Arnar er meistari Máta

Uppskeruhátíð Taflfélagsins Máta fór fram um verslunarmannahelgina og var Arnar Þorsteinsson krýndur meistari Máta 2009. Þó svo að hljótt hafi verið um Mátana á þessari síðu hefur starfið verið með miklum ágætum. Mátar hafa hist svo til vikulega í húsnæði Rauða krossins við Garðatorg í Garðabæ, hreyft menn og rætt landsins gagn og nauðsynjar. Á þessum mótum hefur Arnar verið sigursælastur, þó svo að Rúnar Sigurpálsson hafi velgt honum undir uggum, þegar hann hefur átt heimangengt. Einnig hefur Jakob Þór Kristjánsson komið sterkur inn í hléum með stjórnmálaskýringar líðandi stundar.

Á myndinni hampar Arnar sigurlaununum, forláta eignarbikar þar sem stakkur og umgjörð eru sniðin eftir vexti og viðgangi í þjóðfélaginu. Við hlið hans er Pálmi R. Pétursson, formaður Mátanna, sem gárungarnir vilja nefna Yfirmáta af þeim sökum.

Mátar hittast áfram í vetur á fimmtudögum kl. 20:00 við Garðatorg. Stefnt er að því að opna húsið með reglulegum hætti en annars eru allir velkomnir. Netfang Mátanna er: [e-mail].