Ársæll Júlíusson sleginn til heiðursriddara

Riddarinn - Skákklúbbur eldri borgara á höfuðborgarsvæðinu - með aðsetur  að Strandbergi, félagsheimili Hafnarfjarðarkirkju,  fagnar 10 ára afmæli sínu á þessu ári.  Þar hittast öldungar til tafls vikulega allan ársins hring, á miðvikudögum kl. 13-17 og eru þeir skákfundir jafnan fjölsóttir. Nú í vikunni voru 25 skákfinnar mættir til leiks. Elsti félagi klúbbsins,  Ársæll Júlíusson, fv. stjórnarráðsfulltrúi,  var þar  heiðraður sérstaklega í tilefni 90 ára afmælis hans 12. maí sl. Var Ársæll sleginn til heiðursriddara með pomp og prakt, fyrir áratuga taflmennsku, góðan árangur við skákborðið og afhendur sérstakur minjagripur og skjal því til staðfestingar.  Ársæll er einstakt prúðmenni en  þó jafnan harður í horn að taka á skákborðinu, jafnframt því að vera hrókur alls fagnaðar í góðum skákvinahópi.  Hann  hlaut 50% vinninga eða 5 ½ en tefldar voru 11 umferðir, hvatskákir með 10 mín. umhugsunartíma.

Myndir frá Einari S. Einarssyni.