Ólympíumótið í Dresden, 5. pistill

Eftir æsilega viðureign gegn Moldóvum í gær þá mætum við Brasilíumönnum í dag í opna flokknum.  Viðureignin í gær var mjög spennandi og var erfitt að fylgjast með á hliðarlínunni því sveiflurnar voru miklar.  Moldóvarnir notuðu greinilega gömlu góðu strategíuna að gera jafntefli með svörtu og treysta svo á amk 1,5 með hvítu mönnunum og má segja að fljótlega hafi verið ljóst að þeir næðu fram markmiðum sínum með svörtu mönnunum.

En aftur á móti litu hvítu stöðurnar hjá Moldóvum alls ekki vel út frá sjónarhóli Moldóva, þeas Hannes og Stefán fengu báðir snemma mjög fínar stöður með svörtu mönnunum.  Á tímabili var ég farinn að eygja von um amk 1,5 vinning hjá þeim félögum, en þá valdi Stebbi rangt plan, valdi að þvinga andstæðinginn til að gefa mann fyrir tvö peð og kóngssókn sem því miður reyndist alltof gott fyrir hvítan.  Ég veit eiginlega ekki hvort var meira niðurdrepandi að horfa á stöðuna hjá Stefáni eða Stefán sjálfan því hann vissi greinilega að hann var með vonlausa stöðu og uppgjafarsvipurinn leyndi sér ekki í fasi hans.

Á fyrsta borði tefldi Bologan af miklum krafti gegn Hannesi og fórnaði peði á athyglisverðan hátt.  Hannes aftur á móti tefldi vörnina vel og náði svo að plata Bologan í tvígang, fyrst með sterkum Dd2 leik og svo með feykiöflugum g5 leik sem kom Bologan greinilega úr jafnvægi því restina af skákinni tefldi hann illa þannig að Hannes innbyrti mjög góðan sigur.  2-2 jafntefli því staðreynd og getum við ágætlega unað við það. 

Á eftir er það svo Brasilía og munum við kappkosta að vinna þá viðureign og koma okkur þannig í námunda við toppinn.

Frændur okkar Norðmenn halda áfram að standa sig vel, gerðu jafntefli við Englendinga í gær þar sem Carlsen vann Adams og Agdestein hélt jöfnu gegn Short með svörtu mönnunum sem telst góður árangur.  Á eftir mæta þeir Azerbaijan en því miður teflir Radjabov ekki með Azerbaijan í dag, heldur er Mamedyarov á fyrsta borði. 

Af áhugaverðum skákum í gær má ég til með að benda á Caruana - Korchnoi þar sem Ítalinn ungi algjörlega rúllaði Korchnoi gamla upp.  Örugglega langt síðan einhver hefur farið svona illa með Korchnoi og væri gaman að vita hvort Korchnoi hafi haft orku í að hundskamma Caruana eftir skákina einsog hann gerir jafnan þegar einhverjir ungir skákmenn leyfa sér að vinna hann.  Hægt er að skoða skákina hér http://schachlive.dresden2008.de/old.games.m.ger.html og velja 4. umferð.

Af kvennaliðinu er það að segja að þær unnu Wales í gær 4-0 og mæta Bangladesh í dag.  Ættu að eiga ágætis möguleika á stigi eða stigum þar.  Þær hafa margar hverjar teflt ágætlega hingað til og var gaman að sjá Hallgerði vinna sína fyrstu skák í gær.  Vonandi fer hún þá að tefla af sama sjálfstrausti og undanfarin misseri og ef hún gerir það verður þetta gott mót hjá henni, keine spurning.

Á morgun verður svo frídagur og munum við nota hann til að sjúga í okkur þýska menningu, enda er af nógu að taka hér í Dresden.  Borgin er með þeim fallegri sem ég hef komið í og hér eru líka margir ekta-Þjóðverjar með falleg yfirvaraskegg og Herr Doktorslegt yfirbragð.  Mannlífið mætti reyndar vera aðeins meira hérna, en vísast er meira um að vera í öðrum hverfum borgarinnar.

En jæja, nóg í bili. 

Sigurbjörn