Pétur Atli sigraði á Vinjarmóti

Tólf þátttakendur skráðu sig til leiks í hraðskákmóti Skákfélags Vinjar sem haldið var í Rauðakrosshúsinu, Borgartúni 25, í gær, strax uppúr hádeginu.

Mikið líf var í húsinu því í austurhorninu var Valgerður Magnúsdóttir, sálfræðingur, með fyrirlestur um sálrænan stuðning og í vesturhorninu hann Sveinbjörn Fjölnir Pétursson að lóðsa byrjendur í gegnum facebook.

Skákpiltarnir - því engin stúlka var með -  plantaði sér bara sem næst kaffinu og kökunum og kíkti annað slagið á hóp kvenna sem prjónaði sem mest þær máttu í sófahorninu undir leiðsögn Kolbrúnar Pétursdóttur.

Tefldar voru sex umferðir með sjö mínútna umhugsunartíma og stjórnaði Hrannar Jónsson mótinu styrkum höndum.

Pétur Atli Lárusson, Skagapilturinn sterki, byrjaði á því að tapa fyrir Hauki Halldórssyni úr Skákfélagi Vinjar en vann svo næstu fimm og stóð uppi sem sigurvegari.

Annar kom svo Hrannar sjálfur með fjóra og hálfan, örlítið hærri á stigum en Akureyringurinn Eymundur Eymundsson sem hafði 4,5 einnig.

 

Bókaverðlaun voru fyrir efstu sætin og aðrir fengu skákbók til að glugga í fyrir næsta mót. En úrslitin urðu:

 

1.    5.0   Pétur Atli Lárusson 

2.    4.5   Hrannar Jónsson       

3.    4.5   Eymundur Eymundsson     

4.    3.5   Haukur Halldórsson      

5.    3.5   Kristján B. Þór   

6.    3.0   Ásgeir Sigurðsson  

7.    3.0   Magnús Aronsson     

8.    3.0   Guðmundur Valdimar Guðmundsson  

9.    2.5   Arnar Valgeirsson    

10.   1.5   Luigi Formicola      

11.   1.0   Jón Gauti Magnússon 

12.  1.0   Einar Björnsson