Jón Trausti og Kristófer Jóel verðlaunaðir

Á síðustu laugardagsæfingu Skákdeildar Fjölnis fór fram verðlaunaafhending fyrir frábæra frammistöðu í vetur. Um 25 - 30 krakkar hafa mætt reglulega alla laugardagsmorgna og hefur þar farið fram markviss kennsla og regluleg hraðskákmót. Jón Trausti Harðarson Rimaskóla hlaut afreksbikar skákdeildar Fjölnis veturinn 2008 - 2009.

Jón Trausti er einn af Norðurlandameisturum Rimaskóla frá 2008 og efldi á 1. borði í liði skólans sem vann Íslandsmót barnaskólasveita í mars sl.

Kristófer Jóel Jóhannesson hlaut æfingabikar Fjölnis 2008 - 2009.  Kristófer mætti á hverja einustu æfingu vetrarins, hann er þrátt fyrir ungan aldur kominn í hóp þeirra bestu í skáksveitum Rimaskóla og hefur tekið þátt í framhalds-og úrvalshópi Davíðs Kjartanssonar í Skákskóla Íslands.

Umsjón með skákæfingum Fjölnis í vetur hafði Helgi Árnason formaður skákdeildarinnar og um þjálfun sáu þau Ingvar Ásbjörnsson og Sigríður Björg Helgadóttir.