Vel heppnað skemmtikvöld í Eyjum

Í gærkveldi var fyrsta fyrirlestra- og skemmtikvöld félagsins á dagskrá. Eyjamenn eru sammála um að þessi tilraun hafi lofað góðu.  Það á hins vegar eftir að reyna meira á þetta og haldið verður áfram að bjóða upp á slík kvöld, kannski einu sinni í mánuði.

Björn Ívar Karlsson reið á vaðið og hann byrjaði að fara yfir skák Nataf (TV) og Stefáns K. frá því í deildakeppninni 2006-2007.  Það var gaman að sjá þessa skák skýrða og Birni Ívari tókst vel að skýra hinn beitta skákstíl Nataf, sem sigraði glæsilega í þessari skák.

Því næst fór Björn yfir nokkur skákdæmi og tóku áheyrendur, sem voru 12 talsins, góðan þátt í umræðum.  Björn endaði síðan á að fara yfir skák frá Herceg Novi 1970 þar sem Viktor Kortsnoj stjórnaði hvítu mönnunum á móti Bobby Fischer (Kóngindversk vörn).  Skemmtilegt var að hlusta á Björn skýra skákina sem endaði með sigri Fischers.

Fyrirlestrinum lauk um kl. 21.