Friðrik á frímerki

Á morgun kemur út nýtt frímerki tileinkað Friðrik Ólafssyni en í ár eru 50 ár liðin síðan Friðrik varð stórmeistari.

Á vef Íslandspóst segir m.a.:

Friðrik Ólafsson varð stórmeistari í skák fyrstur íslenskra skákmanna. Afrek hans við skákborðið mörkuðu á sínum tíma tímamót í íslenskri skáksögu. Friðrik fæddist árið 1935 og varð stórmeistari í skák árið 1958. Á árunum 1978-1982 var Friðrik forseti alþjóðaskáksambandsins FIDE. Með sigrum sínum á seinni hluta 6. áratugarins náði hann fyrstur Íslendinga stórmeistaratitli í skák. Hann hóf sig upp í hóp sterkustu skákmanna heimsins og varð um leið víðkunnur jafnt innan skákheims sem utan. Meðal afreka Friðriks má nefna frammistöðu hans á millisvæðamótinu í Portoroz 1958 þar sem hann varð í 5. sæti á eftir Tal, Gligoric, Petrosjan og Benkö og jafn Fischer með 12 vinninga. Tal vann mótið með 13,5 vinningum. Friðrik hefur unnið allmörg alþjóðleg skákmót, hann hefur orðið skákmeistari Norðurlanda og sex sinnum átti hann Íslandsmeistaratitilinn í skák. Á frímerkinu er sýnd lokastaðan í skák Friðriks Ólafssonar og Bobby Fischers á alþjóðlega skákmótinu í Portoroz 1958. Friðrik sem hafði hvítt vann þessa skák.