Níu manns á hraðskákmóti í Vin, til heiðurs Sveini Jóhannssyni, næstum níu!

Rífandi mæting var á skákæfingu hjá Skáfélagi Vinjar í dag, mánudag, klukkan 13. Róbert Harðarson frá Hróknum kom og hélt utan um æfinguna sem breyttist í hraðskákmót. Ekki höfðu þó allir sem komu tíma til að vera svo lengi en þrátt fyrir það tóku níu manns þátt.

Sveinsmótið, til heiðurs yngsta þátttakandanum, Sveini Jóhannssyni, sem er alveg að verða níu ára, núna í júní... tókst auðvitað glimrandi vel. 

Létt var yfir fólki þó að leikar æstust inn á milli. Borið var í keppnisfólkið kaffi og meðlæti meðan á móti stóð, enda átta umferðir og ekkert slakað á.

Það kom þó ekki mikið á óvart að Róbert skákstjóri yrði efstur á palli með 7,5 vinninga. Næstir voru þeir Guðmundur Valdimar Guðmundsson með 7 og Friðrik Friðriksson með 5. Aðrir í humátt á eftir.

Litið var á mótið sem upphitun fyrir stórmót nk. mánudag, þegar Guðfríður Lilja Grétarsdóttir, fyrrum forseti Skáksambandsins verður heiðruð. Verður það mót auglýst betur síðar en þau sem geta ættu að taka mánudaginn 9. júní frá, en mótið hefst kl. 13:00.

Vin er að Hverfisgötu 47 í Reykjavík og er athvarf rekið af Rauða krossinum. Æfingar eru á mánudögum kl. 13 og síminn þar er 561-2612.