Skákmót haldið í Vin á mánudag kl. 13

Þar sem vetur gekk í garð fyrir nokkru, hafa Hrókurinn og Skákfélag Vinjar ákveðið að bjóða hann velkominn með nettu móti. Bjartsýni og gleði mun ráða ríkjum, helst í allan vetur en í það minnsta mánudaginn 10. nóv.

Tefldar verða sjö umferðir með sjö mínútna umhugsunartíma og einhverntíma, þegar spennan er að fara með fólk, þá verður hið rómaða kaffihlaðborð á boðstólnum.

Fide meistarinn glæsilegi, Róbert Harðarson, verður skákstjóri og yfirdómari.

Björn Þorfinnsson, forseti Skáksambands Íslands, mætir til leiks. Hart verður barist að venju en drengilega. Enda fá allir vinning. Þátttaka er ókeypis og allir velkomnir.Vin er athvarf Rauða krossins fyrir fólk með geðraskanir og er staðsett að Hverfisgötu 47 í Reykjavík. Síminn er 561-2612