Hraðskákmót Íslands fer fram 20. september á Bolungarvík

Hraðskákmót Íslands 2008 fer fram á Bolungarvík laugardaginn 20. sept. Á sunnudeginum mun Sparisjóður Bolungarvíkur standa fyrir golfmóti og í athugun er að úrslitaviðureignin í hraðskákkeppni skákfélaga fari fram á föstudagskvöldinu.  Boðið er upp á niðurgreiddar ferðir en skákmenn sjá sjálfir um fæði og gistingu.  Nánari upplýsingar eru hér að neðan.  Skákmenn eru eindregið hvattir til að skrá sig sem fyrst í skemmtilega skák-golf-helgarferð vestur á firði!

Skráning

Skráning fer fram með tölvupósti á [e-mail]  Tilkynna þarf hvort viðkomandi ætli að taka þátt í golfmótinu og gefa upp forgjöfina.  Nauðsynlegt er að skrá sig í flugið í síðasta lagi þriðjudaginn 9. september, eftir það er ekki hægt að halda eftir sætum.  Tilkynna þarf hvort viðkomandi ætlar að keyra eða fljúga og hvenær óskað er eftir flugi.

Flug

Búið er að taka frá sæti fyrir skákmenn en þar sem takmarkaður sætafjöldi er í boði gildir reglan:  fyrstur kemur fyrstur fær!

Flug vestur verður á föstudeginum kl. 16:30 og á laugardagsmorgni kl. 9:00. 

Flug að vestan verður á sunnudeginum kl. 12:50 og 17:20.

Verð fyrir flug er kr. 10.000,- og þarf að borga það innan við sólarhring eftir skráningu, annars telst skráning ekki gild.  

Greitt er inn á reikning Taflfélags Bolungarvíkur:  1176-26-595 kt. 581007-2560.

Munið skráningu í flug í síðasta lagi þriðjudaginn 9. september!

Bíll

Það er upplagt að keyra vestur og njóta Vestfirskrar fegurðar til hins ýtrasta!  Ákveðið hefur verið að greiða kr. 4.500,- ferðastyrk með hverjum keppanda sem kemur akandi utan Vestfjarða. 

Dæmi:  Ef fjórir keyra saman er styrkurinn samtals kr. 18.000,- sem ætti að duga fyrir eldsneyti og gjaldi í Hvalfjarðargöng báðar leiðir!

Þessi styrkur verður greiddur út strax að móti loknu og er best að senda greiðslufyrirmæli um leið og skráð er í mótið.

Gisting

Keppendur sjá sjálfir um gistingu og er best að menn hópi sig saman í hverja íbúð.  Þeir sem eru stakir geta samt bókað gistingu og stjórn Taflfélagsins mun aðstoða við að raða mönnum saman í íbúðir.  Hægt er að panta gistingu hjá:

Arndís Hjartardóttir í síma 863-3879 www.orkudisa.com

Inga Vagnsdóttir í síma 893-6860 www.bolungarvik.com

Fæði

Keppendur sjá sjálfir um fæði en leitað verður eftir tilboðum í léttan hádegisverð á laugardeginum og svo kvöldmat eftir mótið.  Nánari upplýsingar síðar en gott væri að látið væri vita við skráningu hvort viðkomandi hafi áhuga á að nýta sér þetta eða ekki.

Dagskrá

Föstudagur 19. sept.

• 16:30  Brottför í flug
• 20:00  Úrslitaviðureignin í hraðskákmóti skákfélaga
  

Laugardagur 20. sept.

• 9:00    Brottför í flug
• 11:30  Léttur hádegismatur
• 13:00  Keppni hefst
• 15:30  Kaffihlé
• 16:00  Keppni heldur áfram
• 18:30  Verðlaunaafhending
• 19:30  Kvöldmatur og skemmtun fram eftir kvöldi fyrir þá sem það vilja!

Sunnudagur 21. sept.

• 10:00 - 16:00  Golfmót.  Endanleg tímasetning liggur ekki fyrir.
• 12:50  Brottför í flug
• 17:20  Brottför í flug

 Aðalverðlaun

1. sæti kr. 30.000,- og nýr farandbikar.
2. sæti kr. 20.000,-
3. sæti kr. 10.000,-

Aukaverðlaun

• Verðlaunapeningar fyrir 3 efstu sætin í flokkunum:
• 16 ára og yngri
• 12 ára og yngri

Verðlaunapeningar fyrir efsta sætið í flokkunum:

• 50 ára og eldri
• undir 2100 stigum
• undir 1800 stigum
• stigalausir
• Bolvíkingar
• konur

Skákstaður, fyrirkomulag og skákstjórn

Teflt verður í sal Bakkavíkur þar sem fisk- og rækjuvinnsla er til húsa.  Nægt pláss er fyrir skákmenn og gesti og skemmtilegt útsýni yfir höfnina.

Umhugsunartími í hverri skák eru 5 mínútur á mann og verða tefldar allt að 20 umferðir, ræðst af fjölda þátttakenda.

Skákstjóri verður geðþekki reynsluboltinn Gunnar Björnsson.

Golfmót

Golfveisla Sparisjóðs Bolungarvíkur og Golfklúbbs Bolungarvíkur verður á sunnudeginum.  Nánari upplýsingar um mótið munu birtast síðar á netslóðinni hér að neðan.  Bolvíkingar lofa hins vegar skemmtilegu móti og auðvitað að allir komist heim með síðasta flugi dagsins!

http://golf.is/pages/forsida1/motaskra/upplysingarummot/?action=information&iw_language=is_IS

 

Hlökkum til frábærrar helgar með ykkur!

Taflfélag Bolungarvíkur