Ólympíumótið í Dresden, 1. pistill

Núna er stutt í að fyrsta umferðin byrji og mætir karlaliðið USA í fyrstu umferð og kvennaliðið fær Japan.  USA er tíunda stigahæsta liðið þannig að dagurinn gæti orðið erfiður fyrir karlaliðið, en kvennaliðið ætti að eiga þægilegan dag fyrir höndum gegn Japan.

Ferðalagið var frekar erfitt, tvö flug og lest með tilheyrandi biðum og hungri - hungri sem var svo mikið að Omar sá ekki annan kost í stöðunni en að fá sér barnamat frá syni sínum til að seðja sveltandi maga!  Þegar við komum á hótelið gleymdist hungrið samt fljótt því við sáum strax að við vorum komin á frábært hótel og hefðum ekki getað verið heppnari hvað það varðar, ég meina súkkulaði á koddanum og flatskjár og alles er ekki eitthvað sem ég átti von á þannig að ég er sáttur. 

Í morgun var mér og Omar svo aftur kippt harkalega niður á jörðina þegar við fórum á Captains-meeting sem er einhver skrautlegasta samkoma sem ég hef farið á.  Fundurinn átti að taka 3 korter en tók 3 klst og eftir fundinn var ég engu nær (vissi reyndar allt) en var búinn að heyra furðulegar spurningar einsog hvernig menn ættu að þvo óhreinu fötin og hvaða tímamörk yrði notast við.  Ekki að þetta með tímamörkin hafi verið skrýtin spurning, en það stóð skýrum stöfum í bækling sem var dreift í upphafi fundarins þannig að rtfm áður en þú spyrð svona spurninga næst :)

En núna er örstutt í umferð þanngi að það er kominn tími til að hitta liðið í lobbíinu.  Ég mun senda fleiri pistla/fréttir á næstu dögum og vonandi með myndum og safaríkum sögum.

kveðja, Sigurbjörn