TORG-mót Fjölnis hefst kl. 11

Allt stefnir í góða þátttöku á Torgmóti Fjölnis sem fram fer á morgun laugardag á Foldatorgi í Grafarvogi.

Skákmótið hefst kl. 11.00 með því að Kjartan Magnússon formaður ÍTR leikur fyrsta leikinn og því lýkur kl. 13.00. Að þessu sinni er TORG skákmót Fjölnis hluti af mikilli Torghátíð fyrirtækjanna í verslunarmiðstöðinni við Hverafold.Nú þegar hafa allir sterkustu skákmenn Fjölnis, Hellis og TR á grunnskólaldri tilkynnt um þátttöku auk þess sem reiknað er með hópi barna úr grunnskólunum í Grafarvogi. Á annan tug vinninga er í boði og keppt um þrjá eignabikara. NETTÓ Hverafold býður öllum þátttakendum upp á ókeypis veitingar í skákhléi.

Tefldar verða sex umferðir og tímamörk eru 7 mínútur. Verðlaunaafhending verður strax að loknu skákmóti. Þátttaka er ókeypis og heimil öllum krökkum á grunnskólaaldri. Að móti loknu verða jólasveinar, blöðrufólkið, spákona og veltibíll mætt á svæðið.

Þátttökuskráning á staðnum og eru keppendur beðnir um að mæta tímanlega.