Síðustu verk Guðfríðar Lilju í embætti forseta SÍ

Eins og öllum er kunnugt þá lét Guðfríður Lilja af störfum sem forseti Skáksambands Íslands á aðalfundi sambandsins laugardaginn 3. maí. Síðustu embættisverk hennar voru í Rimaskóla degi áður þegar hún afhenti skáksveit Rimaskóla styrk til þátttöku á Evrópumóti grunnskóla í Varna í Búlgaríu og færði sigurvegurum á Íslandsmóti stúlkna í eldri flokki sigurlaun mótsins. Þær Hallgerður Helga Þorsteinsdóttir og Sigríður Björg Helgadóttir urðu að tefla úrslitaeinvígi um Íslandsmeistaratitilinn. Sér til aðstoðar við afhendingarnar fékk Lilja liðsinni frá Þorgerði Katrínu Gunnarsdóttur menntamálaráðherra. Athöfnin fór fram í hátíðarsal Rimaskóla að viðstöddum fjölda annarra gesta.