Arnar og Björn tefla til úrslita í dag kl. 16 í Kaupþingi, Borgartúni

 

Úrslitaeinvígi Íslandsmótsins í atskák milli alþjóðlegu meistaranna Arnars E. Gunnarssonar og Björns Þorfinnssonar fer fram föstudaginn 8.maí, í höfuðstöðvum Kaupþings, Borgartúni 19.  Teflt verður í fyrirlestrarsal bankans á jarðhæð og hefst einvígið stundvíslega kl. 16.00.

Tefldar verða tvær atskákir með 25 mín. umhugsunartíma. Ef að staðan er jöfn að þeim loknum fer fram bráðabanaskák um Íslandsmeistaratitilinn.

Báðir keppendurnir hafa áður hampað Íslandsmeistaratitlinum.  Björn er núverandi Íslandsmeistari eftir sigur á bróður sínum, Braga Þorfinnssyni, í æsispennandi einvígi á síðasta ári. Björn tók þá við titlinum af Arnari en svo skemmtilega vill til að Arnar varð einnig Íslandsmeistari með því að leggja Braga Þorfinnsson að velli í úrslitaeinvígi.

Það má því sanni segja að á morgun fari fram uppgjör tveggja bestu atskáksmanna landsins.

Skákáhugamenn eru hvattir til að mæta á staðinn og fylgjast með baráttunni en einnig verður hægt að fylgjast með skákunum á heimasíðu Skáksambands Íslands - http://www.skaksamband.is