Skákharpan II - Grand Prix mót öldunga

Hinni nýstárlegu mótaröð um SkákHörpuna á vegum Skákklúbbs eldri borgara Riddarans í Hafnarfirði verður framhaldið nú í október og  hefst miðvikudaginn 7. október nk.,  þar sem efstu keppendur ávinna sér stig fyrir samanlagðan besta árangur í 3 mótum af fjórum, 10-8-6-5-4-3-2-1, líkt og í Formúlu 1.    

Teflt verður alla 4 miðvikudaga í október kl. 13-17, 11 umferðir hverju sinni með 10 mín. umhugsunartíma.  Í fyrra vann Sigurður  A. Herlfusen, hörpuna með fullu húsi.  

SkákHarpan er fagur farandgripur sem gefinn var til heiðurs Fjölni  Stefánssyni, tónskáldi og fv. skólastjóra, fyrir áratuga tryggð við listagyðjurnar tvær, en hann tefldi í klúbbnum um árabil.   Keppt er um gripinn árlega verður um gripinn árlega um leið og slegið er á létta hörpustrengi, á hvítum reitum og svörtum,  í Strandbergi, safnaðarheimili  Hafnarfjarðarkirkju, þar sem á þriðja tug eldri skákmanna af  höfuðborgarsvæðinu hittast til tafls eftir hádegi á miðvikudögum allan ársins hring.