Pistill Gunnars Finnlaugssonar frá Wijk aan Zee

Gunnar Finnlaugsson hefur sent Skák.is pistil frá heimsókn sinni á Corus-mótið í Wijk aan Zee.  Einnig má finna myndir frá heimsókninni í myndaalbúmi.  Ritstjóri kann nafna sínum bestu þakkir fyrir.

Pistill Gunnars:

Vegalengdin frá Lundi í Wijk er um það bil 1 000 kílómetrar. Við "Svíarnir" Calle Erlandsson, Lars Grahn og undirritaður keyrðum fyrstu 300 kílómetrana, en þegar við komum yfir til Jótlands fluttum við okkar yfir í stóran og þægilegan bíl Per Skjoldagers.

Vorum við í góðu yfirlæti hjá Jurgen Stigter í Amsterdam fimmtudagskvöld og föstudagsmorgun. Jurgen er varaformaður KWA (kwabc.org) og sennilega er það bara Lothar Schmid sem á stærra safn ýmissa skákmuna.

Elsta bókin sem hann sýndi okkur er frá 1492 !

Eins og skákmenn vita  þá er Corus mótið árlegur viðburður og var Corus 2009 71. mótið. Mótaröðin hófst 1938 í Beverwijk og mótið flutti síðan til Wijk aan Zee 1968. Mótið hét Hoogoven þangað til árið 2000 en þá höfðu hollensku og ensku stálrisarnir sameinast undir nafninu Corus. Eina árið sem mótið hefur fallið niður er 1945.

Okkar ágæti Friðrik Ólafsson vann mótið með yfirburðum 1959. Þá tefldi 10 meistarar í efsta flokki, Larsen varð í áttunda sæti. Hann er sá skákblaðamaður sem oftast skrifar um veðrið. Ef til vill hefur hið nístandi rok við Norðursjóinn verið orsök lélegs árangurs Larsens. Þó er alltaf teflt innanhúss ! Kalt og napurt var einnig að þessu sinni og voru gróðurhúsaáhrifin illa fjarri. Hollendingar reyna að spara hitunarkostnað og eru hótelherbergi oftast köld þegar maður kemur. Þegar konan í móttökunni sá að ég var með íslenskt vegabréf spurði hún hvort ekki væri kalt á Íslandi gat ég huggað hana með því að veturinn í Hollandi væri enginn eftirbátur roksins í Reykjavík.

Friðrik stóð sig einnig með prýði 1976 og deildi þá 1. sæti með Ljubojevic. Ókunnugur gæti haldið að wijk þýddi vík. En það eru engar víkur þarna að því að ég best veit og auk þess er Beverwijk inni í landi. Wijk mun þýða svæði eða eitthvað í þá veru.

Aftur að mótshaldinu. Þátttakendur er yfir þúsund og eru ýmis mót i gangi alla tímann. 

Teflt er stórri byggingu og síða eru skákskýringar í stóru tjaldi. Þar skýrðu hollenskir meistarar skákirnar og voru sæti fyrir fleiri hundruð. Stemmingin þar minntu mig á ráðstefnusal Hótel Loftleiða hér á árum áður. Eitt er víst að þetta er ekki síðasta heimsókn mín á Corus mótið, en næst gleymi ég ekki síðu nærbuxunum!

Gunnar Finnlaugsson