Aðalfundur SÍ

Aðalfundur Skáksambands Íslands fór fram í Skákhöllinni Faxafeni í gær.  Hér á Skák.is var farið yfir stærstu atriðin í gær en í þessum pistli ætla ég að gera nánari grein fyrir fundinum.   

Fundurinn hófst á hefðbundinn hátt.  Fundarstjóri var Ágúst Sindri Karlsson og fundarritari Ríkharður Sveinsson.  Ólafur H. Ólafsson hélt sína hefðbundnu ræðu um kjörbréf en óvenju mörg félög skiluðu inn kjörbréfi og félagaskrá en ég held að alls hafi 21 félag sent fulltrúa á fundinn sem gæti verið met. 66 höfðu atkvæðisrétt.

Tvö félög var samþykkt sem ný aðildarfélög í sambandið með lófaklabbi en það voru Víkingasveitin og Skákfélag Vinjar.

Guðfríður Lilja flutti skýrslu stjórnar og fór yfir reikninga sambandsins.  Lilja fór jafnframt yfir þau fjögur ár sem hún hefur verið forseti.  Lilja fékk mikið lófaklapp í lok ræðunnar og stóðu fundarmenn upp fyrir henni.   

Næst á dagskrá voru kosningar og fóru fyrst fram forsetakosningar.  Tveir voru í framboði Björn Þorfinnsson og Óttar Felix Hauksson.  Báðir héldu þeir skemmtilegar ræður.  Björn rifjaði upp sögu þegar hann var kallaður að dánarbeði afa sína og nafna, Björns á Löngumýri.   Sá gamli horfði á Björn og sagði" "Þú verður einhvern tíma forseti".   Þegar upplýsingar bárust um mögulegt forsetaframboð Björns fór einn Hornverji að uppnefna hann sem Björn forseta.   Rifjaðist sagan gamla þá upp fyrir Birni sem telur að þar hafi sá gamli verið að vitja sín í gegnum Hornverjann!  

Kristján Hreinsson samdi um þetta vísu:

Ég bið að gæfan þjóni þér

í þessu ævintýri

og býsna sannspár bara er

Björn á Löngumýri

Björn vann nokkuð öruggan sigur, hlaut 40 atkvæði gegn 22 atkvæðum Óttars.  Óttar Felix óskaði Birni innilega til hamingju og lýsti yfir því að hann myndi vilja sitja áfram í stjórn sambandsins og vinna með nýjum forseta. 

Sjálfkjörið var í stjórn SÍ en hana skipa:

• Magnús Matthíasson, Skákfélagi Selfoss
• Óttar Felix Hauksson, Taflfélagi Reykjavíkur
• Sigurbjörn Björnsson, Taflfélaginu Helli
• Edda Sveinsdóttir, Taflfélaginu Helli
• Helgi Árnason, Skákdeild Fjölnis
• Halldór Grétar Einarsson, Taflfélagi Bolungarvíkur

Sex buðu sig fram í fjögur varmannasæti.  Þar þurfti því að kjósa.   Kjöri náðu:

• Páll Sigurðsson 38
• Torfi Leósson 35
• Karl Gauti Hjaltason 28
• Stefán Bergsson 28

Væntanlega þarf að draga um röð varamanna þar sem Karl og Stefán fengu jafnmörg atkvæði.  Kristján Örn Elíasson og Róbert Harðarson náðu ekki kjöri.

Í öll önnur embætti var sjálfkjörið.   

Lagabreytingar voru að lokum ræddar.  Stjórn SÍ hafði lagt til að ákvæði um 30 skákir til að koma til greina í landslið yrði hækkað í 40.  Breytingartillaga kom frá Ingvari Þór Jóhannessyni að sú tala yrði enn hækkuð í 50.   Breytingartillaga Ingvar var samþykkt nokkuð naumlega eða um 20-15 en sumum fundarmönnum fannst að færa mætti hægar í þessar breytingar, þ.e. að taka 40 skákir núna.   Tillagan með breytingunni var svo samþykkt samhljóða á fundinum.  Lilja minnti á að stjórn SÍ getur farið fram hjá þessu við mjög sérstækar aðstæður.

Tillaga um breytingu á framkvæmd Íslandsmóts skákfélaga var samþykkt samhljóða.  Kvennatillagan, svokallaða, var svo felld með um 10 atkvæðum en Lilja, Lenka og Pál Sigurðsson höfðu lagt til að ein kona þyrfti að vera í hverju liði á Íslandsmóti skákfélaga

Í lok fundarins færði Björn Lilju blómvönd og þakkaði henni fyrir hennar framlag í gegnum tíðina en Lilja hefur unnið frábært og mjög óeigingjarnt starf í gegnum árin. 

• Myndaalbúm Skák.is
• Frétt RÚV um forsetakjör
• Frétt Stöðvar 2 um forsetakjör