Ólympíumótið í Dresden, 4. pistill

Gærdagurinn gekk vel hjá karlaliðinu, 4-0 sigur gegn Angóla sem var aldrei í neinnu hættu og tvö örugg stig í hús.  Á eftir fáum við þétta sveit Moldavíu og væri sigur gegn þeim mjög góð úrstlit.  Moldóvar eru nr 26 í stigaröðinni þannig að þeir eru 19 sætum ofar en við.  Hannes er með svart gegn Bologan sem er þeirra langsterkasti maður og þess vegna væri mjög gott ef Hannes næði úrslitum gegn honum.  Sénsinn hjá okkur liggur fyrst og fremst á 2. og 4. borði þar sem stigamunurinn er lítill og við með hvítt á báðum borðum.  Henrik hvílir hjá okkur í dag þannig að liðið verður Hannes, Héðinn, Stefán og Þröstur.

Stelpunum gekk ekki jafn vel í gær því þær töpuðu 4-0 gegn sterkri sveit Slóvena.  Í dag mæta þær svo Wales og verður öll áhersla lögð á að vinna viðureignina og ná þannig tveimur dýrmætum stigum.  Aðalliðið teflir hjá stelpunum á eftir sem þýðir að Elsa María hvílir.

Í gærkvöldi fórum við nokkrir í karlaliðinu að borða á pizzastað sem er þarna í nágrenni við skákstaðinn.  Þegar við mætum á staðinn tökum við strax eftir afar ástfangnu pari sem situr þarna á næsta borði á þessum litla og huggulega pizzastað og helst í hendur.  Við svosem pælum ekki meira í því og förum bara í að panta matinn okkar, en á meðan við bíðum eftir matnum gerist það að stelpan bregður sér smástund frá borðinu.  Þegar hún hefur verið í burtu í ca 1 mínútu birtist sjálfur Vassily Ivanchuk á veitingastaðnum og gengur hann rakleitt að sætinu sem stelpan hafði setið í og fær sér sæti án þess að svo mikið sem heilsa grey manninum sem nú sat með eitt stórt spurningarmerki í andlitinu.  Eftir örlitla stund segir hann þó Ivanchuk að þetta sæti sé upptekið og stendur Ivanchuk þá upp og er boðið sæti á nálægu borði þar sem einhver skákáhugamaður sat.  Þar sat Ivanchuk svo í mjög þungum þönkum næsta klukkutímann og var greinilega mikið niðri fyrir því hann faldi andlitið reglulega í höndum sér og hristi jafnvel höfuðið.  Ég lét því vera eitt mitt fyrsta verk þegar ég kom á hótelherbergið að skoða skákina hans og þá sá ég að hann hafði tapað frekar illa fyrir Badur Jobaava í áhugaverðri skák sem ég hvet menn til að skoða hér: http://schachlive.dresden2008.de/old.games.m.eng.html

En nú er farið að styttast í umferð og menn að gera sig klára í slaginn þannig að ég bið að heilsa í bili.

Sigurbjörn