Carlsen sigraði með yfirburðum í Nanjing - brýtur 2800 stiga múrinn!

 

Magnus Carlsen (2772) sigraði með fáheyrðum yfirburðum á Pearl Spring-mótinu sem lauk í nótt í Nanjing í Kína.  Í lokaumferðinni sigraði hann Rússann Jakovenko (2742).  Carlsen hlaut 8 vinninga í 10 skákum, 2½ vinning meira en stigahæsti skákmaður heims Topalov (2813), en sá árangur samsvarar 3002 skákstigum. Árangur Carlsen á mótinu er væntanlega einn allra besti árangur skáksögunnar.  Carlsen er samkvæmt Chess Live Rating næst stigahæsti skákmaður heims með 2800,8 skákstig.  

Alls tóku sex skákmenn þátt í mótinu og voru meðalstig 2764 skákstig.  Tefld var tvöföld umferð. 

Úrslit 10. umferðar:

Carlsen, Magnus	- Jakovenko, Dmitry	1-0
Topalov, Veselin	- Radjabov, Teimour	½-½
Leko, Peter	- Wang Yue	½-½

 

Staðan:

• 1. Carlsen (2772) 8 v.
• 2. Topalov (2813) 5½ v.
• 3. Wang Yue (2736) 4½ v.
• 4.-6. Radjabov (2757), Leko (2762) og Jakovenko (2742) 4.

• Heimasíða mótsins 
• Skákirnar í beinni

Athugasemdir

[Gunnþór Þ.Ingason (IP-tala skráð) 10.10.2009 kl. 00:12]

Frábær frammistaða hins unga Norðmanns ber vott um skákasnilld en líka fágætan persónustyrk, einbeitingu og yfirvegun. Vegni honum áfram vel á leið sinni til heimsmeistaratignar í manntafli og verði hann síðan heimsmeistari sem allra lengst.

Blessunaróskir, Gunnþór

[Óttar Felix Hauksson (IP-tala skráð) 10.10.2009 kl. 23:15]

Ágæti ritstjóri,

Það er talað um að rjúfa hljóðmúrinn. Eins er sagt að Magnus Carlsen rjúfi 2800 stigamúrinn. Ef hann bryti hann, gætu allir gengið í gegn og þú líka. Það er ekki svo. Rómverjar brutu niður múra Jerúsalemborgar. Berlínarmúrinn var seinna brotinn niður og allir gátu gengið yfir til Vestiur- Berlínar. Menn reyna að brjóta niður múra fordóma. En mundu að Magnús Carlsen rauf stigamúrinn. Íslenskan er á köflum svolítið snúinn Gunnar, en reynum alltaf af fremsta megni að verja hana, það er hluti af sjálfstæðisbaráttu okkar Íslendinga.