Munir til minningar um Fischer til Laugdælakirkju

Hinn 3. september sl. var forsvarsmönnum Laugardælakirkju, þeim  Sr. Kristni Ágúst Friðfinnssyni og Ólafi Þóri Þórarinssyni, fulltrúa sóknarnefndar, afhentir nokkrir gripir og pappírar til vörslu til minningar um Bobby Fischer, heimsmeistara í skák, sem hvílir þar í garði.

Er þar um að ræða 2 skrín, annað með Minningarbók, sem lá frammi í Þjóðmenningarhúsinu í Reykjavík eftir andlát hans og fjölmargir, bæði fyrirmenn þjóðarinnar, skákmeistarar og almenningur rituðu nöfn sín í, í virðingar og samúðarskyni við hinn látna, ásamt möppu með  minningarræðu Sr. Gunnþórs Ingasonar og fyrirbænum Sr. Kristins, ásamt  minningarorðum Guðmundar G. Þórarinssonar,  frá kveðjustund er fram fór að tilhlutan RJF baráttu- og stuðningshóps Bobby Fischers, skömmu eftir fráfall hans og jarðarför. Ennfremur grein Einars S. Einarssonar um baráttuna fyrir frelsi hans og hingaðkomu til Íslands, ásamt myndum ofl. Hins vegar lítinn rósaviðarkassa með minningarkveðjum, bréfum og kortum er stuðningshópi hans bárust víða að og ýmsu smálegu tengdu minningu hans.  Skrínunum fylgja 2 taflkóngar úr blýi, annar silfraður en hinn blakkur, sem tákn um að þar hvílir konungur skáktaflsins. Þá fylgdi og með innrömmuð viðhafnar sálmaskrá og minningarkort frá athöfninni.  

Allmargir ferðamenn leggja leið sína að gröf meistarans, nú síðast Milos Formann, kvikmyndaleikstjóri og rútur renna þar iðulega í hlað, þó nokkur krókur sé. Heyrst hefur að áhugi sé fyrir því að bæta þar aðstöðu og jafnvel að koma þar upp litlu safni.  Umræddir munir eru ef til vísir að því sem koma skal.

Mikið er enn ritað um og fjallað um Bobby Fischer, skákferil og allt lífshlaup hans í fjölmiðlum víða um heim og þar Íslands og Laugardælakirkju iðulega getið.

Hér á landi er nú staddur Dr. Frank Brady, prófessor og rithöfundur, höfundur metsölubókarinnar "Profile of a Prodigy", sem hér var 1972, en vinnur nú að ritun heildarævisögu Bobby Fischers. 

Myndaalbúm