Daði sigraði á öðru Sumarmóti Vinnuskólans og Skákakademíunnar

Annað sumarmót Vinnuskólans í Reykjavík og Skákakademíu Reykjavíkur var vel sótt af keppendum og áhorfendum. Alls tóku 26 keppendur þátt í mótinu og var hart barist í veðurblíðunni.

Krakkar af skák- og leikjanámskeiði Skákakademíunnar voru áberandi í hópi þátttakenda sem og unglingar í Landnemahópi Vinnuskólans en einnig létu nokkrir kunnir meistarar sjá sig eins og Róbert Lagerman, Rúnar Berg, Daði Ómarsson, Stefán Bergsson, Ingi Tandri Traustason og Birgir Berndsen.

Það má því með sanni segja að mótið hafi verið litskrúðugt enda vakti það töluverða athygli meðal gangandi vegfarenda nutu veðurblíðunnar.

Daði Ómarsson og Rúnar Berg urðu efstir í mótinu með 4,5 vinninga af 5 mögulegum. Þeir gerðu innbyrðis jafntefli í baráttuskák en lögðu aðra andstæðinga sína að velli.  Til gamans ákváðu skákstjórarnir, Björn Þorfinnsson og Davíð Kjartansson, að tefld yrði ein úrslitskák á stóra útitaflinu með 10 mín. umhugsunartíma. Rúnar og Daði tóku vel í hugmyndina og varð úr hin besta skemmtun, sérstaklega í byrjun þar sem skákmennirnir úðuðu út leikjunum með ógnarhraða enda vill enginn lenda í tímahraki á þessu stóra borði! Þegar upp var staðið hafði Daði sigur og var því úrskurðaður sigurvegari mótsins.

Í þriðja sæti á stigum varð Ólafur Gauti Ólafsson en hann hlaut fjóra vinninga eins og nokkrir aðrir skákmenn. Ólafur vann fjórar fyrstu skákirnar sínar og var einn efstur fyrir síðustu umferð en varð að játa sig sigraðan eftir mikla baráttu gegn Daða Ómarssyni. 

Efnilegasti keppandinn var svo útnefndur Sigurður Kjartansson, átta ára gamall labbakútur úr Kópavogi en hann hlaut þrjá vinninga.

Skemmtilegu móti var svo slitið með því að sigurvegararnir fengu afhent gómsæt verðlaun frá Hamborgarbúllunni.

Næsta sumarmót verður haldið miðvikudaginn 15.júlí, kl.13.00. við útitaflið í Lækjargötu.