EM ungmenna - pistill fimmtu umferðar

 Pistillinn seinn á ferðinni núna sem helgast af því að eftir slæmt gengi í fimmtu umferðinni var ég í engu skapi til að klára hann eftir umferðina.  Í gær var síðan frídagur þannig að ég komst ekki á netið á skákstað og það er ekki opnað fyrir netið á hótelinu fyrr en klukkan átta að kvöldi á okkar tíma og stendur opnunin til tíu.  Þessar tvær klukkustundir eru í boði m:tel.  Sökum þess hve netið var lítið opið í gær var álagið mikið þannig að ég komst ekki inn.  Varðandi skákirnar í fimmtu umferð þá gekk okkur ekki nógu vel.  Eftir frábært gengi við byrjanaundirbúning í fyrri umferðum lentum við tveimur slæmum töpum sem hægt er að skrifa á téðan undirbúning.  Tinna sat yfir í dag og var sú eina sem skilaði heilum vinningi í hús.  Þó að við séum yfirleitt heldur stigalægri en andstæðingarnir var munurinn í dag ekki eins mikill og áður þannig að fyrirfram var ég frekar bjartsýnn á daginn.  Annað átti eftir að koma í ljós.

U-12 drengir:

Friðrik Þjálfi Stefánsson (0) -  Santos Luis Segura, ESP (1739)  ½-½

Mikil baráttuskák sem lauk að lokum með jafntefli eftir um fimm klukkustunda taflmennsku.  Staðan var í jafnvægi allan tímann.  Friðrik reyndi þó ýmislegt til að vinna en andstæðingurinn sjá við því og niðurstaðan varð því jafntefli.

U-14 stúlkur:

Geirþrúður Anna Guðmundsdóttir (0) - Dimitra Vatkali (1889)  ½-½

Geirþrúður er að tefla vel á mótinu og var þessi skák engin undantekning á því.  Andstæðingur hennar varðist vel og niðurstaðan varð því jafntefli.

U-14 drengir:

Aleksandar Kokotovic, BIH (0) - Dagur Andri Friðgeirsson (1812)  1-0

Ekki góður dagur hjá Degi.  Lék illa af sér í miðtaflinu og tapaði því.

U-16 stúlkur:

Hallgerður Helga Þorsteinsdóttir (1907) - Khayala Mardan Qizi Abdulla, AZE (2029) 0-1

Slæm skák.  Hallgerður er búin að vera að tefla frábærlega á þessu móti en nú gengu hlutirnir ekki upp.  Ónákvæmni í byrjuninni leiddi til slæmrar stöðu og tap varð ekki flúið.

Jóhanna Björg Jóhannsdóttir (1655) - Lupianez Laura Jimenez, ESP (1901) 0-1

Jóhanna fékk ágætis stöðu úr byrjuninni en nýtti ekki færin og fór út í vafasamar aðgerðir sem kostuðu skákina.

U-16 drengir:

Hjörvar Steinn Grétarsson (2299) - Georgios Ketzetzis, GRE (2099)  0-1

Okkur hefur gengið vel með byrjanirnar á þessu móti en hér vorum við teknir í bakaríið.  Andstæðingur Hjörvars fór út í lítt þekkt afbrigði þar sem hann var öllum hnútum kunnugur en Hjörvar þekkti ekki stöðuna.  Hjörvari til varnar má segja að hvorugur þjálfaranna hafði séð þessa aðferð og leit í base eftir að heim var komið sýndi einungis 3-4 skákir í þessu afbrigði.

Tadeas Klecker, CZE (2104) - Patrekur Maron Magnússon (1872)  1-0

Patrekur átti öll færi á því að stýra þessari skák í jafntefli en hann fann ekki virkustu vörnina og því fór sem fór.

U-18 stúlkur:

Tinna Kristín Finnbogadóttir (1655) - Skotta  1-0

Tinna sat yfir í þessari umferð því það stendur á stöku í þessum flokki.  Þessi "sigur" Tinnu lagaði aðeins stöðuna hjá okkur í dag.

U-18 drengir:

Sverrir Þorgeirsson (2102) - Nemanja Vukcevic, MNE (1884)  ½-½

Andstæðingur Sverris tefldi byrjunina undarlega en Sverrir svaraði því mjög vel.  Eftir vafasama taflmennsku andstæðingsins missti Sverrir því miður af flottri taktík sem hefði klárað skákina umsvifalaust.  Þar með náði andstæðingurinn að stýra skákinni í dautt jafntefli í mislitu biskupaendatafli með hrókum.

Viacheslav Kulakov, RUS (2360) - Daði Ómarsson (2029)  ½-½

Enn ein mjög góð skák hjá Daða.  Daði tefldi vel og gerði jafntefli við sterkan andstæðing með svörtu.  Ég hefði þó kosið að hann reyndi að tefla lokastöðuna áfram en það er erfitt að lá honum á taka jafntefli gegn svona sterkum andstæðingi.

Davíð Ólafsson