Enn sigrar Carlsen í Nanjing - nálgast 2800 skákstigin

Magnus Carlsen (2772) er í ótrúlegu formi á Pearl Spring-mótinu sem fram fer í Nanjing í Kína.  Í áttundu umferð, sem fram fór í dag, sigraði Carlsen Kínverjann Wang Yue (2736) í mjög vel tefldri skák.  Carlsen hefur 6½ vinning og samsvarar frammistaða hans 3016 skákstigum! 

Carlsen hefur 2ja vinninga forskot á stigahæsta skákmann heims Topalov (2813) þegar aðeins tveimur umferðum er ólokið og hefur því þegar tryggt sér a.m.k. skiptan sigur á mótinu. 

Carlsen er í öðru sæti á heimslistanum í skák með 2796,4 skákstig og nálgast því 2800-stigamúrinn eins og óð fluga.  Topalov er hæstur með 2811,5 skákstig.  

Frídagur er á morgun og verður næstsíðasta umferð tefld á fimmtudagsmorgun.  

Alls taka sex skákmenn þátt í mótinu og eru meðalstig 2764 skákstig.  Tefld er tvöföld umferð. 

Úrslit 8. umferðar:

Carlsen, Magnus	- Wang Yue	1-0
Jakovenko, Dmitry	- Radjabov, Teimour	1-0
Leko, Peter	- Topalov, Veselin	0-1

Staðan:

• 1. Carlsen (2772) 6½ v.
• 2. Topalov (2813) 4½ v.
• 3.-4. Wang Yue (2736) og Jakovenko (2742) 3½ v.
• 5.-6. Leko (2762) og Radjabov (2757) 3 v.

Tilvalið er fyrir árrisula að fylgjast vel með mótinu en umferðirnar hefjast kl. 7 á morgnana.  

• Heimasíða mótsins 
• Skákirnar í beinni