Ólympíumótið í Dresden, 3. pistill

Það gekk vel hjá karlaliðinu í gær, við unnum 3,5 - 0,5 í 4 baráttuskákum.  Henrik gerði jafntefli en Héðinn, Stefán og Þröstur unnu þannig að núna eru allir í liðinu komnir á blað sem er auðvitað jákvætt og gefur liðsmönnum sjálfstraust.  Á eftir teflum við gegn Angóla og þar sem við erum stigahærri á öllum borðum þá er krafa dagsins að sjálfsögðu sigur og ekkert annað. 

Ekki gekk jafn vel hjá kvennaliðinu því þær töpuðu 0-4 gegn Ítalíu þrátt fyrir að hafa á tímabili verið með mjög góðar stöður.  Á eftir mæta þær svo sterku liði Slóveníu og er ljóst að þar verður á brattann að sækja.

Einsog ég sagði frá í gær var eitthvað klikkelsi hjá Þjóðverjunum varðandi pörunina þannig að umferðin tafðist til kl 16.  Við vorum að vanda mættir vel tímanlega, en þegar klukkan var orðin 15:59 vantaði enn einn liðsmanna Yemen.  Eitthvað voru Yemenarnir farnir að ókyrrast því skv nýju reglunum er það beint tap ef menn eru ekki sestir við borðið þegar umferðin hefst.  Ég vildi að sjálfsögðu ekki missa af þessu og setti mig í stellingar til að smella mynd af auða sætinu á 2. borði, en akkúrat þegar ég smellti af hljóp einhver í veg fyrir myndavélina.  Var þar einmitt á ferðinni 2. borðs maður Yemena og settist hann lafmóður eftir mikil hlaup, greinilega dauðfeginn að hafa náð í tæka tíð.

Annars er lítið um að vera hérna, Topalov er mættur á hótelið og mun tefla í dag og svo er gaman að segja frá því að uppáhalds frændur okkar, sjálfir Færeyingar eru með 4 stig og mæta Ólympíumeisturum Armeníu í dag.  Ég er þegar búinn að þakka liðsstjóra Færeyinga fyrir lánið  sem þeir ætla að veita okkur og svo þarf ég að drífa í að finna liðsstjóra Pólverja og Norðmanna til að þakka þeim fyrir sín framlög.  Svo þarf einhver að minna mig á að labba utan í liðsstjóra Englendinganna, trúi ekki að sá taki mikið í bekk.

Af áhugaverðum viðureignum í dag má nefna Rússland - Kúba og Kína - Noregur.  Rússarnir hafa unnið báðar viðureigninar 2,5 - 1,5 þannig að þeir gera ekki meira en þeir þurfa.  Spái þeim hér með 2,5 - 1,5 sigri í dag gegn sterku liði Kúbverja.  Norðmenn eru með öflugt lið þetta árið, Carlsen, Agdestein, Kjetil Lie, Johannessen og Hammer en Kínverjarnir eru auðvitað mjög sterkir líka og þeir hafa æft sig hrikalega vel fyrir mótið.  Allt liðið hefur verið í massívum þjálfunarbúðum og einsog menn vita hefur fyrsta borðs maðurinn, Wang Yue ekki tapað skák síðan í mars á þessu ári, þá reyndar gegn einhverjum CM eða FM frá Íslandi.

Svo hvet ég menn til að fylgjast með skákunum hjá Svesnikhov.  Hann er á 2. borði hjá Lettum og vann Boris Avrukh í fyrstu umferð og var svo með fína stöðu gegn Polgar í afbrigðinu sínu í gær, en tapaði reyndar fyrir rest.  Gaman að sjá hvað kallinn er öflugur ennþá og einsog margir hafa talað um, þá halda flestir að hann sé miklu eldri en hann raunverulega er.

kveðja, Sigurbjörn

 

Athugasemdir

[Skák.is, 15.11.2008 kl. 14:34]

Einnig máttu rekast harkalega utan í liðsstjóra Hollendinga.  Hann er líka fremur væmnitítlulegur.

Kveðja,
Gunnar

[Snorri Bergz, 15.11.2008 kl. 16:47]

Í þessu ljósi voru það mikil mistök að hafa ekki skipað Gunnar Frey liðsstjóra, eða einhvern af slíkum jöxlum.