Tólfan vann deildabikarinn - enn og aftur

Á þriðjudag var haldið jólamót milli geðdeilda/athvarfa í salnum að Kleppsspítala. Hrókurinn og Skákfélag Vinjar hafa staðið fyrir þessum mótum um árabil en mót milli deilda hófust reyndar fyrir ríflega tuttugu árum.

Sex þriggja manna lið voru skráð til leiks og hart var barist, enda áttu þrjár sveitir möguleika á sigri fyrir lokaumferðina.

Deild 12 hefur nánast einokað bikarinn undanfarin ár, enda sterkir skákmenn sem tengjast þeirri deild, hvort sem er í starfi eða veikindum. Hefði deildin getað sent tvö öflug lið en lánaði stigahæsta keppandann, Gunnar Frey Rúnarsson hinn sterka, yfir í Iðjuþjálfun.

Aðrar deildar voru 13, 32a, 32c og Vin. Í þeim voru 17 piltar og ein stúlka.
Vinjarliðið (Björn Sölvi Sigurjónsson, Guðmundur V. Guðmundsson og Arnar Valgeirsson) byrjaði best og leiddi framan af. En fór á taugum gegn deild 12 (Rafn Jónsson, Ágúst Gíslason og Einar Rúnar Kristjánsson) og tapaði 0-3. Deild 32c, leidd af Haukamanninum og hugsuðinum knáa, Aðalsteini Thorarensen, blandaði sér í baráttuna með sigri á deild 12, tvö-eitt, en hélt ekki haus og varð í fjórða sæti. Fyrir síðustu umferð áttu þrjú lið séns en draumur Iðjuþjálfunar dó með tapi, 0-3 fyrir Vin. Tólfan lék af öryggi og hafði þetta með hálfum vinningi, 11 af 15 mögulegum en Vin var með 10,5.

Hrókurinn gaf bikar og allir þátttakendur fengu bókavinning. Róbert Harðarson stýrði.