Arnar sigraði á Stórmóti TR og Árbæjarsafns

Þriðja sumarið í röð stóð Árbæjarsafn fyrir skákhátíð í samvinnu við Taflfélag Reykjavíkur. Góða veðrið og  fjöldi áhorfenda setti skemmtilega umgjörð um lifandi taflið sem fram fór á Árbæjartúninu í upphafi skákhátíðarinnar. Þar var háður svokallaður "formannaslagur". Áttust þar við formaður Taflfélags Garðabæjar Páll Sigurðsson og Óttar Felix Hauksson formaður Taflfélags Reykjavíkur.Tefld var atskák með 25 mínútna umhugsunartíma og stjórnuðu þau sæmdarhjónin Sigurlaug Regína Friðþjófsdóttir úr TR og Jóhann Hjörtur Ragnarsson úr TG leikmönnum útitaflsins. Fóru leikar svo að Óttar Felix bar sigur úr býtum með svörtu mönnunum eftir 39 leikja tafl, en upp kom Najdorf-afbrigði Sikileyjarvarnar.

Þrjátíu keppendur voru síðan skráðir til leiks á sjálfu stórmótinu og er það mesta þátttakan til þessa. Mótsstjórinn Dagný Guðmundsdóttir safnvörður stóð mjög myndarlega að öllu saman hvað báða viðburðina varðaði. Dagný sá um að manna  lifandi tafl, voru allir keppendur íklæddir þar til gerðum skákbúningum og litu vel út. Einnig var öllum keppendum mótsins boðið upp á léttar veitingar.  Var vel að verki staðið á stórmótinu og til mikillar fyrirmyndar.  Skákstjórn var í öruggum höndum  Ólafs S. Ásgrímssonar.

Röð efstu manna var eftirfarandi:

 

1.-2.       Arnar E. Gunnarsson                      6,5 vinn af 7        25,0

                Davíð Kjartansson                            6,5                          24,5

3.-6.       Sverrir Þorgeirsson                          5                              26

                Omar Salama                                        5                              24,5

                Daði Ómarsson                                 5                              24

                Örn Stefánsson                                 5                              20

7.-14.     Kristján Örn Elíasson                       4

                Pálmi Ragnar Pétursson                4

                Dagur Andri Friðgeirsson              4

                Elsa María Kristínardóttir               4

                Pétur Atli Lárusson                          4

                Stefanía B. Stefánsdóttir               4

                Jóhanna B. Jóhannsdóttir             4

                Gunnar Nikulásson                          4

Árbæjarsafn hefur í hyggju að halda þessu sem föstum viðburði í sumarstarfinu og er því upplagt að skrá þetta í mótaáætlun næsta starfsárs.

Taflfélag Reykjavíkur þakkar Árbæjarsafni kærlega fyrir samstarfið um þessa  velheppnuðu skákhátíð.