Skákdeild KR herjar á Dani

Breiðfylking eldri skákmanna úr Skákdeild KR heldur á morgun (8. maí)  til Danmerkur í viku skák- og selskapsreisu, enda margir með konur sínar með sér. Verður fyrst att kappi við Jóta á 22 borðum í Herning á laugardag og síðan telft við Köbenhavn United /Öbro á 20 borðum, þriðjudaginn 13 maí.  Stefnt er að því að vinna Danina 14-2 eða þaðan af meira og hefna þannig gamalla ófara fyrir þeim á knattspyrnusviðinu. Tefldar verða 25 mín. atskákir, tvöföld umferð. 

Þar sem Skákdeild eða "Skakafdeling" á dönsku hljómar ekki nógu virðulega eða tilkomumikið er hin fríða fylking kynnt til leiks  undir heitinu Skákherdeild KR eða KR Skak Artilleri,  til að auka Dönum hroll.

Áður hefur skákmenn úr KR farið keppnisferðir til Færeyja, Grænlands og Skotlands með góðum árangri, unnu í þeirri ferð einn elsta skákklúbb heims í Edinborg, að vísu með aðeins minnsta mun, sem dugði. Þá var einnig efnt til móts fyrir þá í Glendiddich, wiskey verksmiðjunni, þar sem 30, 20, 15 ára flöskur af þeim eðla miði voru í verðlaun.   Þá fóru 7 félagar úr hópnum í vetur á stórmótið í Wijk Aan Zee í Hollandi og fylgust með lokaumferðunum. Mun það vera í fyrsta sinn sem farið er utan til að horfa á skákofurmeistara að tafli, en algengt er að skipulagðar séu sérferðir til útlanda á íþróttaviðburði, einkum fótbolta- og handboltaleiki.

Í  "stórskotaliðinu"  eru eftirtaldir skákmenn:

Árni Þór Árnason, Árni Einarsson; Björn Víkingur Þórðarson; Einar S.Einarsson; Daði Guðmundsson; Guðfinnur R. Kjartansson; Guðmundur G. Þórarinsson; Gísli Gunnlaugsson; Grímur Ársælsson; Gunnar Kr. Gunnarsson; Harvey G. Tousigant; Hilmar Viggósson; Ingimar Jónsson; Jón Steinn Elíasson; Jón Friðjónsson;  Kristinn Bjarnason; Kristján Stefánsson; Páll G. Jónsson; Sigurður E. Kristjánsson; Stefán Þormar Guðmundsson;  Össur Kristinsson, auk þess kemur Gunnar Finnlaugsson til liðs við sveitina frá Svíþjóð.

Skákdeild KR er 10 ára á þessu ári, í henni eru milli 60-70 skákmenn, æfingar eru hverju mánudagskvöldi kl. 19.30 og eru að jafnaði mjög vel sóttar.   Skákdeildin  nú Íslandsmeistari í 3ju deild og teflir því í 2 deild að ári. Formaður hennar frá upphafi er Kristján Stefánsson, hrl.