IM Lagerman á toppnum í Rauðakrosshúsinu

Októbermót Skákfélags Vinjar og Hróksins í Rauðakrosshúsinu, Borgartúni 25, eða "nokkurskonar haustmót" fór fram í gær, mánudag klukkan 13:30 og tólf skráðu sig til leiks.

Tefldar voru 6 umferðir með sjö mínútna umhugsunartíma. Ekki var tomma gefin eftir og  barist fram á síðustu sekúndu, enda voru skákmenn, allir karlar að þessu sinni, umvafðir kvennafans sem var í prjónahóp í norðurhorni og svo nemendum í tölvufræðum í því syðra. Stutt var þó í kaffi, kex og lummur sem stokkið var í milli umferða.

Róbert Lagerman, skákstjórinn sjálfur, eða IM Lagerman eins og hann var að sjálfsögðu titlaður eftir nýjustu afrek, náði fimm vinningum og sigraði nokkuð örugglega. Einn sterkasti stigalausi skákmaður landsins, Hrafn Jökulsson, varð annar með 4,5 og Björn Sölvi Sigurjónsson varð þriðji með 4. vinninga, aðeins hærri á stigum en Gunnar Nikulásson sem líka krækti í fjóra.

Efstu sætin gáfu bíómiða og aðrir fengu skákbækur svo allir voru þvílíkt sáttir.

Úrslit:

 

• 1.  Róbert Lagerman                 5
• 2.  Hrafn Jökulsson                   4,5
• 3.  Björn Sölvi Sigurjónsson         4
• 4.  Gunnar Nikulásson              4
• 5.  Birgir Berndsen                   3,5
• 6.  Kristján B. Þór                     3
• 7.  Arnar Valgeirsson                2,5
• 8.  Árni Pétursson                      2
• 9.  Ásgeir Sigurðsson                 2
• 10. Magnús Aronsson                2
• 11. Haukur Halldórsson             2         
• 12. Jón Gauti Magnússon          1,5

 

 

Athugasemdir

[Páll Sig (IP-tala skráð) 6.10.2009 kl. 14:40]

Hrafn er ekki lengur stigalaus. 1735 eftir 16 skákir og 2130 í atskákinni eftir 12 reiknaðar skákir. Stigin eru birt þegar komnar eru amk. 9 reiknaðar skákir.