Ólympíumótið í Dresden, 7. pistill, leitin af pistli nr 6

Einsog fram kom hjá mér á Skákhorninu í gær þá var ég búinn að skrifa pistil nr 6 þegar Internet Explorer hrundi hjá mér þannig að pistilinn glataðist.  Það var kannski eins gott því í pistlinum lýsti ég mikilli bjartsýni fyrir umferðina í gær en einsog menn vita fór hún illa fyrir okkur því við töpuðum 1-3 gegn þéttu liði Víetnama.  Eitthvað var taflmennskan döpur hjá okkar mönnum í gær, en sigurinn hjá Stebba gladdi þó þannig að það er alltaf eitthvað til að gleðjast yfir. 

Á eftir teflum við gegn Kólumbíu sem hafa verið að standa sig vel hingað til.  Við ætlum okkur samt að sjálfsögðu sigur og ekkert annað þannig að við bíðum umferðarinnar með mikilli eftirvæntingu.  Kólumbíumennirnir hafa staðið sig vel einsog áður segir og eru 3 efstu borðin með performance yfir 2600 stig, en reyndar hafa 4. og 5. borðs mennirnir ekki staðið sig ýkja vel.  Þrír efstu mennirnir eru einmitt alþjóðlegir meistarar og stefna þeir greinilega á stórmeistaraáfanga í mótinu miðað við frammistöðuna hingað til.

Af stelpunum er það að segja að þær unnu 4-0 í gær gegn Kosta Ríka sem eru að sjálfsögðu góð úrslit.  Þær tefla svo gegn Mexíkó á eftir sem gæti orðið býsna jöfn viðureign.  Sveiflurnar virðast vera nokkuð miklar hjá kvennaliðinu því 4 viðureignir hafa endað 4-0, 2 unnist svoleiðis og 2 tapast svoleiðis.  En þær eru nú með 6 stig og geta ágætlega við unað.

Af áhugaverðum viðureignum í gær má nefna að Finnar og Norðmenn gerðu 2-2 jafntefli þar sem Tomi Nyback vann Magnus Carlsen af öryggi með hvítu mönnunum.  Ég fylgdist vel með þessari viðureign því hún var á næsta borði við okkar og var átakanlegt að fylgjast með Carlsen á síðustu metrunum í skákinni.  Hann var greinilega niðurbrotinn, en sem betur fer fyrir hann sá hann ekki þegar Topalov kom að borðinu til að kíkja á stöðuna.  Þegar Topalov kíkti á stöðuna var Nyback með tvær drottningar á borðinu gegn drottningu og biskups Carlsens og var Topalov eitt spurningamerki í framan.  Hann byrjaði á að kíkja á stöðuna, leit svoframan í Nyback, svo aftur á stöðuna, svo á Nyback og loks á nafnaspjaldið til að athuga hvaða maður þetta væri sem var að fara svona illa með Carlsen.  Eftir að skákinni lauk sat Carlsen svo í drjúga stund við borðið í öngum sínum og loksins þegar hann stóð upp þusti að einhver áhorfandi og bað um eiginhandaráritun!  Ekki beinlínis það sem Carlsen vildi sjá og afþakkaði hann samstundis, setti undir sig hausinn og labbaði í burtu.  Greinilegt að hann átti ekki von á að tapa fyrir frænda sínum frá Finnlandi.  Viðureignin sjálf endaði 2-2 og fengust hrein úrslit í öllum skákunum og var tam mjög áhugavert að fylgjast með skákinni Agdestein - Tapani Sammalvuo sem Tapani vann með svörtu mönnunum.

Armenar og Rússar eru núna efstir í mótinu með 11 stig af 12 mögulegum og mætast þessir risar í dag.  Svo eru nokkrar þjóðir með 10 stig og eru heimamenn þar á meðal, en þeir hafa enn ekki tapað viðureign.  Gert jafntefli við Rússa og Ukraínumenn þannig að þeir eru til alls líklegir.  Við erum svo í  41-57. sæti  og ætlum okkur að sjálfsögðu hærra!

kveðja, Sigurbjörn