Stefnuskrá Óttars

Óttar Felix Hauksson, formaður TR og varaforseti SÍ, hefur birt stefnuskrá sína á heimasíðu TR.  Stefnuskránna má hér finna í heild sinni:

Aðdragandi framboðs

Í byrjun þessa mánaðar hafði ég rætt það við nokkra af forystumönnum aðildarfélaga SÍ að ég myndi gefa kost á mér til embættis forseta SÍ, fengi ég til þess nauðsynlegan stuðning. Af persónulegum ástæðum, sem flestum eru kunnar, neyddist ég til að bíða með að tilkynna ákvörðun mína. En nú, þegar mál horfa til betri vegar, er ekki eftir neinu að bíða. Ég tilkynni því framboð mitt til embættis forseta Skáksambands Íslands frá og með deginum í dag, 17. apríl 2008.

Kynning frambjóðanda

Ég er fæddur og uppalinn í Reykjavík. Skákin var í öndvegi í föðurfjölskyldu minni. Föðurafi minn, Sveinn Halldórsson, var frumherji í skáklífi Bolungarvíkur snemma á síðustu öld. Hann átti gott skákbókasafn og var þekktur skákdæmahöfundur.  Faðir minn, Haukur Sveinsson, vann sig upp í meistaraflokk í Reykjavík um 1950. Hann fluttist til Hafnarfjarðar 1958 og varð fimm sinnum skákmeistari bæjarins. Hann tefldi í landsliðsflokki á árunum 1958-1963. Bróðir minn, Sveinn Rúnar Hauksson, var fyrsti Unglingameistari Íslands 1962.

Ég tefldi fyrst í unglingaflokki 1963 (náði 3.-4. sæti). Ég sigraði opinn flokk á Skákþingi Íslands 1979.  Á námsárum mínum í Danmörku 1985-1988  sigraði ég meistaramót bæjarfélaganna Tåstrup og Ishøj (1986).

Á árunum upp úr 1980 hófust stjórnunarstörf mín innan skákhreyfingarinnar. Ég var kosinn í stjórn Skáksambands Íslands 1981 og framkvæmdastjóri SÍ 1981-1982. Þá var ég jafnframt umsjónarmaður deildakeppninnar (Íslandsmóts skákfélaga) og lagði í meginatriðum það skipulag sem enn er notast við í dag. Ég starfaði jafnframt við Reykjavíkurskákmótið á þeim árum. Ég var aðstoðarframkvæmdastjóri Heimsbikarsmóts Stöðvar 2 1988 í Borgarleikhúsinu.

Ég tók við formennsku í Taflfélagi Reykjavíkur 2005  og varð jafnframt varaforseti SÍ.  Ég er giftur og á tvö uppkomin börn Ég hef starfað við eigið útgáfufyrirtæki undanfarin sjö ár.

Nokkur helstu stefnumál

1. Ég legg áherslu á, að SÍ séu heildarsamtök aðildarfélaganna, en ekki enn eitt skákfélagið í Reykjavík. Því tel ég mikilvægt að fulltrúar fleiri félaga en verið hafa að undanförnu  taki sæti í stjórn SÍ. Forseti SÍ á að vera forseti allra skákmanna og hafa heildarhagsmuni skákhreyfingarinnar að leiðarljósi. Í stjórn og varastjórn þurfa að vera fulltrúar virkustu félaga landsins.

2. Skákþing  Íslands skal verða að þeirri skákhátíð,  sem íslenskir skákmenn eiga skilið. Það verður aðeins gert með því að keppni í landsliðsflokki verði háð á sama tíma og stað og keppni í öðrum flokkum. Stefna mín er, að það takist ekki seinna en 2010.

3. Skólaskák skal efla til muna í samvinnu við sveitarfélög og skákfélög (eða skákráð, sbr. Skákakademíuna) í viðkomandi sveitafélögum. Komið verði á skákþjálfarabraut við Skákskóla Íslands. Þar verði námskeið sem ljúki með diploma og þjálfararéttindum í unglingakennslu.  Með þessu skal reyna að samhæfa vinnubrögðin í skólaskákinni og gera þau markvissari.

4. Að kvennaskák skal hlúð að bestu getu og reynt að viðhalda og efla áhuga þeirra efnilegu unglingsstúlkna, sem sannarlega hafa sett svip á skáklíf landsmanna á síðustu misserum. Markviss þjálfun, mótahald og samskipti við erlendar stöllur þarf að vera inntakið í þeirri viðleitni, að skapa stúlkunum áhugaverðan vettvang.

5.  Afreksfólk í skákinni þarf ekki síður efla til dáða. Það eru oftar en ekki fyrirmyndir og góður árangur sem eflir áhuga hinna ungu á skáklistinni. Þátttaka í forkeppni heimsmeistarakeppni, ólympíumótum, Evrópukeppni landsliða og einstaklinga, auk annarra valdra viðburða skal ávallt vera með íslenskri þátttöku. Þjálfunarmál skal taka föstum tökum og hafa til hliðsjónar hvað helsta afreksfólk okkar hefur að segja um þá hluti. Brýna skal einnig skyldur afreksfólksins gagnvart skákhreyfingunni. Það má ekki gleyma því að þeir sem áunnið hafa sér ákveðin réttindi hafa einnig ákveðnum skyldum að gegna.  Á sömu spýtunni hanga bæði réttindin og skyldurnar.

6. Erlend samskipti skal rækta sem áður, bæði á vettvangi FIDE og einnig í samvinnu við skáksambönd Norðurlandanna. Ísland á sérstæða skáksögu meðal þjóðanna og nýtur virðingar í heimsfjölskyldu skáklistarinnar. Það þarf að sinna þessum samskiptum og viðhalda góðum orðstír Íslands sem skákþjóðar.

7. Útgáfumál þarf að taka föstum tökum og koma út tímariti eða ársriti um atburði íslenskrar skáksögu síðustu ára. Allar götur síðan 1925 hefur verið nær óslitin útgáfa á Íslandi. Skáksaga Íslands þarf að vera samfelld og aðgengileg í prentuðu máli. Það er skylduverkefni nýrrar stjórnar að svo verði enn á ný.

Með vinsemd og virðingu

Óttar Felix Hauksson