Skákfélag Vinjar, Hrókurinn og Hellir með stórmót á laugardag

Skákmót verður haldið í göngugötunni í Mjódd, laugardaginn 10. október í tilefni alþjóðlegs geðheilbrigðisdags. Skráning hefst klukkan 15 en mótið byrjar kl. 15:30. Skákfélag Vinjar, Hrókurinn og Taflfélagið Hellir sameinast um mótshald að þessu sinni og stefnt er á metþátttöku en 39 skráðu sig til leiks í fyrra er mótið var í Perlunni.

Er þetta í fimmta sinn sem mót þetta er haldið og mun FORLAGIÐ gefa glæsilega vinninga á mótið sem fyrr. Glæsilegir bókavinningar eru fyrir þrjú fyrstu sætin, 12 ára og yngri, 13-18 ára, 60+ og bestan árangur kvenna. Þar að auki eru happadrættisvinningar.

Tefldar verða sjö umferðir með sjö mínútna umhugsunartíma. Skákstjórar eru Hrannar Jónsson og Vigfús Ó. Vigfússon en yfirdómari Róbert Lagerman.

Gunnar Björnsson, forseti Skáksambands Íslands, setur mótið og leikur fyrsta leikinn.

Allt skákáhugafólk er velkomið og það kostar ekki krónu að vera með.

Heilmikil dagskrá er í Mjóddinni frá klukkan 13:00 svo það eru um að gera að mæta tímanlega, en allt um daginn má sjá á www.10okt.com

Alþjóða geðheilbrigðisdagurinn er haldin víðsvegar í heiminum þann 10 október ár hvert. Vefurinn www.10okt.com  er samstarfsverkefni þeirra aðila sem koma að undirbúningi dagsins hér á landi. Alþjóða geðheilbrigðisdeginum var fyrst hrundið af stað 1992 af Alþjóðasamtökum um geðheilsu (World Federation for Mental Health) og var markmiðið þá, eins og nú, að vekja athygli á geðheilbrigðismálum, fræða almenning um geðrækt og geðsjúkdóma og sporna gegn fordómum í garð geðsjúkra.

Haldið verður upp á daginn í göngugötunni í Mjódd og í húsakynnum Hugarafls að Álfabakka 16, laugardaginn 10. október frá kl. 13:00 - 16:30. Álfheiður Ingadóttir nýr heilbrigðisráðherra mun flytja ávarp og tónlistarmennirnir Geir Ólafs, Ingó úr Veðurguðunum og unglingahljómsveitin GÁVA taka lagið. Margt verður í boði og að sjálfsögðu verður árlegt skákmót í tilefni dagsins haldið við lok formlegrar dagsskrár.

Dagskrá

13:00 | Fjölsmiðjan flytur  ljúfa gítartóna

13:20 | Ragnheiður Jonna  Sverrisdóttir verkefnastjóri Alþjóða geðheilbrigðisdagsins opnar hátíðina.

13:30 | Heilbrigðisráðherra Álfheiður Ingadóttir flytur ávarp.

13:50 | Páll Matthíasson framkvæmdarstjóri geðsvið LSH.

14:10 | Herdís Benediktsdóttir og tveir notendur kynna bókina Geðveikar batasögur.

14:25 | Unglingahljómsveitin GÁVA

14:40 | Geir Ólafs tekur lagið

15:05 | Ingó úr Veðurguðunum tekur nokkur lög

15:20 | Bergþór Grétar Böðvarsson flytur stutt lokaávarp.

15:30 | Skákfélag Vinjar, Hrókurinn og Taflfélagið Hellir halda skákmót í tilefni dagsins.

Kynningar á yfir 20 úrræðum fyrir þá sem eru að glíma við atvinnu-, eignamissi eða annað sem getur raskað geði fólks. Boðið verður upp á veitingar , vöfflur, kaffi o.fl. á geðveikt góðu verði.  Einnig verða blöðrur fyrir börnin.

Nánar á www.10okt.com