartíma. Nauðsynlegt að mæta tímanlega á skákstað.

Þátttöku má tilkynna í netfang [e-mail].  Eða í síma 8222403 ( Þorsteinn Guðlaugsson) og 8931238 (Finnur Kr Finnsson).

Nánari úrslit dagsins:

• 1        Björn Þorsteinsson                           8 vinninga
• 2        Þorsteinn Guðlaugsson           7
• 3        Haukur Angantýsson              6.5
• 4        Ásgeir Sigurðsson                             6
• 5-7    Kristján Guðmundsson           5
•           Gísli Sigurhansson                            5
•           Jón Víglundsson                      5
• 8-11  Valdimar Ásmundsson            4.5
•           Magnús V Pétursson               4.5
•           Halldór Skaftason                             4.5
•           Jónas Ástráðsson                    4.5
• 12-15 Birgir Sigurðsson                    4
•           Finnur Kr Finnsson                 4
•           Einar S Einarsson                             4
•           Haraldur Axel                         4

Næstu fimm skákmenn fengu örlítið færri vinninga

 

Minningarmót um Björn Sigurjónsson í Vin

Á skákdaginn, fimmtudaginn 26. janúar  verður haldið minningarmót um Fide meistarann Björn Sölva Sigurjónsson í Vin, Hverfisgötu 47,  og hefst það klukkan 13:00.

Björn Sölvi var liðsmaður Skákfélags Vinjar frá stofnun og hefði orðið 63. ára gamall þennan stóra skákdag Íslendinga, en hann lést þann 22. desember sl.

Skákstjóri er fyrirliði Vinjarliðsins, Hrannar Jónsson. Tefldar verða 6 umferðir með 7 mínútna umhugsunartíma og vöfflukaffi verður reitt fram eftir þrjár umferðir.

Sigurvegarinn hlýtur glæsilegan bikar auk þriggja lítilla kvera sem Björn Sölvi sendi frá sér fyrir nokkru. Bókavinningar fyrir efstu sætin og happadrætti.

Ferill Björns var glæsilegur, þrefaldur skákmeistari Kópavogs, Akureyrar- og Reykjavíkurmeistari og landsliðsmaður í bréfskák á sínum tíma.  Allt skákáhugafólk hjartanlega velkomið.

Íslandsmótið í ofurhraðskák fer fram á Skákdaginn

Lokaviðburður skákdagsins til heiðurs Friðriki Ólafssyni verður íslandsmótið í ofurhraðskák fer fram, fimmtudaginn 26. janúar á ICC og hefst kl. 22.30. Mótið er öllum opið og er teflt er einum flokki.  Skráning fer fram á Heimasíðu Hellis.

Allt skráningarferlið er sjálfkrafa og eina sem þátttakendur þurfa að hafa í huga er að vera mættir tímanlega á ICC eða eigi síðar en kl. 22:20.   Tímamörk eru 2 mínútur á skák og tefldar verða 15 umferðir.     

Þeir sem ekki eru skráðir á ICC geta skráð sig á vef ICC en ekki þarf að greiða fyrir fyrstu vikuna. Að því loknu er hægt að skrá sig á heimasíðu Hellis.  Þeir sem ekki hafa hugbúnað til að tefla geta halað niður þar til gerðu forriti (mælt er með Blitzin eða Dasher).   Einnig er hægt að tefla í gegnum java-forrit.  Þar sem allir keppendur þurfa að vera á svokallaðri Íslands-rás er æskilegt að menn slái inn "g-join Iceland" við næstu/fyrstu innskráningu á ICC.

Fyrirspurnir sendist til Omars Salama, umsjónarmanns mótsins í netfangið [e-mail].

Verðlaun:

1. kr. 5.000 
2. kr. 3.000 
3. kr. 2.000

KORNAX mótið - Pörun áttundu umferðar

Nú liggur fyrir pörun í áttundu og næstsíðustu umferð KORNAX mótsins - Skákþings Reykjavíkur sem fram fer á miðvikudagskvöld.   Pörunina má finna í heild sinni hér.  Stöðu mótsins má finna hér.

Helstu viðureignir eru:

• Björn Þ. (5) - Guðmundur Kja. (6½)
• Ingvar Þór (6) - Sævar (5)
• Örn Leó (5) - Hjörvar Steinn (5)
• Bragi Þ. (5) - Bjarni Jens (5)
• Einar Hjalti (5) - Emil (5)
• Sverrir Örn (5) - Stefán B. (5)

Fimmtu fyrstu skákirnar verða sýndar beint.  Tengill á beina útsendingu er hér (verður virkur rétt fyrir umferð).

Mjög góð þátttaka er á mótinu eða 73 skákmenn. Mótið er sterkt en fimm alþjóðlegir meistarar eru meðal þátttakenda.  Teflt er á sunnudögum (kl. 14) og á mánu- og miðvikudögum (kl. 19:30).

• Heimasíða mótsins
• Chess-Results
• Myndaalbúm (GB, HÁ, SRF og JHR)

Skákkeppni vinnustaða 2012

Eins og getið var í vetrardagskrá Taflfélags Reykjavíkur 3. september sl. hefur T.R. ákveðið að stofna til nýrrar keppni í vetur, Skákkeppni vinnustaða (sjá auglýsingu hér að neðan).

