Ólympíumótið í Dresden, 9. pistill

Gærdagurinn var mikill sorgardagur hjá íslensku liðunum og sennilega einn sá versti í íslenskri Ólympíusögu.  Tap hjá karlaliðinu gegn Sameinuðu Arabísku Furstadæmunum er eitthvað sem við megum ekki sætta okkur við.  Það borgar sig ekki að segja meira um þetta tap í bili, en eftir mótið þarf að setjast niður og skoða stöðuna.  Kvennaliðið tapaði líka illa gegn Luxemborg 0,5-3,5 sem er eitthvað sem gat gerst miðað við stigamuninn en er samt erfitt að kyngja. 

Á eftir mætir karlaliðið athyglisverðri sveit, þe sveit fatlaðra.  Þó að nafnið hljómi ekki traustvekjandi þá eru þetta ágætis skákmenn, 4 alþjóðlegir meistarar allir frá Rússlandi og Útefla í dag, en krafan er samt að sjálfsögðu sigur.  Kvennaliðið mætir Nýja Sjálandi og ætti að hafa sigur, en það er samt ekki hægt að bóka neitt í þessu.  Ætli ég láti þetta ekki nægja í þetta skiptið.

kveðja, Sigurbjörn

Athugasemdir

[Guðbjörn Sigurmundsson (IP-tala skráð) 22.11.2008 kl. 12:24]

Sæll Sigurbjörn!

Fylgdist með ásamt hornverjum í gær og úrslitin voru sár vonbrigði. Flest klikkaði, Hannes tapaði illa og skyndilega, Stefán fann ekki vænlegar leiðir og Þröstur skíttapaði. Sendi ykkur baráttukveðjur! Avanti Islandesi e vinceremo il resto. Veit þú kannt ítölsku! 'Afram Ísland og Inter!!

Þinn gamli prófdómari og skákáhugamaður,

Guðbjörn

[Gunnar Finnlaugsson (IP-tala skráð) 22.11.2008 kl. 18:17]

Góðir hálsar !

Þetta eru auðvitað slæm úrslit. en heimurinn ferst ekki þrátt fyrir allt.

Ég er þó enn þeirrar skoðunar að liðsstjórinn eigi að vera eldri og reyndari en elsti maður liðins. Ungir menn gráta um aldur fram.

Frá hinum gamla og gráhærða skákkennara hins ágæta Laugardælamanns Guðbjörns. Í þau skifti sem ég hef verið í Dubai hef ég spilað golf...

 Með baráttukveðju

 Gunnar Finnlaugsson