Frábær þátttaka á Jólapakkamóti Hellis

Metþátttaka var á Jólapakkamóti Hellis sem fram fór í Ráðhúsi Reykjavíkur í gær.  Alls tóku um 270 unglingar þátt í mjög vel heppnuðu móti en mest höfðu um 230 skákmenn tekið þátt.   Júlíus Vífill Ingvarsson, borgarfulltrúi og formaður Skákakademíu Reykjavíkur setti mótið og lék fyrsta leik þess.  

Afar góð stemming myndaðist á mótinu.  Skákskóli Íslands kynnti starfsemi sína, Sigurbjörn Björnsson var með bóksölu og Skákakademíubræðurnir Björn Þorfinnsson og Stefán Bergsson kynntu starfsemi akademíunnar og taflfélaganna í borginni með dreifbréfum auk þess að fara á kostum við verðlaunaafhendingu mótsins.

Fjöldi barna fékk jólapakka bæði í verðlaun og happdrætti.   Allir keppendur voru svo leystir út með nammipoka frá Góu.   

Mestan heiðurinn á vel heppnuðu og skipulögðu móti eiga formaður og varaformaður Hellis, Vigfús Ó. Vigfússon og Edda Sveinsdóttir.   

Heildarúrslit og myndir frá mótinu eru væntanleg á vefinn í kvöld.   Til að auðvelda biðina má benda á fréttir RÚV og Stöðvar 2 frá í gær um mótið.

• Frétt RÚV
• Frétt Stöðvar 2