Verið velkomin að láta þessa auglýsingu berast til stjórnenda og skákáhugamanna á ykkar vinnustað! Skráningarform fyrir keppnina mun birtast á heimasíðu T.R., www.taflfelag.is innan skamms.

Taflfélag Reykjavíkur býður öllum vinnustöðum að taka þátt í Skákkeppni vinnustaða 2012 sem fram fer í félagsheimili T.R, Skákhöllinni Faxafeni 12, föstudaginn 17. febrúar nk. og hefst kl. 19.30.

Á hverjum vinnustað er fólk sem hefur ánægju af að tefla og teflir í frístundum. Einnig hafa fjölmargir vinnustaðir á að skipa skákmönnum sem hafa teflt í áratugi og eru á meðal sterkustu skákmanna landsins.

Taflfélag Reykjavíkur hvetur alla vinnustaði til að halda skákmót fyrir sína starfsmenn fyrir keppnina 17. febrúar og þannig kynda undir áhuga á skákinni og mæta síðan með lið til keppni!

Upplýsingar og keppnisfyrirkomulag:

• Dagsetning: föstudagur 17. febrúar kl. 19.30
• Staður: Taflfélag Reykjavíkur, Faxafeni 12 (Skeifunni)
• Sveitakeppni: Þetta er liðakeppni/sveitakeppni og tefla 3 í hverju liði. Vinnustaðirnir geta sent fleira ein eitt lið til keppni. Liðin verða þá auðkennd sem A-lið, B-lið o.s.frv. Hvert lið getur haft 1-2 varamenn.
• Umferðir: fjöldi umferða fer eftir þátttöku (7-11 umferðir). Umhugsunartími er 10 mínútur á mann.
• Keppnisfyrirkomulag: svissneskt kerfi og flestir vinningar gilda.
• Verðlaun:

1.      verðlaun: Eignabikar fyrir vinnustaðinn og farandbikar til vörslu í 1 ár auk verðlaunapeninga (medalíur) fyrir keppendur

2.      verðlaun: Eignabikar fyrir vinnustaðinn auk verðlaunapeninga (medalíur) fyrir keppendur

3.      verðlaun: Eignabikar fyrir vinnustaðinn auk verðlaunapeninga (medalíur) fyrir keppendur

• Þátttökugjald er kr. 15.000 á hverja sveit.
• Upplýsingar veitir Ríkharður Sveinsson, stjórnarmaður í Taflfélagi Reykjavíkur: netfang: [e-mail] gsm: 7722990.
• Skráning og staðfesting þátttöku: skráning fer fram á heimasíðu Taflfélags Reykjavíkur, www.taflfelag.is  á sérstöku skráningarformi eða með því að hafa samband við Ríkharð Sveinsson (sjá hér að ofan). Vinnustaðir staðfesti vinsamlegast þátttöku sinna sveita með því að greiða þátttökugjaldið inn á reikning Taflfélags Reykjavíkur í síðasta lagi tveimur dögum fyrir mót, þ.e. 15. febrúar. Reikningsnúmer: 0101-26-640269. Kennitala: 640269-7669. Vinsamlegast setjið í skýringu: Skákkeppni V. og sendið greiðslukvittun á netfangið [e-mail]

Verið velkomin að taka þátt í Skákkeppni vinnustaða 2012 - hlökkum til að sjá ykkur!

Ný skákmótaröð: Taflkóngur Friðriks

Í tilefni af „Degi Skákarinnar" á fimmtudaginn kemur, þann 26. janúar,  á afmælisdegi Friðriks Ólafssonar, stórmeistara, fremsta skákmanns Íslands fyrr og síðar, verður efnt til nýrrar skákmótaraðar í Listasmiðjunni Gallerý Skák í Bolholti honum til heiðurs.  Stefnt er að því að hún verði framvegis árlegur viðburður í janúarmánuði ár hvert.  

Um er að ræða 4 kvölda Grand Prix kapptefli og mótaröð þar sem átta efstu sæti í hverju móti telja til stiga (10-8-6-5-4-3-2-1) líkt og í Formúlu 1.  Keppt verður um veglegan farandgrip, myndarlegan taflkóng úr Hallormsstaðabirki, sem tileinkaður hefur verið Friðrik Ólafssyni. 

Sigurvegari ár hvert fær nafn sitt skráð á styttuna gullnu letri og verðlaunapening að auki, því  Taflkóngurinn vinnst aldrei til eignar og fer á safn með tíð og tíma.  Þrjú bestu mót hvers keppanda reiknast til stiga en taka verður þátt í a.m.k. 2 mótum til að teljast með. 

Kappteflið á fimmtudaginn hefst kl. 18 og verða tefldar 11 umferðir með 10 mín. umhugsunartíma.  Lagt er í púkk fyrir kaffi, kruðeríi og kræsingum í taflhléi.  (Kr. 1.000).

Friðrik mun mæta á svæðið upp úr kl. 20, í tilefni dagsins og árita nafna sinn.